Tàm sàh Ea Bung, mò Nguyễn Thị Đinh – pơ ùr cau ling kòp tê jê să ồng Nguyễn Huy Nuôi dê ngoh rơngac ngan tŭ geh Củ tịc Anih duh broă Làng bol càr Dăk Lăk bal mờ mpồl lơh broă tus lùp còp, pà phan. Mò Đinh yal, lài do tài rài kis kal ke, bơklau mò dê geh sền gròi tàm anih ròng siam cau geh màng mờ dà lơgar. 15 nam do, hìu bơnhă lam ồng rê nàng ròng tàm hìu mờ sùm dờp geh bơta sền gròi bơh ală kâp dê: “Bơh càr, sàh, thôn pah nam tus ală ngai chờ, ngai sa tềp, ală mpồl cau ndrờm sền gròi wil tơl, ram nùs ngan. Kơnờm Đảng, Dà lơgar hơ̆ sồng ală anih lơh broă, mpồl bal dong kờl, mờ bơta kal ke añ dê den añ gŏ niam ngan, neh tơrmù ƀà kal ke hìu bơnhă in”.

Tàm sàh Ea Knốp, ồng Nguyễn Ái Quế, cau ling sồt să khà 3/4 geh dong kờl 110 tơlak đong nàng lơh hìu pa ơnàng 50 thơk vuông. Ồng neh geh tŭ tam lơh tàm Quân khu 5, gơtìp sồt să kơn jơ̆ tàm Quảng Nam nam 1973. Nam 1985, ồng lam hìu bơnhă mut tàm Dăk Lăk nàng lơh broă lơh sa tàm bơta gam uă kal ke: “Lài do lơh geh hìu ndàp kung neh kal ke ngan, tŭ do dà lơgar sền gròi dong kờl bè do là chờ hờp ngan. Ưn ngài kwang đơng lam bồ ală kâp neh sền gròi bè do, añ chờ hờp ngan. Làng bol tàm ƀòn tus nggôi kung niam rlau”.

Tàm sàh Quảng Phú, ồng Ngô Văn Tường gam bal mờ mpồl cau lơh hìu lơh mờr gơs hìu pa kờp priă 150 tơlak đong, tàm hơ̆ dà lơgar dong kờl 110 tơlak đong. Pơ ùr ồng dê mò Võ Thị Nghĩa là cau geh màng mờ dà lơgar, neh geh tŭ gơtìp kup krơ̆ tàm hìu jàm Buôn Ma Thuột nam 1973 tài dong kờl phe, phan sa, phàt sră cih jơnau yal, yal jơnau tơnggit cau ling in: “Geh hìu kơ̆ kơljap bè do den ùr bơklau añ iang nùs ngan nàng lòt lơh broă, jòi geh tai priă jền drơng rài kis bàr nă ùr bơklau dê in”.

Jat Jơnau lơh nền sồ 131 nam 2021 mờ Jơnau lơh nền sồ 21 nam 2024 bơh Cíñ phủ dê, càr Dăk Lăk neh lơh gơs broă dong kờl 593 hìu bơnhă cau geh màng mờ dà lơgar lơh niam wơl mờ lơh pa hìu ơm (142 hìu bơnhă lơh pa, 451 hìu bơnhă lơh niam wơl). Di dơ̆ do, càr Dăk Lăk neh bơyai lơh ală broă lơh chu ñàng, chu jrềng kah ưn ngài tàm ƀlàng tơp ƀồc cau chơt màng kâp càr, kâp sàh; jàu phan dong kờl bơh mpồl bơtiàn dê; bơyai lơh ai cau geh màng mờ dà lơgar in lòt sền, tìp mat tàm Hà Nội.

Ồng Lê Đức Tịnh, Phó Kwang lam bồ Sờh Broă dơlam is càr Dăk Lăk pà git, càr kung lam lơh srơh kis git jơnau git adat làm uă nàng sền gròi niam rlau tai gơ wèt mờ Cau ling sồt să, hìu bơnhă cau chơt màng mờ cau geh màng mờ dà lơgar: “Sờh Broă dơlam is tă pơgồp jơnau đơs càr in, pơn jat tai lơh pràn srơh “Jơh gùt làng bol sền gròi ală hìu bơnhă cau ling sồt să, cau chơt màng mờ cau geh màng mờ dà lơgar”, gàr bơta ngan ngồn, làm uă, geh cồng nha; hòi jà bơta tus bal bơh ală kâp, ală gah broă lơh mờ jơh gùt mpồl bơtiàn dê tàm broă bơt bơtàu mờ bơtàu tơnguh Kes priă kis git jơnau git adat. Sùm sền gròi, git bơta kơp kờñ bơh cau geh màng mờ dà lơgar dê, dan mờ kâp ủy, gơnoar atbồ ală kâp di tŭ bơsong ală broă geh gơ rềng, gàr gơnoar kuơ bơh cau geh màng mờ dà lơgar dê”.

Lài hơ̆, Mpồl cau ala mat Quôk hội càr Dăk Lăk neh bơyai lơh broă lơh rê hờ tơngu rơyas tàm Tiah tềl kah yau dà lơgar gơ wèt sàh Đồng Xuân – do là tiah crơng gơs Ci ƀộ Đảng Kộng sản sơn rờp bơh càr Phú Yên yau mờ Tiah tam lơh kac màng H9, ƀòn Dăk Tuôr, sàh Cư Pui, càr Dăk Lăk. Tàm do, ală cau ala mat mờ làng bol neh geh iat ală jơnau tam pà ngoh rơngac ngan bơh ală cau sền gŏ kah yau, kah wơl ală jơnau kir sơnrai ờ gơtùi huĭ bè ală nam nhai tam lơh bòl glar tàm tiah tam lơh kac màng H9 – ù tiah ndu gơn rơh, tiah tềl lời wơl bơh bơta kơ̆ dơn, khin cha jak chài bơh ling klàng mờ làng bol he dê. Mò Nguyễn Thị Thu Nguyệt – Phó lam bồ mpồl, drơng broă Mpồl cau ala mat Quôk hội càr Dăk Lăk đơs sùm: “Di dơ̆ rê hờ tơngu rơyas tàm gùng pơrhê do neh dong ală cau ala mat Quôk hội, tơl kwang bàng, cau lơh broă sa priă nhai dà lơgar, cau lơh broă mờ làng bol geh tŭ kah wơl bơhiàn bơh yau mờ git rlau tai bè bơta tă pơgồp bơh bèp ồng he dê tàm ù tiah bềng bơhiàn kac màng do. Bơh hơ̆, tơl nă cau sơlơ git bơta phi să dờng màng, tơnguh tai nùs nhơm kờñ gơboh dà lơgar, ƀòn lơgar. Do kung là bơta gơn kơnờm nàng jơh gùt kwang bàng, làng bol pơn jat tai lơh ngan tă pơgồp bơt bơtàu càr he dê ngai sơlơ bơtàu tơnguh”.

Mpồl cau ala mat Quôk hội càr Dăk Lăk bal mờ ală cau dong kờl neh jàu 30 nơm rơndeh coh, àu mpha pa ai kơnòm bơsram geh rài kis kal ke in, 236 bơnah phan pà tus hìu bơnhă dờp bơta dong kờl mpồl bơtiàn dê, làng bol jơi bơtiàn dồ êt nă cau, cau geh bơngă pin dờn mờ jàu broă lơh ƀlàng coh plai, hìu nùs nhơm ai càr in. Broă sền gròi cau geh màng mờ dà lơgar in tàm càr Dăk Lăk ờ mìng là kơnòl mờ gam là tềl tơnggŏ niam ngan bơh nùs nhơm Hùc dà kah tô dà dê, pơgồp bơnah lơh kơ̆ mpồl tam klac dờng jơh gùt làng bol.