Mơya tŭ ală rơndap broă lơh mŭt lơh broă, gah broă do gam tơngŏ uă bơta ờ niam bè bơta dong kờl tă pơgồp tàm kes priă càr dê den ờ uă ngan, cồng nha gàr niam rài kis mpồl bơtiàn ờ hềt uă; uă rơndap broă lơh lơh bơ̆ tiah ơm kis làng bol.

Bàr pe nhai do, rlau 700 hìu bơnhă làng bol kòn cau Dao ơm tàm thôn Đoàn Kết, xã Ia Piơr, kơnhoàl tiah nhàr lơgar Chư Prông pal kis bal mờ bơta bô ồm uă ngan bơh 3 nơm wàng ròng sur dờng pa mŭt lơh broă. Bi Hoàng Văn Niên, ơm tàm thôn Đoàn Kết pà gĭt, tŭ ờ jai kong ngan là bơh mang tus trồ mang, làng bol mìng gĭt til mpồng kơ̆, pơn chèu glòm muh mat, geh tŭ pơn chèu bal tàm tŭ rê bĭc.

Tŭ do, tàm xã Ia Piơr geh 14 rơndap broă lơh ròng phan neh mờ gam geh lơh.  Xã rềp tiah nhàr bal là xã Ia Lâu geh 19 rơndap broă. Bi Hoàng Văn Niên kơlôi sơnơng bè rài kis bơh hìu bơnhă dê tŭ jơh ală rơndap broă lơh ròng sur mŭt lơh broă. Bi Hoàng Văn Niên đơs: “Tŭ mpồl lơh sa kă bro rcang mut lơh broă, khi hơ là ờ geh bơta ƀô, lơh geh broă lơh ai làng bol in. Mơya tŭ do, den ờ gŏ geh sră nggal lơh broă lơi, mờ mìng geh ƀô ồm lơm. Tŭ do, pa mìng geh bàr pe nơm wàng ròng sur dờng lơh broă, tơnơ̆ do geh tai bàr pe nơm wàng ròng dờng ne lơh broă tai den ờ gĭt pal kis bè lơi?”

 Dờp jơnau yal bơh làng bol dê, bồ nhai 4 nam 2023, Ủy ƀan Ñân zân xã Ia Piơr neh geh dơ̆ lơh broă mờ ala mat 3 rơndap broă lơh ròng sur neh mut lơh broă. Sră nggal lơh broă đơs loh: Ală anih bơsong phan tuh bơdìh ờ hềt lơh sir, mơya wàng ròng sur dờng neh lơh broă 3 nhai do, ròng gĭt nđờ jơ̆t rơbô nơm sur poăc. Ồng Bùi Văn Phụng- Ƀí thư Đảng uỷ xã Ia Piơr pà gĭt: “Dan mờ kấp hơđang, tŭ ală wàng ròng sur dờng lơh sir, den lơh mpồl lòt sền, sền sơwì ngan ngồn, dilah gàr geh ală bơta den ai lơh broă. Bè tŭ do, kấp ủy gơnoar atbồ tiah do kal ke ngan, tài bơh dơ̆ 1 là xã ờ geh bơta mờng chài broă lơh bè gah broă do, dơ̆ 2 là xã ờ gŏ tơl gơnap gơnoar”.

Tŭ do gùt càr Gia Lai geh 46 rơndap broă lơh ròng phan geh kĭ gùng dà broă lơh bơcri priă lơh, tàm hơ̆ geh 16 rơndap broă lơh mut lơh broă. Broă bơtàu tơnguh ur ar ală rơndap broă lơh ròng phan neh tơngŏ uă bơta ờ niam tơnơ̆ tŭ lòt sền, kờp sền tơrgùm bal tàm lồi nam 2022. Jat hơ̆, jơh ală rơndap broă lơh mìng geh wàng ròng dờng, ờ tơl ală broă lơh drơng broă ndai bè lơh gơlik phan sa, lơh gơlik phan bơna, halà lơh gơlik gơs phan bơh phan tuh phan ròng dê. Den tàng, ờ hềt lơh geh uă bơta kwơ mờ broă lơh ai cau lơh broă tàm tiah do in. Bơdìh hơ̆, bàr pe rơndap broă lơh geh dờp geh bơta dong kờl gơ hòi gơ jà bơcri priă lơh, bè lơh wàng ròng jơh den ờ gŏ ròng phan tơn mờ ai apah wơl cau ndai in. Uă rơndap broă lơh mut lơh broă tŭ ờ hềt gàr niam ală jơnau sồr bè sền gàr tiah ơm kis. Ngan là geh cau mìng lơh wàng ròng gròn phan ròng, mờ ờ gŏ bơcri priă lơh ală anih bơsong dà phan tuh bơdìh bơh phan ròng dê.

Ală rơndap broă tŭ do ròng kờp jơh geh rlau 43 rơbô nơm, tăc gĭt nđờ jơ̆t tấn poăc mờ dà toh pah nam. Bulah bè hơ̆, pa mìng tă pơgồp ai kes priă càr Gia Lai dê 17 tơmàn đong, uă ngan là ală priă dia ơpah ù mờ ală bơnah priă ndai. Nàng bơsong ală bơta gam geh do, Ủy ƀan Ñân zân càr Gia Lai neh geh sră nggal sồr Sở Kế hoạc mờ Đầu tư pơgồp bal mờ ală Sở, ngàñ, ală tiah pơn jat tai bơto pơlam ală cau tờm bơcri priă lơh sir sră nggal jat jơnau sồr; lơh jat ală jơnau sồr bè sền gàr tiah ơm kis; sền wì wơl priă dia gơwèt mờ bàr pe rơndap broă lơh. Ồng Đinh Hữu Hoà- Phó Kwang atbồ drơng broă Sở Kế hoạc mờ Đầu tư càr Gia Lai pà gĭt: “Gơwèt mờ gah ròng phan, Sở Kế hoạc mờ Đầu tư dan mờ Ủy ƀan Ñân zân càr kơlôi sơnơng nền tàm broă gơ hòi gơ jà bơcri priă lơh rơndap broă lơh, mìng gơ hòi gơ jà ală rơndap broă lơh dờng, ròng phan ndơ̆p, ngui kông nghệ pa nàng gàr niam tiah ơm kis mờ ală rơndap broă lơh pơgồp bal mờ broă lơh gơlik ală phan bơna bơh ròng phan nàng gàr geh bơta kwơ; ờ hòi jà ală rơndap broă lơh dềt rah rài, kông nghệ yau”.

Bơta ròng phan lơh bơ̆ bơl tiah ơm kis ờ mìng geh tàm càr Gia Lai lơm mờ gam gơlik geh tàm uă tiah ndai tàm tiah Tây Nguyên dê. Mìng is tàm kơnhoàl Cư Jŭt, càr Dăk Nông geh 37 nơm wàng ròng sur dờng tơrgùm bal, broă lơh dờng. Tàm hơ̆, uă wàng ròng dờng tàm khà do lơh bơ̆ bơl tiah ơm kis, lơh gơrềng kơn jơ̆ ngan tus rài kis làng bol ơm kis gùt dar dê. Pơn rơ bè wàng ròng sur dờng bơh hìu bơnhă ồng Lê Văn Hùng, ơm tàm thôn Nam Tiến, xã Ea Pô, kơnhoàl Cư Jŭt geh 2 rơbô 400 nơm sur poăc. Tàm tŭ lơh broă, wàng ròng sur dờng neh tuh dà bơ̆ geh uă khà sồ sơr lèt mờ jơnau sồr tơl khà geh ai gơnoar. Den tàng, Ủy ƀan Ñân zân càr Dăk Nông neh ai tơlik jơnau lơh nền lơh glài wàng ròng sur ồng dê mờ kờp jơh khà priă 347 tơlak 500 rơbô đong. Bơdìh mờ broă lơh glài mờ priă, Ủy ƀan Ñân zân càr gam sồr ồng Hùng pal ơm broă lơh ală bơta broă bơt bơtàu, ơm broă lơh bơh wàng ròng sur dờng dê mờ ntrờn tus tiah di pal mờ rơndap ù tiah dê.