Mờ bơta geh is mờ ù tiah neh geh lài, càr Gia Lai neh lơh gơs mờ bơtàu tơnguh uă suơn dờng lơh sa suơn sre tơrgùm bal, ngui kông nghệ kao drơng ai broă lơh phan geh lơh bơh suơn sre mờ tăc mờ lơgar bơdìh, uă bơta phan geh lơh bơh suơn sre tờm geh bơta kwơ lơh sa uă neh tăc geh tus 40 lơgar, kơnhoàl ù tiah. Tŭ do, càr geh 3 tiah lơh sa mờ măi mŏk, mờ ai ù tiah lơh 23 mpồl lơh sa mờ măi mŏk. Phan lơh geh bơh suơn sre tàm càr geh uă bơta, kơl jăp bè: kơphe, kao su, tào sơdàng, bùm blàng, ce, plai chi… ai geh bơta pràn bơtàu tơnguh lơh gơs phan sa mờ măi mŏk. Gùt càr geh rơlao 8 rơbô hìu lơh broă tàm gah lơh sa mờ măi mŏk lơh gơs phan ngui sa… Bơta geh uă, mơya jăt ồng Phạm Văn Binh, Kwang atbồ Sở Kông thương càr Gia Lai đơs, ală broă lơh drơng ala logistics tàm càr ờ hềt bơtàu tơnguh tài gam uă bơta gơkòl. “Tàm gah lơi kung geh bơta kal ke, rơndăp ù tiah den ờ hềt lơh gơs, dơ̆ bàr là bŭ lah mpồl lơh broă geh bơta tàm bơrtŏ bal mơya phan bơna nàng drơng ai broă lơh logistics in kung gam ờ pràn. Khà cau lơh broă ờ gal mờ geh  bal broă jơnau git wă wil tơl bè logistics dê kung gam ờ dipal sơl”.

Tàm Pơrjum, ala măt ală mpồl lơh broă gơwèt Ƀộ Kông thương dê, mpồl tam klăc gah phan kă bro mờ ală cau bơcri priă, mpồl lơh sa kă bro neh tam pà uă jơnau đơs nàng bơtàu tơnguh broă lơh drơng ala logistics, gơnoar broă broă lơh drơng ala logistics gơwèt mờ broă bơtàu tơnguh lơh sa mpồl bơtiàn, pơlam gùng dà lơh sa kă bro pơgồp bal mờ lơh pràn broă bơtàu mpồl logistics mờ lơh broă bal đah ală mpồl lơh lơh sa kă bro tàm dơlam càr mờ bơdìh càr… Ồng Lê Quang Trung, Phó Củ tịc Mpồl tam klăc Mpồl lơh sa kă bro broă lơh drơng ala Logistics Việt Nam geh jơnau đơs: “Gơwèt mờ càr Gia Lai ha là Tây Nguyên bă ù, phan geh is uă, ală mpồl lơh sa kă bro pal ngui bơta ƀuơn tiah ñhoa, ngui broă lơh bơh Dà lơgar tàm broă dong kờl, bơtàu tơnguh ală mpồl lơh sa kă bro bơh cau kòn cau dê. Broă pơgồp bal đah broă lơh mờ lơh jăt mùl màl là bơta pràn kwơ màng ngan nàng wèt tus ală mpồl lơh broă tàm pơgồp bal. Pal geh broă tơrbŏ bal niam đah ală mpồl lơh sa kă bro Logistics tàm mpồl ai geh phan, tơrbŏ bal mờ ală cau lơh sa tơnơ̆ mờ ală broă pơn diang lòt rê mờ anih prăp gàr mờ ƀlàng ìs”.

Jăt ồng Trần Thanh Hải, Phó Kụk atbồ Kụk Tăc mờ blơi phan mờ lơgar bơdìh gơwèt Ƀộ Kông thương đơs, kờñ ngui geh ală bơta geh, bơta pràn, càr Gia Lai pal geh ală kơrnoăt, broă lơh geh bơta pràn, lơh geh cồng nha nàng hòi jà geh uă bơta pràn bơh mpồl bơtiàn, ală tập đoàn, mpồl lơh sa kă bro geh bơngă pin dờn, geh bơta pràn, broă mờng chài tàm broă bơcri priă, bơtàu tơnguh phan bơna logistics. “Hòi jà ală mpồl lơh sa kă bro pờ anih lơh broă, lơh hìu lơh broă tàm càr Gia Lai geh dong kờl gơlòt phan kă bro. Nàng hòi jà mpồl lơh sa kă bro den càr pal geh broă lơh mùl màl geh nùs nhơm hòi jà mờ dong kờl. Bè gơtùi bơyai lơh ai ală mpồl tus yal bơcri priă, hòi jà ală bơta geh phan bơh càr dê tàm ală tiah dờng lơgar Việt Nam kung bè tơrbŏ bal mờ ală càr tàm lơgar Lào mờ lơgar Campuchia kung là kwơ màng ngan nàng lơh geh bal ală bơta pràn neh geh lài”.

Nàng pơn jăt tai ngui geh cồng nha ală bơta geh, bơta pràn, lơh pràn gah logistics bơtàu tơnguh mhar mờ kơl jăp, pơgồp bal niam, geh cồng nha rơlao tàm broă bơtàu tơnguh bal càr dê, mờ gơnoar broă là anih lơh broă atbồ dà lơgar bè broă lơh drơng ala logistics, bè đah Ƀộ Kông thương, ồng Trần Thanh Hải pơlam sồr, gơnoar atbồ càr Gia Lai pơn jăt tai lơh jăt nền nòn ală gùng dà broă lơh tàm Nghị quyết sồ 163 bơh Cíñ phủ bè broă lơh pràn broă bơtàu tơnguh broă lơh drơng ala logistics Việt Nam mờ ală nghị quyết, broă lơh, lơh broă jŏ jòng bơtàu tơnguh bơh Đảng, Dà lơgar, Cíñ phủ geh gơrềng tus tiah Tây Nguyên nàng lơh cơng tàng ai geh gùng dà broă lơh mờ bơyai lơh geh cồng nha ală broă lơh, broă rơndăp lơh, rơndăp broă lơh bè bơtàu tơnguh broă lơh drơng ala logistics gàr niam di pal mờ bơta tàm mùl màl mờ lơh geh bơta geh, bơta pràn bơh càr Gia Lai dê.