Tơnơ̆ 3 nhai ơm rlô bơkang, rcang mut tàm nam bơsram pa 2023- 2024, sau Y Dũng, kòn cau M’nông, ơm tàm ƀòn Sar Pa, xã Thuận An, kơnhoàl Dăk Song den cèng jăt bal sră giáo khoa, sră cih, phan ngui bơsram sră mờ ào mpha mut tàm Pôs đồng ling sền gàr tiah nhàr lơgar mpồng tiah nhàr lơgar Thuận An. Sau Y Dũng là kòn ròng bơh pôs đồng ling sền gàr tiah nhàr lơgar dê neh 4 nam mờ geh kwang bàng, cau ling tàm pôs đồng jơh nùs ròng siam ai bơsram sră. Rcang ai nam bơsram pa, Y Dũng geh kwang bàng, cau ling Pôs đồng ling sền gàr tiah nhàr lơgar mpồng tiah nhàr lơgar Thuận An bơsram wơl jơnau bơsram ơdŭ 5 mờ rcang bàr pe jơnau bơsram pa nàng pin dờn mut bơsram ơdŭ 6. Mờ bơta dong kờl bơh ală bèp ròng ling geh grăt tơlir bal mờ bơta pơnđơl pràn is, lơh ngan is, bơh dùl nă kơnòm bơsram jak di mơ, tŭ do Y Dũng bơsram jak uă rlau mờ sùm geh sră jờng rơ kơnòm bơsram jak ngan tàm 4 nam do: “Kờp tus tŭ do, sau geh ơm mờ ală wa mpồl ling sền gàr tiah nhàr lơgar neh 4 nam. Tàm 4 nam do ală wa ai kòn in sào sa mờ bơsram tơl làm, bơto kòn pah ngai nàng kòn in gơ gơs cau dờng niam. Kòn rơ̆p pơnđơl pràn lơh ngan bơsram sră jak ngan nàng ờ lơh muăt jrùm nùs nhơm ală wa mpồl ling sền gàr tiah nhàr lơgar dê”.

Kung neh geh ală bơta bơsram jak uă ngan tơnơ̆ tŭ geh dờp lơh kòn ròng bơh Pôs đồng ling sền gàr tiah nhàr dê, sau Nông Tiến Mạnh, kơnòm bơsram ơdŭ 4A, Hìu bơsram kấp dùl Nguyễn Du, xã Dăk Wil, kơnhoàl Cư Jút, càr Dăk Nông, đơs: “Hìu bơnhă kòn dê geh rài kis kal ke ngan, bèp gơtìp kòp kơn jơ̆, ờ jai lơh broă kơn jơ̆, tơl ală bơta ndrờm tơrgùm jơh tàm pơnì mè kòn dê lơm. Tŭ kơno jơnau kòn geh ală wa tàm Pôs đồng ling sền gàr tiah nhàr Nậm Na dờp ròng, mè bèp kòn chờ hờp ngan tài rơ̆p geh cau sền gròi rcang kòn in tiah sào sa, bơsram sră, dong kờl hìu bơnhă kòn. Ơm tàm pôs đồng ling sền gàr tiah nhàr lơgar bal mờ ală wa pôs đồng ling sền gàr tiah nhàr lơgar là hìu ơm dơ̆ 2 bơh kòn dê. Lài mờ tŭ mut ơm mờ ală wa, kòn ết đơs ngan, bơsram kung mìng ơm tàm khà jak di mơ lơm. Tŭ geh dờp lơh kòn ròng mờ geh bơta sền gròi, dong kờl ròng siam, pơndờm pơnđiang, kòn neh pin dờn, chờ hờp, kis gơ rờm bal rlau uă ngan, cồng nha bơsram sră 2 nam do kòn dê sùm geh bơsram jak lơm”.

Ồng Điểu Plơu, Phó Củ tịc Ủy ƀan Ñân zân xã tiah nhàr lơgar Quảng Trực, kơnhoàl Tuy Đức, càr Dăk Nông pà gĭt, ală broă lơh “Kòn ròng Pôs đồng ling sền gàr tiah nhàr lơgar, “Dong kờl oh lòt bơsram” bơh mpồl ling sền gàr tiah nhàr lơgar dê neh dong kờl ngan ngồn ngan ai ală kơnòm bơsram geh rài kis kal ke geh ală bơta nàng lòt bơsram. Ală bơta dong kờl kwơ màng jơh bal bè phan bơna mờ nùs nhơm neh dong uă kơnòm bơsram bơsram sră sơlơ jak, tam pà bal dùl bơnah kal ke tàm broă lơh bơto bơtê ai xã tiah nhàr lơgar, tiah sar lơgar ngài in: “Xã Quảng Trực là dùl xã tiah nhàr lơgar, tiah sar lơgar ngài, tiah jơi bơtiàn dùl ết nă cau. Gah đơng lam mpồl ling sền gàr tiah nhàr lơgar neh sền gròi, dong kờl xã in uă ngan, ngan là ală sau geh dong kờl lòt bơsram là ală kơnòm hìu bơnhă rƀah, rài kis kal ke ngan, kòn đời mè mờ bèp, mpồl ling sền gàr tiah nhàr lơgar pơgồp bal mờ gơnoar atbồ xã là di pal ngan. Gơnoar atbồ xã chờ hờp ngan”.

Mờ jơnau đơs “jàu akhar, ai geh bơta kơ̆p kơnờm” nam 2016, Gah đơng lam mpồl ling sền gàr tiah nhàr lơgar càr Dăk Nông lam lơh broă lơh “Dong kờl oh lòt bơsram”. Nam 2019, mpồl ling sền gàr tiah nhàr lơgar càr Dăk Nông pơn jat tai lam lơh broă lơh “Kòn ròng Pôs đồng ling sền gàr tiah nhàr lơgar”. Tus nam bơsram 2022-2023, mpồl ling lam lơh tai rơndăp broă lơh “kwang bàng, cau ling Mpồl ling klàng dong kờl oh lòt bơsram”.

Đại tá ồng Bùi Đức Chính, Phó Cíñ ủy Mpồl ling sền gàr tiah nhàr lơgar càr Dăk Nông pà gĭt, tus tŭ do, neh geh 222 nă kơnòm bơsram ơm tàm 7 xã tiah nhàr lơgar bơh càr Dăk Nông dê mờ 12 nă kơnòm bơsram bơh càr Mondulkiri, lơgar Campuchia geh mpồl ling sền gàr tiah nhàr lơgar càr Dăk Nông dong kờl lòt bơsram. Kờp jơh priă jền dong kờl ală sau geh rài kis kal ke là mờr 4 tơmàn 500 tơlak đong, bơh priă tă pơgồp bal bơh gùt mpồl ling sền gàr tiah nhàr lơgar càr Dăk Nông dê. Mờ bơta dong kờl bơh kwang bàng, cau ling sền gàr tiah nhàr lơgar dê, ală sau neh pơnđơl pràn lơh ngan sùm nàng sơr lèt gan ală bơta kal ke, sươ̆i siar bè phan bơna bal mờ nùs nhơm nàng gơ gơs kòn gơ lòng sồr, kơnòm bơsram jak. Uă sau bơh kơnòm bơsram jak dimơ mờ jak đau neh brồ guh nàng gơ gơs kơnòm bơsram jak mờ jak ngan.

Đại tá ồng Bùi Đức Chính, đơs: “Broă lơh “Dong kờl oh lòt bơsram- Kòn ròng Pôs đồng ling sền gàr tiah nhàr lơgar” mờ Rơndăp broă lơh “Kwang bàng cau ling mpồl ling klàng dong kờl oh lòt bơsram” đơs nền bơta niam chài kòn bơnus uă ngan, nùs nhơm tam klăc bal poăc mhàm đah kwang bàng, cau ling mpồl ling sền gàr tiah nhàr lơgar mờ làng bol ală jơi bơtiàn tàm tiah nhàr lơgar dê. Mờ bơh broă lơh do neh bơto bơtê ai tơl nă kwang bàng, cau ling mpồl ling sền gàr tiah nhàr lơgar in sùm tơnguh uă bơta gĭt wă tam klăc bal ling klàng làng bol, bơt bơtàu nùs nhơm ling klàng làng bol tam klăc bal poăc mhàm mờ làng bol ală jơi bơtiàn tàm tiah nhàr lơgar dê, pơgồp bơnah lơh àng sơrdah rlau tai nùs nhơm mờ bơhiàn “Cau ling Wa Hồ dê”, “Cau ling geh grăt tơlir” tàm tơngai pa”.

Tơnơ̆ 7 nam, ală broă lơh “Dong kờl oh lòt bơsram”, “Kòn ròng pôs đồng ling sền gàr tiah nhàr lơgar” bơh mpồl ling sền gàr tiah nhàr lơgar neh dong ai uă kơnòm bơsram tàm tiah nhàr lơgar càr Dăk Nông in geh ală bơta tus hìu bơsram nàng bơsram sră mờ brồ guh. Rùp hin ală cau ling geh grăt tơlir ngai sơlơ kwơ màng ngan gơwèt mờ tiah nhàr lơgar gam uă kal ke in.