Bàr pe nam lài, hìu bơnhă ồng BNướch Ngang ơm tàm mpồl làng bol tiah drà A Duông, thị trấn Prao, kơnhoàl tiah kơh bơnơm Đông Giang, càr Quảng Nam gơ wèt hìu bơnhă rƀah. Pah ngai, ồng BNướch Ngang lòt mbrê tam ală tờm chi, bè: bùm blàng, prìt sơkò, điều...rài kis gam uă kal ke. Tơnơ̆ hơ̆, ồng BNươch Ngang geh gah Lơh broă sa sươn sre càr Quảng Nam mờ gơnoar ătbồ kơnhoàl Đông Giang dong kờl sơntìl chi tam lơh sa sươn mờ brê. Tŭ do, ồng BNướch Ngang geh 4 lồ tờm kơnuh sơnơm ƀa kíc dum phồng, 5 lồ chi keo mờ chi dổi, chi quế. Bơdìh hơ̆ tai, ồng gam pơgồp bal mờ ròng phan, be, sur jù..., pah nam lơh geh priă cồng bơh 150 tơlak đong tus 200 tơlak đong.

Ồng BNướch Ngang là dùl nă đảng viên sùm lam lài tàm jơh ală srơh. Ồng tŭ do là Kwang ătbồ Mpồl làng bol tiah drà A Duông, thị trấn Prao, kơnhoàl Đông Giang. Ồng lời uă tŭ jiơ tus tìp măt, tơm boh bơr mờ pơlam làng bol kòn cau Cơ Tu bơtàu tơnguh lơh sa. Cau lơi kal ke, kờñ geh dong kờl sơntìl chi tam, ồng BNướch Ngang ndrờm geh lơm nùs nhơm dong kờl. Ồng BNướch Ngang, đơs: He là đảng viên pal lơh krơh ai jơh tơl nă làng bol tàm thôn he dê in. Broă lơh sa bơh añ dê geh cồng nha uă ngan làng bol gam bơsram mờ lơh jăt. Pah dơ̆ pơrjum thôn mờ sùm bơto pơlam làng bol bè broă chài tam ală bơta chi tam mờ sền gàr chi tam, ròng siam phan. Kơ̆p kờñ gơnoar ătbồ tiah do pơn jăt tai dong kờl ai ală hìu geh ù lơh sa in bè sơntìl chi tam, dong khi geh broă lơh mờ lơh geh priă jền sùm.

Ồng BNướch Ngang sùm mblàng yal, hòi jà làng bol bơ̆t bơtàu rài kis niam chài pa, sang tĕ adat bơhian bơngơl gơla ờ geh kwơ tàm rài kis. Ồng A Lăng Minh, kòn cau Cơ Tu ơm tàm thị trấn Prao yal, lài do hìu bơnhă ồng dê là hìu bơnhă rƀah, geh ồng BNướch Ngang tus tơn tàm hìu bơto pơlam broă chài lơh sa, ròng phan mờ tam phan den tàng tŭ do rài kis neh ờ huan đau kal ke. Ồng A Lăng Minh, đơs: Đảng viên ồng BNướch Ngang lòt lài bơtàu tơnguh lơh sa tàm ƀòn lơgar. Bơdìh hơ̆ tai gam bơto pơlam làng bol in broă chài ròng siam phan ròng bè tam kơnuh sơnơm ƀa kíc dum phồng den tàng rài kis làng bol dê tơl ngui tơl sa brồ guh lik klàs bơh rƀah.

Uă đảng viên gam kơnòm să tàm tiah kơh bơnơm kơnhoàl Đông Giang, càr Quảng Nam neh yờ tơnguh nùs nhơm lam lài, khin kơlôi, khin lơh, brồ guh lik klàs bơh rƀah. Đảng viên kơnòm să bi A Ting Nấu ơm tàm thị trấn Prao, kơnhoàl Đông Giang kung là dùl nă cau pơnrơ sơl. Tŭ do, bi A Ting Nấu neh lơh wàng ròng sur jù, ròng iar ada, tờ tơnau ròng ka mờ tam uă tờm chi sa plai, bè: sầu riêng, chi lòn ƀon...

Ồng Nguyễn Hữu Sanh, Kwang ătbồ Mpồl Cau lơh broă sa kơnhoàl Đông Giang, càr Quảng Nam, pà gĭt: uă ngan ală đảng viên tàm tiah do ndrờm tơngŏ geh gơnoar broă lam lài lơh krơh tàm lơh broă lơh sa, bơtàu tơnguh lơh sa. Neh geh ală kơh pơnrơ lơh sa jak bè ồng BNướch Ngang, A Ting Nấu...Khi tơngŏ loh nùs nhơm “đảng viên lòt lài, làng bol ƀòn lơgar lòt jăt tơnơ̆”, là cau tờm lơh gơlik bơta pràn lơh gơrề pràn kơldang tàm srơh bơtàu tơnguh lơh sa, tơn jơh jơgloh tơrmù rƀah. Ồng Nguyễn Hữu Sanh, Kwang ătbồ Mpồl Cau lơh broă sa kơnhoàl Đông Giang, đơs: Đảng viên lam lài tàm broă bơtàu tơnguh lơh sa. Kwơmàng là đảng viên là cau tàm mpồl cau lơh broă sa sùm lơh krơh lam lơh jăt ală broă lơh sa, kwơmàng broă bơtàu tơnguh lơh sa sươn, lơh sa sươn dờng, lơh gơs ală sươn lam lơh lài geh priă jền lơh sa dong ai làng bol lơh broă sa in brồ guh lơh pas mờ lik klàs bơh rƀah dồ bă kơ̆ kơl jăp.

Pah nam, Mpồl Cau lơh broă sa càr Quảng Nam pơgồp bal mờ ală gah, ală tiah, dong kờl 1 rbô 500 nă đảng viên là cau tàm Mpồl Cau lơh broă sa geh càn priă mờ priă cồng dồ êt, ai pà chi sơntìl, phan ròng dong ală đảng viên bơtàu tơnguh lơh sa. Ồng Hồ Quang Bửu, Phó Củ tịc Ủy ƀan Ñân zân càr Quảng Nam pà gĭt: uă đảng viên ờ mìng lơh sa jak mờ gam jơh nùs dong kờl uă làng bol rài kis kal ke gĭt gùng lòt sa, tơnguh uă priă lơh geh, tơl ngui tơl sa tàm rài kis, pơgồp bơnah bơ̆t bơtàu ƀòn lơgar pa. Ồng Hồ Quang Bửu, đơs: Tŭ do, bàr pe nă Đảng viên tàm ală kơnhoàl tiah kơh bơnơm khi bơtàu tơnguh lơh sa niam ngan, khi tus bal tàm broă lơh sa pràn ngan mờ lơh krơh lam lài ai làng bol in đòm jăt. Mùl màl là khi tam kơnuh sơnơm mờ tờm chi lơh sơnơm cèng wơl cồng nha lơh sa uă ngan. Dilah tàm tiah kơh bơnơm geh uă Đảng viên lơh krơh bè do den rài kis làng bol dê geh tam gơl uă ngan.