Rơndap broă rơndap ù tiah sap sèng ƀòn ơm kis tàm xã Đăk Long, kơnhoàl Đăk Hà, càr Kon Tum geh lam lơh bơh lồi nam 2009 geh bơta pràn drơng gàr kơ̆ kơljap rài kis ai mờr 300 hìu bơnhă làng bol bal mờ 1 rbô 500 nă cau in. Bulah bè hơ̆ tus tŭ do tơnơ̆ mờr 14 nam hơ̆ sồng geh 84 hìu bơnhă làng bol ơm kis tàm ƀòn do mờ 42 hìu bơnhă bulah neh dờp ù ơm, ù lơh sa mơya ờ tus ơm kis tàm do. Jơnau geh pà git là tài broă rơndap ù tiah, rơ wah anih lơh ƀòn ơm kis ờ dipal; ờ tơl dà ngui sa, ờ tơl ù lơh sa, broă dong kờl làng bol gàr kơ̆ kơljap rài kis ờ hềt geh sền gròi dipal. Ồng Nguyễn Minh Vương, Phó Củ tịc Ủy ƀan Ñân zân kơnhoàl Đăk Hà pà git, broă bơsong ală bơta ờ niam tàm ƀòn ơm kis do gơtìp uă ngan kal ke mờ geh tơngume kòl yan tài ală tam gơl bơh Adat Ù tiah dê.