Jăt mờ hơ̆, UɃÑZ càr Dăk Lăk sồr Củ tịc UɃÑZ ală kơnhoàl, thị xã, ƀòn dờng đơng lam ală cơl dŭ lơh broă, gah lơh broă gơrềng bal, ală mpồl lơh broă, cau dùl nă să lơh, kă bro kơphe tàm càr lơh broă rơndăp lơh mờ tơnguh broă sền gàr nền nòn bă ù tam kơphe tus kàl tơnhào; tơnguh broă mblàng yal, lam sồr ală mpồl lơh broă, cau dùl nă să bañ pic plai kơphe lir, khà plai kơphe dum tŭ pic geh rơlao 80% (di lah pic tàm lồi kàl, khà plai dum ờ uă ngan geh bơh 80%). Mờ geh broă lơh glài nền nòn gơwèt mờ ală cau pic, blơi, tăc kơphe lir; bơto sồr làng bol rơcang ƀlàng ìs, măi pơr nàng rơcang sơndră mờ tŭ pic di lah gơtìp mìu jŏ ngai lơh ờ niam tus mờ bơta niam plai kơphe dê.