Ủy ƀan Thường vụ Quôk hội pa geh jơnau yal ngan ngồn bè broă lơh lùp mờ hơ jơnau lùp tàm Pơrjum dơ̆ 5, Quôk hội khoă XV. Kờp dŭ Quôk hội rơ̆p lơh dơ̆ lùp mờ hơ jơnau lùp bơh ngai 6 tus ngai 8 nhai 06 do, ală mpồl broă geh Quôk hội sac rơwah lùp là: Lao động, Thương ƀiñ mờ Xã hội; gùng lòt pơn diang phan; khoa họk mờ kông nghệ; jơi bơtiàn kòn cau.

Mpồl broă dơ̆ 1 gơwèt gah broă Lao động, Thương ƀiñ mờ Xã hội mờ Ƀộ trưởng ồng Đào Ngọc Dung rơ̆p là cau hơ tờm. Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh rơ̆p là cau geh hơ jơnau lùp pơn jat tai, mờ mpồl broă gơwèt gah broă jơi bơtiàn kòn cau. Mpồl broă dơ̆ 3 gơwèt gah khoa họk mờ kông nghệ mờ cau hơ tờm là Bộ trưởng Ƀộ Khoa họk mờ Kông nghệ ồng Huỳnh Thành Đạt. Ƀộ trưởng ồng Nguyễn Văn Thắng rơ̆p hơ jơnau lùp bè mpồl broă dơ̆ 4 gơwèt gah broă gùng lòt pơn diang phan. Kung tàm dơ̆ lùp mờ hơ jơnau lùp tàm pơrjum dơ̆ do, Phó Thủ tướng Cíñ phủ ồng Lê Minh Khái rơp lơh loh ală broă geh gơrềng mờ hơ jơnau lùp bơh kwang bàng Quôk hội dê. Tàm dơ̆ lùp mờ hơ jơnau lùp Phó Thủ tướng Cíñ phủ drơng broă mờ ală Ƀộ trưởng, kwang atbồ ngàñ rơ̆p tus bal hơ jơnau lùp, mblàng lơh loh bè ală broă geh gơrềng.