Pa do, tàm càr Dăk Nông neh geh lơh Cribơyai Lơh bal lơh gơlik mờ tăc phan lơh geh bơh sươn sre bal mờ bơta tus bal bơh rlau 30 mpồl lơh sa kă bro tus bơh ƀòn dờng Hồ Chí Minh bal mờ mờr 200 nă cau ala măt ală mpồl lơh sa kă bro, hợp tak xã, cau lơh broă sa bơh càr Dăk Nông dê. Tàm dơ̆ cribơyai, ală mpồl lơh sa kă bro tus bơh ƀòn dờng Hồ Chí Minh bal mờ ală mpồl lơh sa kă bro, hợp tak xã, cau lơh broă sa tàm càr Dăk Nông neh cribơyai song dơ pă ală broă bè lơh broă bal lơh bal lơh gơlik mờ tăc bro phan bơna mờ bơta kơ̆p kờñ bơh ală gah dê. Ồng Nguyễn Văn Mười, Kwang ătbồ anih lơh broă tiah đah jum gơ wèt Mpồl cau lơh sươn Việt Nam, pà gĭt: Gơrềng tus ală jơnau kờñ ngan ngồn bơh tơl mpồl lơh sa kă bro dê den bol hi neh tơrgùm jơh wơl mờ pơyua tus Mpồl Cau lơh broă sa càr in mờ rơ̆p pơyua ală hợp tak xã in. Bè đah ală hợp tak xã den bol hi kung sồr mpồl cau lơh broă sa tơrgùm jơh wơl ală jơnau yal bơh ală hợp tak xã dê bè pràn jak bơh he dê, hơ̆ là hợp tak xã geh ală bơta lơi mờ bol he kờñ pal lơh bal lơh broă bal bè lơi.

Đơs tàm dơ̆ cribơyai, ồng Hồ Văn Mười, Củ tịc Ủy ƀan Ñân zân càr Dăk Nông đơs nền, lơh broă sa sươn sre măy mok pa là dùl tàm 3 broă tờm bơtàu tơnguh lơh sa bơh càr dê. Mờ ală bơta ƀươn bè ù tiah, dà ia mờ nhơm trồ tiah...càr geh jơnau tơl pràn uă ngan bơtàu tơnguh lơh broă sa sươn sre gơ jăt bal mờ lòt nhơl ơm rlô pràn să...Càr hòi jà mờ tŭ lơi kung kờñ ai tơl ală bơta dong kờl nàng ală mpồl lơh sa kă bro in tus mờ càr Dăk Nông. Ồng Hồ Văn Mười, đơs: Ai jơnau bơsram mờng chài bơh cribơyai do den nam tơnơ̆ bol he rơ̆p lơh jăt broă lơh dờng, dờng rlau den añ kơlôi là lơh geh cồng nha rơ̆p uă ngan. Bulah bè hơ̆, bơh cribơyai do añ gơn kơnờm rơ̆p geh bơta gơrề uă bè phan lơh geh bơh sươn sre Tây Nguyên dê đơs bal mờ Dăk Nông dê đơs is tus mờ cau ngui sa, lơh bè lơi nàng phan lơh geh bơh sươn sre lòt tus di anih, di bơta niam mờ giă dipal, ngan là dong ai cau lơh broă sa in geh tŭ niam pơn jăt tai lơh uă phan lơh geh bơh sươn sre he dê; lơh bè lơi bañ geh jơnau lơh geh uă mơya ờ geh giă mờ sơlơ̆u wơl, bañ pal ngui jơnau dong kờl ƀà.

Tơngai lài, gah kă bro mờ lơh sa mờ măy mok sùm tơrgùm lơh pràn ală broă lơh hòi jà kă bro nàng kờñ tàm tơn tìp đah anih lơh gơlik phan mờ jơnau kờñ blơi phan bơna ai làng bol in, tàm hơ̆ geh làng bol jơi bơtiàn dùl êt nă cau tiah kơh bơnơm tiah sar lơgar ngài. Ƀộ Kông thương neh bal mờ ală tiah sùm lơh ngan nàng phan bơna geh yal tơngĭt uă làm tus ală drà mờ geh cau blơi phan lòt blơi. Bình Phước là càr geh ù tiah gơdờp, geh bơta brê bơnơm geh is ƀươn nàng tam uă điều mờ geh sền là tiah tờm tam điều tŭ geh tus mờ 50% bă điều mờ rlau 54% khà điều lơh geh bơh jơh gùt lơgar dê. Mò Thân Thị Xiêm, Kwang ătbồ Kông ty Trăc ñiệm Hữu hạn Dùl nă să An Thuận Phát, pà gĭt: Bol hi neh lòt bal mờ làng bol càr Bình Phước dê, bơh làng bol dùl êt nă cau tus làng bol kòn cau S’tiêng, den bol hi neh geh tŭ lòt bal uă nam sùm là hơ pơrgon mờ làng bol tŭ mờ kàl mìu tus, ală kal ke bơh làng bol dê den bol hi tam pà bal mờ tŭ geh tơnhàu den bol hi bal mờ làng bol àñ ơnòng bal kơnòl do, nàng ai điều rê tus hìu măy prăp lài phan, di anih bơh Bình Phước dê nàng lơh geh broă lơh broă sa ai làng bol in tơnơ̆ ală ngai mìu mờ tơnơ̆ ală ngai tơnhàu, tài làng bol bơh ù tiah Bình Phước dê mìng geh điều là phan lơh geh priă tờm.       

Lơh jăt broă rơndăp lơh lơh bal tam, lơh gơlik phan mờ tăc bro phan lơh geh bơh sươn sre, càr Lâm Đồng neh lơh mờ bơtàu tơnguh geh gĭt nđờ rhiang anih lơh bal, mờ mờr 16 rbô hìu tam phan mờ pơgăp 2 rbô 500 hìu ròng phan. Ală anih lơh bal lơh sa do geh lơh tàm bă ù ơnàng rlau 30 rbô lồ chi tam ală bơta mờ mpồl phan ròng pơgăp 850 rbô nơm.

Ồng Nguyễn Văn Châu, Phó Kwang ătbồ Sở Nông nghiệp mờ Phát triển Nông thôn càr Lâm Đồng pà gĭt, broă rơndăp lơh do geh priă tă lơh kờp jơh pơgăp 270 tơmàn đong. Jơnau kờñ geh ai tơlik là tus lồi nam 2023, jơh gùt càr geh 200 anih lơh bal tam mờ tăc phan lơh geh bơh sươn sre, mờ 30% khà phan lơh geh bơh sươn sre tờm ngan rơ̆p geh tăc bơh sră pơrgon. Ồng Nguyễn Văn Châu, đơs: Ală phan bơna lơh gơlik jăt ală anih lơh bal geh sùm bè drà tăc, tơnguh uă priă jền, lơh geh bè bơta niam sàng goh phan sa tài bơh lơh jăt ală broă pơlam lơh sa dùl ròt bal lơh geh jơnau sồr bơh drà kă bro dê. Bulah bè hơ̆, khà phan lơh geh bơh sươn sre bơh càr Lâm Đồng dê ngai sơlơ bơtàu tơnguh den jơnau kờñ tăc bro kơ̆ kơl jăp bơh ală anih lơh bal lơh sa kung gam uă ngan sơl, tàm tŭ kes priă dà lơgar den ờ huan geh uă. Den tàng bè hơ̆, tàm broă rơndăp lơh rơndăp tăp sèng wơl gah lơh broă sa sươn sre tơngai bơh nam 2022- 2025 pa geh càr kĭ den kung ai dùl bơnah priă sơl nàng pơn jăt tai rề ơnàng mờ bơtàu tơnguh tai ală anih lơh bal lơh sa pa.