Jơnau yal tàm dơ̆ cribơyai pà gŏ, phan ngui nàng lơh phan tơn siam phan ròng lơh gơlik tàm lơgar tŭ do mìng lơh geh bơh 30% tus 35% pơndrờm mờ jơnau kờñ tàm tŭ priă tă blơi phan tơn siam phan ròng in jơh tus pơgăp bơh 65% tus 70% giă phan lơh gơs. Den tàng bè hơ̆, dilah ờ rơcăng lài tiah tam phan ngui nàng lơh gơlik phan tơn siam phan ròng in rơ̆p lơh gơrềng uă ngan tus giă phan lơh gơs phan bơna ròng phan, gơmù bơta pràn jak tàm pơrlòng bơh mpồl lơh sa kă bro dê....Ồng Nguyễn Quang Tin, Phó Kwang ătbồ Vụ Broă rơndăp lơh, Ƀộ Nông nghiệp mờ Phát triển Nông thôn sồr: Tơngời mờ bùm blàng ndrờm là sơntìl pa lơm mờ geh ală bơta chài tam digơlan lơh gơlik geh phan bơna tàm pơrlòng mờ ală bơta chi tam ndai, bulah bè hơ̆ pal geh kờp dŭ geh giă bơh phan bơna dê tŭ lơh gơlik. Dilah ai geh giă tàm pơrlòng bơh hơ̆ kĭ sră hơ mờ cau lơh broă sa mờ ƀòn lơgar.

Nàng bơtàu tơnguh ală priă jền tơngời mờ bùm blàng dê, tơngai lài, Tập đoàn De Heus, lơgar Hà Lan dê neh lòt sền tiah tam tàm 3 càr tàm tiah Tây Nguyên, là: Dăk Lăk, Gia Lai mờ Kon Tum. Bơh lòt sền pà gŏ, tơngời mờ bùm blàng gam uă tŭ niam nàng tơnguh tai ală priă jền tŭ tus bal tàm ală broă lơh gơlik phan tơn siam phan ròng in, tơrmù ƀà bơta kơn jơ̆ bơh phan ngui nàng lơh gơlik phan tơn siam phan ròng blơi bơh lơgar ndai. Tàm dơ̆ cribơyai, uă jơnau đơs tă pơgồp sồr pal geh bơta dong kờl gơhòi gơ jà mpồl lơh sa kă bro bơcri priă mờ bơto pơlam ală broă lơh bơta chài, ngui bơta jak chài măy mok tàm broă lơh sa tus cau lơh broă sa. Mơkung dong kờl lơh mờ bơtàu tơnguh ală hợp tak xã tơngời mờ bùm blàng nàng tơnguh uă cồng nha tăc bro drơng broă bơcri tàm broă lơh sa ai cau lơh broă sa in tàm tŭ lơh sa, ơn prăp, lơh gơlik phan nàng pờ ơnàng broă lơh, bơta niam mờ tơrmù giă lơh gơs phan bơna. Ồng Nguyễn Như Cường, Kwang ătbồ Kụk Tam phan đơs là: Tây Nguyên là tiah ƀươn nàng tam uă bàr pe bơta chi tam lơh phan sa ris, bè: tơngời, bùm blàng. Nàng tàm pơrlòng mờ ală bơta chi tam ndai tàm tiah do pal lơh bè lơi tơnguh uă geh cồng nha lơh sa. Kờñ lơh gơtùi geh tiah tam phan lơh gơlik phan tơn siam phan ròng in dờng lơh geh di broă lơh sa mờ măy mok pal lơh geh bơta lơh bal đah cau lơh broă sa, hợp tak xã bơh hơ̆ lơh bal mờ mpồl lơh sa kă bro lơh gơlik phan mờ tăc bro phan bơna.

Jăt tàm jơnau đơs nền ală bơta lòng tàm nam 2023, tàm dơ̆ cribơyai neh geh uă jơnau sồr sồr pal kờp sền ală bơta phan ròng geh bơta ƀươn nàng chồl tơnguh lơh sa; rơcăng lài phan ngui lơh gơlik phan tơn siam phan ròng in bal mờ broă pơgồp bal niam mờ mpồl lơh sa kă bro lam lơh ală broă lơh bal lơh gơlik phan tơn siam phan ròng in. Jăt ồng Dương Tất Thắng, Kwang ătbồ Kụk ròng phan, đơs: pal sơlơ gròi sền kòp bơtờp ngòt rơngơ̆t mờ gàr niam sàng goh phan sa. Mơkung geh ală bơta dong kờl gơhòi gơ jà bơta tus bal bơcri priă bơh mpồl lơh sa kă bro tàm lơgar mờ bơdìh lơgar dê tàm broă gơsơ̆t lơh puăc phan ròng, lơh gơlik phan drơng tăc mờ lơgar ndai mờ lơh gơlik phan tơn siam phan ròng in. Ồng Dương Tất Thắng, đơs: Bè phan tơn siam phan ròng phan ngui nàng lơh gơlik bơh sơnrờp, bè: tơngời, khô zờu khuah tương tàm lơgar rơ̆p mìng pa lơh geh bơh 30% tus 35%. Jăt jơnau sồr, Ƀộ, Kụk ròng phan pơgồp bal mờ ală anih tàm Ƀộ mờ lơh bal mờ bàr pe Tập đoàn lam lơh broă lơh lơh bal lơh gơlik phan tơn siam phan ròng in mờ phan ngui lơh gơlik phan tơn siam phan ròng in tàm ală càr tiah tàm gùl lơgar mờ Tây Nguyên. Bal mờ hơ̆, lơh broă mờ bàr pe tiah geh bơta ƀươn ndai nàng tam uă phan tam lơh gơlik phan tơn siam phan ròng, rơhời rơcăng lài phan tam ngui nàng lơh gơlik phan tơn siam phan ròng in, tơrmù ƀà bơta kơldìng kơnờm uă ir tàm phan blơi bơh lơgar ndai.

            Đơs sùm tàm dơ̆ pơrjum, Thứ trưởng Ƀộ Nông nghiệp mờ Phát triển Nông thôn, ồng Phùng Đức Tiến, đơs là: gơguh lơh sa bơh gah ròng phan dê geh bơta kwơ dờng màng ngan tàm gơguh lơh sa bal bơh gah lơh broă sa sươn sre dê, gàr tơl phan sa tăc ai cau ngui sa in tàm lơgar, dùl bơnah ai tăc mờ lơgar ndai in. Yal loh ală bơta ờ pràn jak bơh gah ròng phan dê ờ hềt geh uă phan bơna tăc mờ lơgar ndai, Thứ trưởng ồng Phùng Đức Tiến đơs sùm, gùng dà broă lơh drà kă bro ngan là bơta gơn kơnờm nàng tăc bơsong kal ke mờ gàr sùm gơguh lơh sa bơh gah ròng phan dê tàm tơngai tus. Ồng Phùng Đức Tiến, đơs: Dùl tàm ală jơnau kwơmàng là pal hòi jà kă bro, tă bơsong kal ke ală bơta kơryan bè bơta chài mờ rề ơnàng gehphan tăc tàm drà, drà kă bro tàm ală lơgar. Pin dờn dòn kơnờm ală mpồl lơh sa kă bro dê neh bơcri tàm lơh broă sa sươn sre, kwơmàng tàm gah ròng phan tơl pràn jak nàng lơh gơlik phan mờ lơh gơlik phan niam ngan tàm tơngai tơngai tus geh uă phan bơna lơh geh jơnau kờñ bơh drà kă bro dê, hơ̆ ngan là bơta gơn kơnờm mờ gùng dà broă lơh kwơmàng nàng “hoài jà” gơguh lơh sa gah ròng phan tàm tơngai tus. Gơwèt mờ drà kă bro tàm lơgar bal mờ 100 tơlak nă làng bol bè lơh gơlik phan mờ lơh gơlik phan niam uă tàm ală bơnah broă kung pal sền gròi sơl.           

Gơnoar broă bơh gah ròng phan dê là kwơmàng ngan tàm gơguh lơh sa bơh gah lơh broă sa mờ bơtàu tơnguh ƀòn lơgar dê nàng bơ̆t bơtàu gah ròng phan rơcăng is tàm tŭ tơngai mŭt gơrờm bal mờ lơgar ndai là dùl tàm ală gùng dà broă lơh là pal rơcăng lài geh phan tam ngui nàng lơh gơlik phan tơn siam phan ròng tàm lơgar in. Lơh tiah tam phan lơh gơlik phan tơn siam phan ròng in, kwơmàng ngan rlau jơh là drà tăc bro, Ƀộ rơ̆p sồr ală anih lơh broă gơwèt bal ai tơl ală ƀươn nàng mpồl lơh sa kă bro lơh gơs tiah tam phan ngui nàng lơh gơlik phan tơn siam phan ròng in, bơh hơ̆ dong làng bol lơh broă sa mờ hợp tak xã tiah lam lơh rơndăp broă lơh in geh dờp kwơ.