Hìu bơsram kâp 1 thị trấn Khe Tre ơm tàm tiah tàm gùl kơnhoàl Nam Đông dê, tềng hờ đap hìu bơsram geh gùng càr 14C lòt gan, khà rơndeh rơndồ lòt rê pah ngai uă. Tàm tŭ jơ kơnòm bơsram lik klờng sùm pơhìn gơlik geh tàm tơm. Bơta pal đơs là uă mè bèp lòt rò kòn ờ ndau sơ gơn gàr bồ, pơndiang 2, pơndiang 3, geh tŭ pơndiang 4 lơh gơs rùp hin ờ niam ngan gơ wèt mờ kơnòm bơsram, lơh gơ rềng tus broă lơh bơto bơtê lơh jat adat boh lam đơs bal mờ Adat lơngăp lơngai lòt rê tàm gùng đơs is bơh hìu bơsram dê tus ală oh. Kờp bơh tŭ lam lơh broă lơh “Mpồng hìu bơsram lơngăp lơngai lòt rê tàm gùng”, bơh bồ nam bơsram tơn, hìu bơsram neh jàu cau pơgru atbồ ală ơdŭ in lam lơh kĭ jơnau hơ pơrgon lơngăp lơngai lòt rê tàm gùng tus jơh gùt mè bèp kơnòm bơsram mờ geh 100% mè bèp kĭ mờ lơh jat. Hìu bơsram sùm pơgồp bal mờ Mpồl kảñ sát gùng lòt- Kwang àng kơnhoàl Nam Đông nàng mblàng yal bè lơngăp lơngai lòt rê tàm gùng ală oh in. Oh Nguyễn An, kơnòm bơsram ơdŭ 4/5 Hìu bơsram kâp 1 thị trấn Khe Tre, kơnhoàl Nam Đông, càr Thừa Thiên Huế pà git: “Tŭ bol he lòt tàm gùng den bol he bañ đì rơndeh sèng 3, sèng 4, pơndiang uă cau mờ bañ đì rat, đì rơlac rơliang”.

Gơtùi gŏ là, tŭ do kà kơnòm bơsram đì rơndeh măi đèng, rơndeh coh đèng tŭ lòt bơsram ngai sơlơ uă. Kwang àng kơnhoàl Nam Đông, càr Thừa Thiên Huế pà git, tơngai lài, tŭ lòt sền neh git gŏ mờ lơh glài uă ơruh pơnu, kơnòm pa tàu lơh tìs rơndap tap sèng lơngăp lơngai lòt rê tàm gùng. Nàng tơrmù ƀà bơta do, bơdìh mờ bơta lơh ngan lơh bal bơh ală anih lơh broă geh gơnoar dê tàm broă mblàng yal, hòi jà den kờñ pal geh bơta tàm pơgồp bal yal tơnggit jơnau pơgồp bal jơh nùs đah hìu bơsram, hìu bơnhă mờ mpồl bơtiàn. Tàm hơ̆, jơnau git wă bơh ală oh mờ gơnoar broă bơh hìu bơnhă dê là dờng màng ngan. Oh Cao Ngọc Phương Dung, kơnòm bơsram ơdŭ 12B2 hìu bơsram kâp 3 Nam Đông pà git: “Jat oh den nàng lòt rê tàm gùng lơngăp lơngai den bol he pal ndau sơ gơn gàr bồ di mờ jơnau sồr. Tŭ đì rơndeh den bañ sap sèng tàm gùng, pơndiang uă ir, bañ sơrlèt gan đèng pơrhê, bañ lòt sơlơ̆u gùng mờ bañ đì mhar, khat bè sơrlèt rơndeh ndai”.

Nàng kờñ sền gàr lơngăp lơngai, tơrmù ƀà jơnau pơhìn rềs àr gùng lòt tàm tiah kơh bơnơm Nam Đông den broă tơnguh jơnau git wă lơh jat bơh ală kơnòm bơsram dê là bơta kuơmàng ngan. Kwang àng kơnhoàl Nam Đông neh pơgồp bal mờ Gah bơto bơsram tơrgùm sơlơ tơnguh broă lơh mblàng yal, bơto bơtê adat gùng lòt ù gờl, bơto bơta chài lòt rê tàm gùng tàm 17 hìu bơsram kâp 2, kâp 3 tàm ù tiah kơnhoàl mờ mờr 5 rbô 700 nă pơgru, kơnòm bơsram tus bal. Mờ kung bơyai lơh kĭ jơnau hơ pơrgon lơh jat adat gùng lòt ù gờl đah hìu bơsram mờ hìu bơnhă mờ kơnòm bơsram, mờ khà kĭ hơ pơrgon geh 100%. Bơdìh hơ̆ tai, gah kwang àng kung lơh ală mpồl sền gàr rơndap tap sèng ring lơngai nàng gàr lơngăp lơngai lòt rê tàm gùng tàm ală mpồng hìu bơsram tàm tŭ jơ lik klờng, gàr bơta rơndap tap sèng ring niam, lam lơh uă broă lơh “Mpồng hìu bơsram lơngăp lơngai lòt rê tàm gùng” tàm 30 hìu bơsram sơnĕ.

Trung tá ồng Nguyễn Tiến Dũng, Kwang atbồ Mpồl bơt bơtàu srơh sền gàr lơngăp lơngai atbô is kơnhoàl Nam Đông pà git, đơs dùl êt, ƀuơn kah, ƀuơn uă, ngan là geh bơta lơh bal đah cau mblàng mờ ală kơnòm bơsram. Tơl kâp bơsram geh dùl broă lơh tam pà dipal là broă lơh pa mờ lơh gơlik bơta gơ kờñ, gơ hòi gơ jà bơta gròi sền bơh ală kơnòm bơsram dê tàm khà ală dơ̆ mblàng yal, bơto bơtê bè jơnau git wă mờ bơta chài lòt rê tàm gùng lơngăp lơngai, sồr kơnòm bơsram lơh jat ală kơrnuat lòt rê tàm gùng: “Mpồl mblàng yal adat boh lam bơh kwang àng kơnhoàl dê neh tus tàm ală hìu bơsram. Do là ală hìu bơsram geh 17 hìu bơsram sơnĕ kâp 2, kâp 3 mờ kâp 1 nàng bơto bơtê, mblàng yal, pơlam lơh jat adat gùng lòt ù gờl, bơta chài lòt rê tàm gùng lơngăp lơngai. Bè adat rơcang sơndră tam lah tam lơh tàm hìu bơsram kung bè rơcang sơndră bơta aniai bơh ma túy dê tus pơgru bal mờ ală kơnòm bơsram kung bè mè bèp nàng git mờ lơh jat jơh nùs”.

Tơngai tus, Mpồl kảñ sát gùng lòt, Kwang àng kơnhoàl Nam Đông, càr Thừa Thiên Huế pơn jat tai pơgồp bal mờ ală hìu bơsram tàm kơnhoàl sơlơ tơnguh tai broă lơh mblàng yal, bơto bơtê bè lơngăp lơngai lòt rê tàm gùng ai kơnòm bơsram in, bơh hơ̆ dong ală oh git loh gơnoar broă, kơnòl he dê tŭ lòt rê tàm gùng; tơnguh jơnau git wă lơh jat Adat gùng lòt ù gờl nàng gàr lơngăp lơngai màng kis ai să tờm mờ tơl nă cau in.