Nam 2010, Pơrjum dờng Tam klac Nghị viện dunia (IPU) dơ̆ 122 bơyai lơh tàm Bangkok, lơgar Thái Lan neh ring bal dùl Nghị quyết cèng bơta tam gơl pràn ngan bè “Bơta tus bal bơh ơruh pơnu dê tàm broă rơndap lơh làng bol lơh tờm”. Bơh nùs nhơm hơ̆, tàm nam 2013, IPU neh lơh Cribơyai Nghị sĩ kơnòm să, nàng cribơyai ală broă bơh ơruh pơnu dê, tơnguh pràn jak bơh ơruh pơnu dê mờ tơnguh gơnoar broă, bơngă pin dờn bơh ală kwang đơng lam bồ kơnòm să dê. Dùl nam tơnơ̆, IPU neh lơh broă lơh Pơrjum gùt plai ù pah nam mờ tus tŭ do neh lòt gan 8 dơ̆ pơrjum.

Nam 2014, Pơrjum Nghị sĩ kơnòm să gùt plai ù dơ̆ sơn rờp geh lơh tàm Geneva, lơgar Thụy Sĩ mờ tơngume “Bơta tus bal bơh cau kơnòm să dê tàm broă lơh cíñ trị mờ làng bol lơh tờm”, nàng kờñ jòi geh broă lơh pơn jờng bơta tus bal bơh cau kơnòm să dê mờ dong ai tơlik lài tơngume cribơyai bơh cau kơnòm să dê tàm gah cíñ trị.

Pơrjum dơ̆ 2 geh lơh tàm Tokyo, lơgar Nhờk nam 2015 mờ tơngume “Ring lơngai mờ bơtàu tơnguh”, là dùl bơnàng jă pràn kơldang ngan nàng sơlơ tơnguh bơta lơh bal đah ală cau lơh broă cíñ trị kơnòm să dê mờ gơ hòi gơ jà khi ai tơlik ală broă lơh pa mờ bơceh lơh bơh ơruh pơnu đơng lam bồ tài ală mpồl bơtiàn bơtàu tơnguh, ring lơngai, mut gơ rờm bal mờ lơngăp lơngai.

Nam 2016, pơrjum dơ̆ 3 geh lơh tàm Zambia, mờ tơngume “Broă lơh cribơyai nam 2030: Ơruh pơnu lam lài, ờ lời cau lơi gơtìp lời wơl hờ ngkời”. Pơrjum neh hơ pơrgon sơlơ tơnguh gơnoar broă kuơmàng bơh ơruh pơnu dê nàng lơh gơs ală Jơnau kờñ bơtàu tơnguh kơ̆ kơljap jŏ jòng sùm ai dùl rơnàng tơnơ̆ do in.

Pơrjum dơ̆ 4 geh lơh tàm lơgar Canada nam 2017, mờ tơngume “Nghị sĩ kơnòm să là bơta gơn kơnờm bơh mut gơ rờm bal dê”, tơrgùm tàm 3 tơngume gơ rềng tus: bơta tus bal cíñ trị bơh ơruh pơnu dê; ntrờn tiah ơm kis mờ mut gơ rờm bal mờ mpồl bơtiàn; mờ gơguh lơh sa tơl làm. Bơh bơta git gơp lơh broă bal uă, Pơrjum neh gơ hòi gơ jà ală nghị sĩ kơnòm să bè ală broă rơndap lơh nàng kờñ sơlơ tơnguh bơta mut gơ rờm bal.

Nam 2018, pơrjum dơ̆ 5 geh lơh tàm lơgar Azerbaijan mờ tơngume “Lơh geh bơta kơ̆ kơljap, sền gàr bơta kuơ bơh ală rơnàng tơnơ̆ do dê”, cèng tus tŭ niam tam pà jơnau bơceh lơh mờ jơnau git wă mờng chài lơh broă nàng kờñ sền gàr bơta bơtàu tơnguh mờ gơboh gơbài bơh ală rơnàng tơnơ̆ do dê.

Nam 2019, pơrjum dơ̆ 6 geh lơh tàm Paragoay mờ tơngume “Lơh geh ală jơnau kờñ bơtàu tơnguh kơ̆ kơljap jŏ jòng sùm mờ jàu gơnoar ai ơruh pơnu in bơh broă dong kờl mpồl bơtiàn”, nàng kờñ jòi geh ală broă lơh tus bal pa, sền sơ wì broă jàu gơnoar ai ơruh pơnu in bơh bơta sền sơ wì gơboh gơbài- dùl bơta sơn đờm gơtùi dong sơlơ tơnguh mhar tơngai lơh broă nàng kờñ lơh jat ală Jơnau kờñ bơtàu tơnguh kơ̆ kơljap jŏ jòng sùm.

Nam 2021, tài kòp Kovid-19, pơrjum dơ̆ 7 geh lơh mờ broă lơh pờ tơlik tơn tàm internet mờ tơngume “Broă tus bal bơh ơruh pơnu dê tơnơ̆ kòp Kovid-19” nàng kờñ sền sơ wì gơnoar broă bơh ơruh pơnu dê tàm ală bơta pơn đơl pràn lơh ngan bơtàu tơnguh wơl tơnơ̆ kòp dờng; ai tơlik jơnau pơlam bè broă lơh kơ̆ kơljap ală hìu bơsram, lơh geh uă ngan rlau jơh broă lơh ai ơruh pơnu in mờ tam gơl ală broă drơng ala lơh sơnơm tàm tơl tiah.

Pơrjum dơ̆ 8 geh bơyai lơh tàm ƀòn dờng Sharm El-Sheikh kềng gah dà lềng Pơr hê bơh lơgar Ai Cập dê mờ broă sơlơ tơnguh bơta tus bal bơh ơruh pơnu dê tàm broă rơcang sơndră mờ tam gơl trồ tiah.

Tơngai lài, Quôk hội Việt Nam neh jơh nùs tus bal ală broă lơh tàm Tam klac Nghị viện dunia, tàm hơ̆ geh ală dơ̆ Pơrjum Nghị sĩ kơnòm să gùt plai ù. Mpồl Việt Nam neh rơcang lài, jơh nùs tus bal, tam pà jơnau yal tơnggit, mờng chài, gùng dà, broă lơh bơh Việt Nam dê gơ rềng tus ală broă cribơyai tàm pơrjum; mờ kung ai tơlik ală jơnau đơs mùl màl nàng kờñ sơlơ tơnguh gơnoar broă bơh ală nghị sĩ kơnòm să dê tàm broă bơsong ală broă gùt plai ù.

Broă Quôk hội Việt Nam bơyai lơh Pơrjum Nghị sĩ kơnòm să gùt plai ù dơ̆ 9 pơn jat tai ai gŏ bơta tus bal jơh nùs, geh kơnòl, rơcang lài bơh Việt nam dê tàm IPU; mờ kung ai gŏ bơta sền gròi bơh Việt Nam dê gơ wèt mờ ơruh pơnu mờ ală broă bal gùt plai ù bơh cau kơnòm să dê tŭ do. Ồng Martin Chungong, Kwang gơnoar cih Tam klac Nghị viện dunia (IPU) đơs nền: “Añ đơs ngan là, Pơrjum Nghị sĩ kơnòm să gùt plai ù dơ̆ 9 rơp dong ală nghị sĩ kơnòm să đơs is mờ ală nghị viện đơs bal tam gơl pràn kơldang rlau nàng lam lơh jat ngan ngồn ală jơnau kờñ bơtàu tơnguh kơ̆ kơljap jŏ jòng sùm. Bol hi đơs niam bơta lơh bal niam ngan bơh Quôk hội Việt Nam dê mờ Mpồl gơnoar cih dà lơgar bơh Việt Nam dê nàng bơyai lơh geh cồng nha pơrjum. Việt Nam neh đơng lam geh cồng nha uă pơrjum dunia. Bol hi chờ hờp ngan geh rê wơl Hà Nội nàng tus bal Pơrjum Nghị sĩ kơnòm să gùt plai ù dơ̆ 9”.

Pơrjum dơ̆ do gam pơgồp bơnah sơlơ tơnguh ală bơta kuơ bơh Việt Nam dê bơh gah Nghị viện, lơh jat jơnau kờñ bơtàu tơnguh mờ gùng dà bơtàu tơnguh tàm tŭ tơngai pa, tàm hơ̆ geh tam gơl sồ, tam gơl pa, bơceh lơh, bơtàu tơnguh kơ̆ kơljap jŏ jòng sùm; mblàng yal, yal tơnggit làm uă tus mờ gơp bơyô dunia bè bơhiàn niam chài, dà lơgar, kòn bơnus, broă lơh mờ lơgar ndai mờ cồng nha broă lơh bơtàu tơnguh lơh sa- mpồl bơtiàn bơh Việt Nam dê; sơlơ tơnguh bơta git gơp cribơyai broă mờ lơgar ndai đah Việt Nam mờ uă mpồl, lơgar lơh broă bal kuơmàng, ngan là ală nghị sĩ, là rơnàng đơng lam bồ kơnòm să dà lơgar dê.