Mò Hà Ánh Phượng, mpồl kwang bàng càr Phú Thọ pà git, jơnau bơto bơsram 3 kâp nam 2018 pơn jat tai bơtàu tơnguh geh cồng nha, lơh jat ală jơnau sồr bơh Nghị quyết sồ 88 Quôk hội dê neh ait ơlik. Bulah bè hơ̆, mò Hà Ánh Phượng gam kơlôi rơcang gơ wèt mờ jơnau rơcang cih dơ̆ 2 bơh Thông tư cih rơ wah sră măi tàm hìu bơsram 3 kâp. Jat hơ̆, tơl hìu bơsram lơh 1 mpồl duh broă rơ wah sră măi. Jơnau cih bè do gam uă bơta ờ niam: “Lài ngan, uă hìu bơsram mùl màl mìng geh bơh 1 tus 2 nă cau pơgru bơh dùl môn bơsram dê. Tàm tŭ hơ̆, khà bơta sră măi là uă ir. Do là dùl broă bòl glar mờ  bơta dipal den ờ hềt uă tài pràn jak bơh pơgru dê ờ hềt ndrờm bal. Dơ̆ 2 là jat añ den bơta do rơp lơh gơbàn kal ke tàm broă tac halà bơto pơlam pơgru ngui sră măi, ngan là lơh gơbàn kal ke kơnòm bơsram in tŭ pal bơsram wơl halà ntrờn hìu bơsram”.

Jat ồng Trần Văn Sáu, mpồl kwang bàng càr Đồng Tháp đơs, Nghị quyết sồ 88 đơs loh, Ƀộ Giáo zụk mờ Đào tạo bơyai lơh cih gơs dùl ƀộ sră măi. Ƀộ sră măi do geh sền sơ wì, ring bal ndrờm bal mờ ală ƀộ sră măi bơh mpồl bal, cau dùl nă să cih gơs. Đơs loh Nghị quyết sồ 88 geh ai tơlik nam 2014, tus nam 2020 hơ̆ sồng geh Nghị quyết sồ 122, ồng Trần Văn Sáu lùp là tàm 6 nam, ñchi bơh tài Ƀộ Giáo zụk mờ Đào tạo ờ lam lơh jat Nghị quyết do. Tàm tŭ hơ̆ den tuh jơh broă cih gơs sră măi mờ broă lơh tă pơgồp bơh mpồl bơtiàn, bơh hơ̆ lơh gơbàn bơta ờ lơh nền kơ̆ giă sră măi, giă sră măi gơguh jơnhua ờ gơtùi gròi sền: “Đảng hòi jà mpồl bơtiàn tă pơgồp gròi sền ai bơto bơsram in, mơya dà lơgar pal at gơnoar broă lơh tờm tàm gah bơto bơsram. Bañ lơh bơta tă pơgồp mpồl bơtiàn dê gơ gơs broă tac bro sră măi. Mùl màl ai gŏ, tàm gah lơi tŭ mờ mpồl bơtiàn neh tă pơgồp den ndrờm gơmù giă lơm, mơya mìng is gơ wèt mờ sră măi den sơlơ geh bơta tă pơgồp mpồl bơtiàn dê den giă sră măi sơlơ gơguh kas. Do là dùl bơta sơ lơ̆u wơl ờ geh cơng tàng lơi nàng hơ pơrgon là sră măi pơn jat tai ờ gơguh giă”.

Ƀộ trưởng Ƀộ Giáo zụk mờ Đào tạo ồng Nguyễn Kim Sơn mblàng lơh loh: “Ală kwang bàng sền gròi bè broă Nghị quyết bơh mpồl jat sền dê là jàu ai Ƀộ Giáo zụk mờ Đàp tạo in yal Quôk hội broă rơndap lơh geh gơ rềng tus broă cih gơs dùl ƀộ sră măi. Bol hi sơnơng là bơh tŭ do tus nam 2024, broă kuơmàng ngan rlau jơh pal lơh lài là sền sơ wì bơta niam bơh ală sră măi ơdŭ 5, ơdŭ 9 mờ ơdŭ 12 gơ in niam, gàr tơl sră măi lài mờ nam bơsram pa, ai broă geh jàu den bol hi rơp lơh ngan tàm 2 nam tus, tŭ broă tam gơl pa sră măi geh lơh sir den rơp geh jơnau sền sơ wì uă rlau mờ ai tơlik broă rơndap lơh Quôk hội in tơnơ̆”.

Hìu pơrjum Quôk hội kung duh hồl mờ ală jơnau đơs tàm pơndang gơ rềng tus gah lơh sơnơm. Ală kwang bàng đơs loh, tàm tơngai lài kung gam bơta broă lơyài tac sơnơm. Bè broă rơ wah cau tac, blơi sơnơm tơmba bulah neh geh tam gơl mơya broă tac bro phan ngui dùl dơ̆ tàm gah lơh sơnơm den kal ke ngan. Bơta kal ke ngan rlau jơh tŭ do là ờ gơtùi blơi phan geh bơta niam mờ bơtàu tơnguh bơta chài măi mok pa. Bơta làng bol gơbàn kòp ung thư ngai sơlơ gơguh uă. Ồng Nguyễn Tri Thức, Mpồl kwang bàng ƀòn dờng Hồ Chí Minh geh jơnau đơs: “Añ dan Quôk hội, Cíñ phủ sền gròi lơh 2 anih tờm xạ trị proton tàm Hà Nội mờ ƀòn dờng Hồ Chí Minh nàng làng bol Việt Nam gơtùi ngui mờ geh dờp ală bơta chài măi mok pa ngan rlau jơh dunia dê. Bol he geh dùl bơta ƀuơn ngan, ală ƀák sĩ gam lơh broă tàm gah xạ trị tàm Hà Nội mờ ƀòn dờng Hồ Chí Minh gơtùi ngui măi mok do tơnơ̆ 6 nhai geh bơto bơtê tàm lơgar ndai”.

Đơs mblàng lơh loh, Ƀộ trưởng Ƀộ Y tế mò Đào Hồng Lan pà git, jơnau tờm ngan là tài mpồl tac phan hoạt cất tàm dunia ờ huan geh, giă tac tam gơl tàm gùt plai ù… Ƀộ gam lơh ngan geh ală broă lơh nàng bơsong ală bơta ờ niam bè ờ tơl sơnơm tơmba, măi mok, phan lơh sơnơm tàm uă anih lơh sơnơm. Geh ală gùng dà broă lơh, broă dong kờl gơ wèt mờ ală kòl yan tàm tŭ lam lơh jat. Bè broă lơh tàm tơngai tus, Ƀộ trưởng mò Đào Hồng Lan pà git, rơp pơgồp bal mờ ală tiah, ală anih lơh sơnơm nàng kờp sền ală kòl yan gơ rềng tus broă gàr tơl sơnơm, măi mok, phan lơh sơnơm nàng bơsong jat gơnăp gơnoar.