Kpă Meo mùl geh deh tàm dùl hìu bơnhă rƀah tàm ƀòn Tung, xã Ia O, kơnhoàl Chư Prông. Tài rài kis kal ke den tàng bi mìng bơsram tus ơdŭ 9. Nam 2003, bi bau mờ sơn đờm lơh broă mờ 2 lồ ù mè bèp pà nàng tam ală bơta phan tam lơyah ngai mờ tam kơphe. Tus nam 2007, sền gŏ tờm kau su cèng wơl cồng nha lơh sa uă, bi bơcri 150 tơlak đông nàng tam tai 4 lồ kau su. Nam 2009, bi rề ơnàng tai 3 lồ ù tam kau su. Bulah bè hơ̆, uă nam do, tài kau su gơmù giă priă den tàng uă hìu bơnhă gơtìp kal ke tàm broă lơh sa. Bi Kpă Meo uă mang ngar àng tơn nàng jòi broă lơh pa hìu bơnhă in. Sền gŏ uă tiah neh ngui broă lơh chi sa plai mờ cèng wơl cồng nha uă, nam 2015, bi bơyai mờ pơ ùr blơi tau 4 lồ ù nàng tam ală bơta chi tam bè pơ nat thái, plai jràng, prìt, ƀơ, sầu riêng… tam bơrlŭ bal: “Bơh sơn rờp tam gơl tam chi sa plai añ kung gơtìp uă ngan kal ke. Tài ờ hềt geh mờng chài den tàng ờ gơtùi pleh bơta tờm chi sa plai gơtìp tu, phan kis lơh aniai. Broă đal git tờm chi gơtìp kòp tu sa aniai là dùl bơta kal ke ngan. Kung jòi git jơnau yal tàm sră pơ àr, iat rơdiô, bơsram bơh ală hìu bơnhă neh tam geh cồng nha den tàng suơn chi sa plai kung rơhời gơs niam mờ dong hìu bơnhă lơh geh priă jền uă. Lơh geh cồng nha bơh sơn rờp den tơnơ̆ do añ kung dong làng bol tàm ƀòn, ơruh pơnu đoàn viên tàm ƀòn in bè bơta chài tam phan nàng bơtàu tơnguh lơh sa hìu bơnhă”.

Nàng rềp mềr mờ broă lơh sa suơn sre, Kpă Meo neh pơn đơl bơsram, tus bal uă ơdŭ bơto pơlam ngui bơta chài kỹ thuật tàm ƀòn lơgar. Bi kung lòt uă tiah nàng jòi git, bơsram mờng chài hơ̆ sồng rê tơrgùm wơl jơnau git wă, ngui dipal mờ bơta geh ngan trồ tiah, ù tiah tàm ƀòn he dê. Bơsram ndang, lơh ndang, bi neh tus bal ală ơdŭ bơsram bơ tơl, Trung kấp Luật, Trung kâp Lý luận cíñ trị, gơ gơs Đảng viên. Tus tŭ do, bi neh geh tơn pồ at uă gơnoar broă, bè: Phó Ƀí thư Đoàn xã, Ƀí thư Đoàn xã Ia O mờ tŭ do là Củ tịc Ủy ƀan Mặt trận dà lơgar Việt Nam xã.

Uă nam là Ƀí thư Đoàn xã, bi Kpă Meo git ñchi bơh tài làng bol tàm ƀòn lơgar kung gam rƀah là tài bơh ờ hềt git ngui bơta jak chài kỹ thuật tàm broă lơh sa, kung gam tam mờ ròng phan jat bơhiàn bơh yau. Bè hơ̆ den tàng, Kpă Meo gam sùm tam pà bal ai ală đoàn viên, ơruh pơnu tàm xã in bè mờng chài lơh sa nàng ngui tàm bơta geh ngan, bal mờ gơp brồ guh lơh pas. Bi Siu Nhi, Phó Ƀí thư Đoàn xã Ia O pà git: “Tàm ală dơ̆ pơrjum tàm thôn ƀòn, bi Kpă Meo kung sùm tam pà mờng chài mờ ơruh pơnu, làng bol tàm ƀòn ală broă lơh bơtàu tơnguh lơh sa, nàng ơruh pơnu geh gùng dà sơn đờm mut lơh broă bè lơi gơ in geh cồng nha ngan rlau jơh”.

Hìu bơnhă bi Kpă Luyn, cau ơm ƀòn bal, kơnờm bơsram jat bi Kpă Meo mờ neh tam geh 3 sàu pơ nat, pơ ồs bơrlŭ bal nàng bơtàu tơnguh lơh sa hìu bơnhă. Bi Kpă Luyn pà git: “Bơh ală jơnau git wă he dê tàm bơtàu tơnguh lơh sa, bi Kpă Meo sùm tam pà bal mờ làng bol, dilah ờ git bơta lơi den bi geh jơh nùs pơlam nàng làng bol in git bơta chài tam ală bơta chi sa plai, lơh bè lơi lơh geh cồng nha niam ngan rlau jơh bơh ală bơta chi tam nàng bơtàu tơnguh lơh sa hìu bơnhă”.

Bơngă pin dờn geh lơh gơs bơh tŭ lơh broă đoàn, tŭ do là Củ tịc Mặt trận dà lơgar Việt Nam xã Ia O, bi Kpă Meo gam lơh niam ngan broă he dê. Ồng Ngô Văn Trường, Củ tịc Ủy ƀan Ñân zân xã Ia O đơs: mờ kơnòl broă geh jàu, Kpă Meo sùm bơyai lơh ală dơ̆ mblàng yal, hòi jà làng bol xã Ia O lơh jat di gùng dà bơh Đảng, dà lơgar dê, bi gam tus tơl hìu bơnhă hòi jà làng bol tryăng tryồng lơh broă, bơtàu tơnguh lơh sa, bañ iat jơnau bol ờ niam bơ chồt lơh aniai tus bơta tam klac tàm ƀòn lơgar. Ồng Ngô Văn Trường pà git: “Bè đah xã den kung đơs là bi Kpă Meo geh jơnau git wă niam ngan, git bè drà kă bro, git tam gơl ală broă lơh tàm bơtàu tơnguh lơh sa, mul màl là bè tam phan mờ ròng phan, priă lơh geh hìu bơnhă dê jơnhua ngan. Do là broă lơh krơh niam, ờ mìng gơ wèt mờ làng bol kòn cau ơm kis bơh jŏ tàm do, mờ 2, 3 hìu bơnhă cau yoan kung pal đòm jat nàng geh gùngd à tàm bơtàu tơnguh lơh sa”.