Ală kwang bàng đơs, tàm tŭ tơngai tiah geh dà ngai sơlơ ờ tơl, ờ gơtùi drơng tơl jơnau kờñ bơtàu tơnguh lơh sa- mpồl bơtiàn den broă Jơnau rơcang cih Adat sền gàr phan kuơ dà (tam gơl) lơh wơl, lơh mpờl loh làng ală kơrnuat pal jat bal, ai lài tàm broă atbồ phan kuơ dà, bơ tơl cau pal yal, lơh sră dan bè phan kuơ dà tàm ù là dipal. Mò Lê Thị Ngọc Linh, mpồl kwang bàng càr Bạc Liêu mblàng lơh loh: “Tŭ do, bơta tơnhàu, ngui dà tàm ù bu ba ngan ờ jat broă rơndap lơh digơlan lơh gơmù soat dà, lơh ƀơ̆ dà tàm ù. Tàm sèng 2, Bơta 52 Jơnau rơcang cih adat cih bè ngui dà tàm ù bơh hìu bơnhă dê nàng ngui ai jơnau kờñ ngui sa bơh he dê pal cih yal. Bơh khà kờp cih yal den anih atbồ rơp geh ală jơnau pơlam di tŭ ală bơta bè tiah geh dà khi gam ngui geh ală broă lơh sền gàr dipal”.

Đơs tus tiah geh dà ngui sa, ală kwang bàng sồr pal cih loh làng bol broă rơndap lơh sền gàr gơ wèt mờ ală broă lơh ai pà dà ngui sa. Tài bơta niam tiah geh dà ngui sa geh gơ rềng tơn tus pràn kơldang să jan làng bol dê. Mò Huỳnh Thị Phúc geh jơnau đơs: “Tàm 2, 3 bơta mùl màl tài jơnau kờñ pal geh bơh dà ngui sa dê làng bol gơguh uă, pơn yơu bè tàm bơta trồ tiah prang dờng, trồ tiah tơngai duh jŏ jòng den jơnau kờñ ngui dà sơrlèt rlau mờ khà dà geh ai ngui. Añ sồr mpồl cih adat boh lam kơlôi sơnơng bơ tơl tai ală jơnau cih bè khà geh ai, khà geh ngui nàng gơtùi rơcang lài tàm ală bơta nisơna bơh trồ tiah dê mờ bơh tàm ngan ngồn rài lơh sa, kă bro kung bè drơng rài kis bơh làng bol dê in”.

Jơnau rơcang cih Adat tŭ do mìng cih jơnau rơcang lài tam pà ring ngui ală tiah geh dà, tàm tŭ tŭ do jơnau pơhìn trồ tiah ro kơnrañ, ờ tơl dà ngui sa digơlan gơlik geh pah nam, jat mò Nguyễn Thị Thu Thủy, Mpồl kwang bàng càr Bình Định đơs, pal geh jơnau rơcang lài tơngkah lài bơh gờñ nàng git: “Mpồl rơcang cih pal cih 2 nam 1 dơ̆ lơh ală jơnau rơcang lài sơndră mờ ală bơta dà drơng broă ai pà dà tiah drà in tàm bơta tam gơl trồ tiah. Ală jơnau rơcang lài ai ală tiah drà gơtìp rơ rềng tài bơh dà hang mut aniai mờ ală bơta gơ rềng ờ niam ndai tài bơh tam gơl trồ tiah lơh gơbàn; gròi sền nền nòn broă tuh tơlik phan ƀơ̆ tàm dà nàng lơh niam dà ai tiah drà in bơh ală bơta aniai bơh broă tuh tơlik phan ƀơ̆ tiah lơh sa mờ măi mok bồ tô, ală jơnau pơhìn gơbàn ƀơ̆ bơh ală càr, ƀòn dờng ờm bồ tô dà dờng; kơlôi sơnơng lơh ală jơnau rơcang lài bơta aniai tàm tiah geh dà dilah gơlik geh bơta ờ tơl dà”.

Đơs bơta geh ngan tàm ală tiah ờ hềt lơh măi gròi sền phan kuơ dà tàm ù tiah ƀòn lơgar, yal tơnggit jơnau, khà kờp sền sơ wì phan kuơ dà gam rah rài, mò Vương Thị Hương, Mpồl kwang bàng càr Hà Giang geh jơnau đơs: “Añ ring bal uă mờ broă bơceh lơh broă lơh yal tơnggit jơnau phan kuơ dà tơrgùm bal tàm gùt lơgar nàng bol he geh anih yal tơnggit jơnau ring bal. Bulah bè hơ̆, tàm jơnau rơcang cih adat boh lam ờ hềt cih loh làng. Bè hơ̆ den tàng añ sồr bơ tơl bè tŭ tơngai, broă rơndap lơh lơh gơs broă lơh anih yal tơnggit jơnau bè phan kuơ dà dà lơgar nàng kờñ drơng broă lơh atbồ, sền gàr phan kuơ dà jat măi mok pa bơh dà lơgar mờ kâp hơ đơm dê”.

Tềng đap ală bơta tam gơl ờ gơtùi git lài bơh trồ tiah dê, trồ tiah ngai sơlơ ờ niam, ồng Nguyễn Hữu Thông, Mpồl kwang bàng càr Bình Thuận đơs là, pal cih mùl màl rlau bè ngui khoa họk, măi mok tàm atbồ, sền gàr, ngui phan kuơ dà, rơcang sơndră bơta aniai bơh dà lơh gơbàn: “Añ sồr bơ tơl broă kơlôi sơnơng broă lơh măi mok lơh niam dà lềng gơs dà ngui sa nàng lơh gơs bơta pràn bè dà kung bè gàr tiah geh dà, ngan là dà sàng drơng broă ngui sa mờ lơh sa bơh làng bol dê, ngan là làng bol tàm ală bồt bơh bol he dê tàm sèng g, bơnah 1, bơta 6 bơh jơnau rơcang cih adat dê”.