Jăt jơnau yal bơh Sở Kế hoạc mờ Đầu tư càr Dăk Nông yal, kờp tus tŭ do, gùt càr mìng rơ̆p tăc bơcri geh 1 rơbô 350 tơmàn đong priă bơcri bơh dà lơgar dê, geh 34,5% broă rơndăp lơh geh ai, ờ uă rơlao 7% pơn drờm mờ tŭ do nam lài. Gơkòl tàm broă tơm ntrờn ù tiah, gơkòl bè broă rơndăp lơh phan geh is tàm ù drơng tàm broă tờ nàng bơ̆t, cò pơn ring, mờ tàm bơrlŭ bal broă rơndăp lơh ù tiah bauxite là ală bơta tờm lơh broă tă bơcri priă dà lơgar tàm càr Dăk Nông geh ờ uă. Tàm hơ̆ lơh gơrềng uă ngan là tài gơkòl broă rơndăp ù tiah lơh bauxite.

Ồng Trần Đình Ninh, Kwang atbồ Sở Kế hoạc mờ Đầu tư càr Dăk Nông pà git, geh uă bơta gơtìp gơkòl bè broă rơndăp lơh ù tiah mờ ală kơrnoăt gơrềng bal lơh uă broă lơh gơtìp gơkòl. Càr neh uă dơ̆ dan mờ dà lơgar bơsong ală kal ke, gơkòl gơrềng tus mờ broă rơndăp lơh bô xít mơya tus tŭ do kung gam ờ hềt geh bơsong jơh, broă tă bơcri priă dà lơgar nam do càr dê kal ke ngan gơtùi lơh gơs.