Bơta pal đơs là jơnau gơmù giă, hoàc hươr kung gam gơlik geh sùm, bulah tàm ù tiah càr dê geh uă hìu măy lơh gơlik phan bơh plai màk gam lơh broă mờ bă ù tam plai màk ờ hềt sơrlèt rlau ir mờ jơnau bơto sồr bơh gah lơh broă sa sươn sre dê.

Bi Lê Đình Tứ ơm tàm thôn 4, thị trấn Đăk Đoa, kơnhoàl Đăk Đoa, càr Gia Lai pa bơtê lơh kwèng mờ tờm plai màk nam sơnrờp, mờ priă bơcri mờr 100 tơlak đong, tàm bă ù sươn 300 tờm. Bi Tứ pin dờn đơs là, he lơh jăt gùng dà hữu kơ, plai màk geh bơta bơkah niam rơ̆p tăc geh giă jơnhoa rlau mờ giă tàm drà. Mơya, kàl pik plai màk dơ̆ sơnrờp, giă tăc kung mìng ơm tàm khà 4 rbô đong lơm tàm dùl kĭ. Dilah gơbàn bè do sùm den hìu bơnhă digơlan hoàc hươr ngan. Gơn kơnờm bơtàu tơnguh “plai màk sàng goh tăc giă jơnhoa” bè bi neh geh tŭ kơlôi, kal ke ngan gơlik gơs ngan ngồn. Bi Lê Đình Tứ, yal: Plai màk dum là pal tăc gơ ì. Dilah dum ờ tăc den gơ rung kung ờ gơtùi sơl. He săc rwah plai màk khà dùl nàng tăc kung kal ke sơl, khà lơh geh plai màk khà dùl là dùl êt ngan. Pa do, khi bơto pơlam lơh plai màk sàng goh mơya digơlan là kal ke ngan tài bơh pal lòt sền swì, sền swì den pal tơm 3 tơlak đong dùl dơ̆. Khi gàr priă he dê bơh 15 tus 20 tấn hơ̆ sồng tơm priă, den gĭt lơh bè lơi, giă tăc gơguh pơgăp 3 dơ̆ pơndrờm mờ plai màk pa pik.

Tŭ do, tàm càr Gia Lai geh tiah tam tờm plai màk rlau 5 rbô lồ geh tam bềng làm jơh 15 tàm 17 kơnhoàl, thị xã, ƀòn dờng; bal mờ 3 hìu măy lơh gơlik phan bơh plai màk dờng, geh pràn lơh gơlik phan kờp jơh gơguh tus gĭt nđờ rhiang rbô tấn pah nam. Bal mờ hơ̆, Gia Lai kung geh 20 anih ơn klơm phan mờ 19 tiah tam neh geh pà mã sồ. Mơya, jơh ală anih hơ̆ kung ờ gŏ jai kơryan geh jơnau ngai sơlơ gơmù giă bơh phan bơna plai màk dê. Ồng Lê Tấn Hùng, Phó Kwang ătbồ Cơldŭ Lơh broă sa mờ Bơtàu tơnguh ƀòn lơgar kơnhoàl Đăk Đoa, pà gĭt: Tŭ do 20% tàm khà 700 lồ plai màk tàm kơnhoàl neh lơh bal tăc mờ bàr pe mpồl lơh sa kă bro. Mơya mờ tàm tŭ ală cau lơh broă sa lơh bal kung ờ gŏ geh dờp giă niam sơl. Jơnau là tài bơh tơngai kĭ hơ là tŭ giă plai màk ơm tàm khà jơnhoa, cau lơh broă sa neh rwah ƀroă tăc jăt giă tàm drà.

Ồng Lê Tấn Hùng, đơs: Jơnau hơ đah mpồl lơh sa kă bro mờ hìu bơnhă làng bol bơh tŭ sră pơrgon bơh sơnrờp tơn, den lơh geh kung tăc giă hơ̆. Halà hơ blơi jăt giă drà kă bro, làng bol rwah tăc jăt giă drà kă bro. Ală hìu măy kung gam blơi sơl plai màk pa pik neh lơh bal jăt giă drà kă bro. Drà kă bro gơguh den blơi gơguh, tàm drà gơmù den blơi gơmù sơl.