Ƀòn Mlốc B, xã Krông Jing, kơnhoàl M’Drăk, càr Dăk Lăk geh 160 hìu bơnhă bal mờ rlau 500 nă làng bol, jơh ală là cau Rơđê lơm. Nam 2022, jơh dùl ƀòn geh mờr 100 hìu bơnhă rƀah den tŭ do khà hìu bơnhă rƀah gơmù gam mìng 80 hìu lơm. Rài kis phan bơna mờ nùs nhơm bơh làng bol tàm ƀòn dê neh geh uă tam gơl rlau mờ lài. Lơh geh cồng nha do là kơnờm Đảng ủy, Gơnoar ătbồ, Mpồl cau neh lam lơh dùl ròt bal ală broă lơh tàm tŭ lơh jăt ală gùng dà broă lơh bơh Đảng mờ Dà lơgar dê. Ngan là bơh 3 broă lơh jơnau kờñ dà lơgar: Bơ̆t bơtàu ƀòn lơgar pa, tơrmù rƀah kơ̆ kơl jăp; bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm. Mò H’Hương H’Wing, Ƀí thư Ci ƀộ ƀòn Mlốc B, pà gĭt: Ală anih lơh broă cíñ trị bè kwang ătbồ ƀòn, ală gah sơnah lơh broă mpồl cau bơh ƀòn dê tơrgùm tàm kơrnoăt đơng lam sồr lơh bơh ci ƀộ dê là jơh nùs jơh tồr ngan, rềp mềl mờ làng bol, bơto pơlam làng bol bơtàu tơnguh lơh sa, gĭt broă ngui bơta jak chài măy mok tàm broă ròng kơnrồ, ròng sur hơ̆ sồng gĭt geh broă gơlik geh tàm ƀòn tơl tơngai kàl bơh hơ̆ mblàng yal làng bol tàm ƀòn in.

Xã Ea Sol, kơnhoàl Ea Hleo geh 12 thôn mờ 7 ƀòn, 13 jơi bơtiàn ơm kis bal. Mŭt tàm broă bơ̆t bơtàu ƀòn lơgar pa bơh nam 2011, mờ bơta geh bơh sơnrờp kal ke ngan bè jơh ală bơta, ngan là bè phan bơna gùng lòt ƀòn lơgar ờ hềt lơh geh di mờ jơnau kờñ bơtàu tơnguh lơh sa- mpồl bơtiàn, tàm tŭ priă tă bơcri bơh kes priă dà lơgar dê dùl êt lơm. Tềng đăp bơta geh ngan hơ̆, Đảng ủy, Gơnoar ătbồ xã Ea Sol neh lơh pràn broă lơh mblàng yal, lơh geh bơta ring bal bơh làng bol dê tàm bơta dùl nùs bal, tàm sơm băt tê bal bơ̆t bơtàu ƀòn lơgar pa. Hòi tơrgùm jơh ală bơta pràn bơcri priă jăt tàm nùs nhơm tă pơgồp is bơh làng bol dê. Ồng Ksor Ygư, Phó Ƀí thư Đảng ủy, Củ tịc Ủy ƀan Ñân zân xã Ea Sol, kơnhoàl Ea Hleo, pà gĭt: Xã lam lơh srơh tàm pơrlòng bơ̆t bơtàu ƀòn lơgar pa đah thôn ƀòn do mờ thôn ƀòn ne. Bơh lam lơh, muh mat xã dê geh uă ngan tam gơl bè phan bơna, ngan là gùng càr 15 pa do geh lơh niam wơl, lơh ơnàng hơ̆ sồng ală sơnĕ gùng xã rê hờ ƀòn sền bal bơcri priă lơh jơh.

Kung bè uă tiah geh gal làng bol jơi bơtiàn dùl êt nă cau ndai ơm kis bơh càr Dăk Lăk dê sơl, lài do xã Yang Tao, kơnhoàl Lăk geh khà hìu bơnhă rƀah uă, jơh dùl xã geh rlau 2 rbô 500 hìu den cau jơi bơtiàn dùl êt nă cau ơm kis bơh jŏ dùl bă tiah geh tus 96%. Nàng dong làng bol klàs bơh rƀah bal mờ bơta sền gròi uă bơta bơh Đảng mờ Dà lơgar dê, kơnhoàl Lăk neh lời uă priă jền bơcri ai xã Yang Tao in bơtàu tơnguh lơh sa- mpồl bơtiàn. Tus tŭ do, gơtùi gŏ bơta tam gơl mpờl gŏ loh làng tàm tơl hìu bơnhă bơh làng bol tàm tiah do dê. Mò H’Loan Uông, Phó Ƀí thư, Củ tịc Ủy ƀan Ñân zân xã Yang Tao, kơnhoàl Lăk, chờ hờp yal: Tàm ù tiah xã Yang Tao geh bơta tam gơl loh làng ngan. Broă tam gơl rơndăp tăp sèng chi tam phan ròng lài do geh uă hìu bơnhă làng bol ờ gŏ sền gròi tus broă ròng phan geh bal ròng rơpu, ròng kơnrồ, phan puan jơng, iar ada mơya tus tŭ do là hìu bơnhă lơi kung geh bơta tam gơl tàm ròng phan. Hìu lơi kung geh kơnrồ, ờ geh kơnrồ den ròng iar ada.

Jăt Kơrnoăt Pơrjum dờng Đảng ƀộ càr Dăk Lăk tơngai lơh broă bơh nam 2020- 2025, pah nam, gơmù bơh 1 tus 2% hìu rƀah. Hìu bơnhă rƀah tàm tiah làng bol jơi bơtiàn dùl êt nă cau gơmù bơh 3 tus 4%. Hìu bơnhă rƀah tàm ală kơnhoàl rƀah gơmù bơh 4 tus 5%. Nàng lơh geh jơnau kờñ neh ai, tàm pơrjum sền wơl bơh sơnrờp gùl tơngai lơh broă lơh jăt Kơrnoăt Pơrjum dờng Đảng ƀộ càr Dăk Lăk pa do, Ủy viên Đảng Dà lơgar, Ƀí thư Tỉñ ủy càr Dăk Lăk ồng Nguyễn Đình Trung, đơs sùm: Pơn jăt tai sồr tơnguh uă rlau tai kơnòl broă bơh ală kâp ủy đảng, kơlôi sơnơng jrô, lơh jăt niam ală gùng dà broă lơh mờ jơnau sồr bơh Đảng, adăt boh lam bơh Dà lơgar dê bè bơtàu tơnguh lơh sa- mpồl bơtiàn mhar mờ kơ̆ kơl jăp. Ai lài ai priă jền lơh jăt bơh rơndăp broă lơh, broă dong kờl gơ wèt mờ tiah làng bol jơi bơtiàn dùl êt nă cau, tiah sar lơgar ngài, tiah nhàr lơgar nàng kờñ lơh jăt geh cồng nha ală jơnau kờñ, broă jàu, kơnòl broă mờ Kơrnoăt Pơrjum dờng cau ala măt Đảng ƀộ càr Dăk Lăk khoă XVII neh sồr lơh.

Càr Dăk Lăk kung gam lơh pràn lơh jăt ală broă lơh jơnau kờñ dà lơgar tơrmù rƀah kơ̆ kơl jăp, ală broă dong kờl tơrmù rƀah, bè: càn priă ờ sa priă cồng uă, dong kờl bơto pơlam lơh broă sa sươn sre, brê bơnơm, ròng uă phan tàm dà, bơsram broă lơh, lơh sơnơm, bơto bơtê. Sền gròi rlau tai tus broă lơh kwang bàng tiah jơi bơtiàn dùl êt nă cau. Bơtàu tơnguh mpồl cau lơh broă là cau jơi bơtiàn dùl êt nă cau lơh geh jơnau kờñ kơnòl broă tàm bơta tŭ do.