Do kung là rơndăp broă lơh geh khà dùl mpồl cau bơsram dờng tàm dơ̆ pơrlòng “Kơnòm bơsram, cau bơsram dờng mờ bồ tơngoh sơn đờm mŭt lơh broă” dơ̆ V geh Ƀộ Giáo dục mờ Đào tạo bơyai lơh.

Rơndăp broă ECO-HOUSE geh 3 nă cau bơsram dờng gơwèt 3 gah bơsram krơi is là Hồ Thanh Huy, atbồ mpồl, cau bơsram dờng nam dơ̆ 4 khoa Kông nghệ điện tử, Lê Hoàng Minh Châu-nam dơ̆ 4 khoa Quản trị kiñ doanh mờ Trần Thị Trâm (nam dơ̆ 3 khoa Thương mại-Zu lịc) mờ broă bơto pơlam bơh Thạc sĩ Thái Duy Tùng (cau pơgru bơto khoa Tài cíñ ngân hàng) lơh. Gơlơh bè 3 gah bơsram ờ gơrềng tus bal, mơya 3 nă cau bơsram dờng do neh pơgồp bal lơh geh dùl rơndăp broă sơn đờm mŭt lơh broă tàm gah lơh sa suơn sre, brê bơnơm, lơh ka tàm dà.

Phan bơh mpồl lơh gơs là phan dềt geh ơn tàm suơn pơgồp bal mờ ngui bơta lơh broă bơh ngài tàm điện thoại at tê dê, tàm hơ̆ geh tơrgùm bơta sền gròi ală khà kờp kwơ màng bè bơta duh, bơta sùh, khà dà, phơng geh tàm ù, khà N-P-K, khà pH,... Bơh tŭ hơ̆, kờñ git bơta ni sơna mờ rơcang yal lài bơsong di tŭ, tơmù ờ uă ngan bơta rềs àr ai làng bol lơh broă sa suơn sre in, rơcang sơndră mờ tam gơl trồ tiah, tơnguh uă cồng nha bal mờ tềm pềr ồs đèng, dà tuh...

Cau bơsram dờng Hồ Thanh Huy pà git, bơh broă tus sền, ală hìu tam phan, làng bol lơh broă sa tŭ do gam geh yal ală bơta phan geh lơh bơh lơgar Lo, ờ geh tơngai gàr bơta kơl jăp mờ đềt mềr mờ làng bol lơh broă sa suơn sre in. Den tàng, mpồl cau bơsram dờng do neh lơh gơs phan geh lơh broă ƀuơn, đềt mềr mờ cau lơi kung gơtùi ngui. Ală bơyô kung git là, să tờm kờñ geh ngui ală bơta ngăc ngar neh geh bơsram nàng ngui kông nghệ kao tàm broă lơh sa suơn sre, dong kờl làng bol tơnguh uă bơta kwơ bơh phan geh lơh bơh broă lơh sa suơn sre dê nàng pleh mờ bơta geh tơnhào ờ geh priă tăc, gơtìp cau blơi rồn bơklơn. Cau bơsram dờng Hồ Thanh Huy yal: “Bol añ kis bơh cau lơh broă sa suơn sre, deh mờ dờng tàm tiah đah jum măt tơngai mŭt dà lơgar dê, bol añ ờ lơh sa suơn sre mơya bol añ wă git, mờ git broă lơh sa suơn sre bè lơi. Bơdìh hơ̆ tai, bol añ gam geh ală bơyô bơsram gah lơh sa suơn sre, ală bơyô hơ̆ tŭ lơi kung dong kờl bol añ nàng lơh geh phan dong kờl làng bol lơh broă sa suơn sre. Den tàng bol añ lòt jăt gùng song nàng jòi tus bơta niam tờm tàm ù tiah ƀòn lơgar tờm”.

Ai bơh tàm tơngai tam phan, ECO-HOUSE geh ai ală jơnau hơ mblàng “phan geh lơh bơh broă lơh sa suơn sre kloh ờ ngòt ờ ndrờm bal” ai bơh kông nghệ pa IoAT (Internet rơbô phan) mờ uă bơta rơwah. Mùl màl rơndăp broă geh pơgồp bal mờ jơnau kờñ “Lài dà, dơ̆ bàr phơng, dơ̆ pe tơriang” ndrờm bal là bơsong ală bơta bè tuh dà tềm pềr, sền gròi phơng tàm ù ha là tơl ală bơta, tàm hơ̆ geh tuh dà tềm pềr, phơng phan tam in, broă lơh tơl ală bơta ai phan tam in neh geh tơl bơta di pal mờ priă jền bal mờ broă kờñ bơh cau lơh sa dê.

Cau bơsram dờng Lê Hoàng Minh Châu là cau tàm mpồl yal, cau geh ngui gơwèt mờ rơndăp broă lơh tus là làng bol lơh broă sa suơn sre mờ ală hợp ták xã, tềng đăp măt tơrlòng lơh mờ ờ uă bơta phan tam bè tờm sầu riêng, táo, plai bung tàm càr Tiền Giang, Bến Tre mờ tàm suơn bơkào lan tàm ƀòn dờng Vũng Tàu. Tàm tơngai lơh jăt, ală bơyô do kung gơtìp uă kal ke bè ờ hềt geh uă broă lơh mờng chài bè drà kă bro, ờ hềt git wă nền nòn bè tơl bơta phan tam, den tàng ală bơyô kung pal jòi sền bè broă lơh nàng ai geh broă lơh niam ngan: “Tŭ do, làng bol gam ờ khin mờ broă ngui, bŭ lah nùs nhơm ngui neh geh mơya broă tam gơl jơh bơh broă lơh lài do tus mờ broă lơh pa den làng bol gam ờ khin. Bơh tŭ hơ̆, bol añ ai geh broă lơh là ai bơh tàm ală broă lơh lài do nàng tơnguh bơtàu tai ờ gŏ di sơbì jơh ală broă lơh lài do”.

Jăt Thạc sĩ Thái Duy Tùng, do là cau pơgru bơto lơh tơngu me do yal, bơta krơi is bơh rơndăp broă lơh do dê pơn drờm mờ uă tơngu me ndai là broă ală bơyô cau bơsram dờng neh tus bal mờ bơta mùl màl nàng tơrlòng broă lơh do tàm tơl bă ù, jòi kờñ git broă kờñ, bơhiàn tam phan bơh làng bol dê. Bŭ lah ală cau tàm mpồl ờ geh broă lơh tờm bè lơh sa suơn sre, mơya mờ bơta pràn geh deh bơh tiah đah jum măt tơngai mŭt dê, pơgồp bal mờ broă geh tơrgùm jơnau ngăc ngar bè lơh sa suơn sre bal mờ geh broă dong kờl bơh ală bơyô cau bơsram dờng gam bơsram gah lơh sa suơn sre tàm Hìu bơsram Đại họk Tiền Giang, ală bơyô do neh lơh geh cồng nha bè ngai do: “Broă tŭ do là tŭ jòi geh cau kờñ den gam tìp ờ uă kal ke tài ờ hềt geh khà măt kă bro, mơya ală bơyô do kung neh geh uă bơta git gơ̆p mờ ală tiah lơh sa suơn dờng, kơ̆p kờñ tàm tơnơ̆ do ală bơyô rơhời geh tìp mờ drà kă bro rềp rơlao”.

Mờ rơndăp broă lơh do, mpồl kơ̆p kờñ tơnguh bơtàu mờ jòi geh priă bơh uă bơta ờ mìng bơh phan geh lơh mờ ngài rơlao tai gam geh bơto pơlam lơh mờ ai geh broă lơh, bơh phan geh lơh bơh broă lơh sa suơn sre neh tơnhào dê bal mờ ală bơta cế phẩm siñ họk. Kơ̆p kờñ bơh mpồl dê là tơnguh uă bơta kwơ phan geh lơh bơh broă lơh sa suơn sre lơgar Việt Nam dê, yal loh làng ală khà geh bơh broă tam phan nàng cau blơi in git phan tam tàm tiah lơi, khà ù bè lơi, geh jơnkah sơnơm tàm ù lah ờ. Cau bơsram dờng Hồ Thanh Huy chờ hờp yal tai: “Bol añ đơs chờ bal là ală kòn bơnus lòt tăc biăp, bol añ tăc phan geh lơh bơh broă lơh sa suơn sre mờ geh kông nghệ nàng dong kờl broă tăc phan geh lơh bơh broă lơh sa suơn sre do, kơ̆p kờñ lơh geh cồng nha mờ drà kă bro geh dờp”.

Tiến sĩ Nguyễn Quốc Cường, Phó kwang atbồ khoa Thương mại – Zu lịc hìu bơsram Đại họk Kông nghiệp ƀòn dờng Hồ Chí Minh đơs, do là tơngu me niam dong kờl làng bol tàm broă tam phan niam rơlao tàm tiah să tờm he dê bal mờ sền gàr tiah kis, tơmù ờ uă ngan broă sơgràm phơng sih, sơnơm gơsơ̆t tu: “Bè đah khoa họk geh pơlam bè đah broă lơh tờm geh lơh jơh pràn nàng ală bơyô in pơn jăt tai lơh rơndăp broă do gơs mpồl lơh sa kă bro spin-off cèng geh bơta kwơ mùl màl ai mpồl bơtiàn in, tàm hơ̆ uă ngan là mpồl bơtiàn tơnguh bơtàu lơh sa suơn sre jăt gùng dà broă lơh geh bơta chài uă”.

Ală rơndăp broă mŭt lơh broă bơh kơnòm bơsram, cau bơsram dờng kờñ geh “kis” mờ tơnguh bơtàu rơlao tai, ală bơyô kung kờñ ngan geh broă dờp, kờñ bal mờ dong kờl bơh ờ mìng hìu bơsram mờ gam bơh mpồl bơtiàn tai. Bơh tŭ hơ̆ gơtùi lòt bal mờ uă rơlao tai ală tơngu me mŭt lơh broă pơgồp bal tàm broă tơnguh bơtàu dà lơgar dê.