Bơh jat sền ai gŏ, jơnau bơto bơsram 3 kâp nam 2018 geh lơh nền nòn, jơh nùs ngan, neh tam gơl bơh broă bơto bơtê jơnau git wă gơs gùng dà bơtàu tơnguh nùs nhơm, pràn jak kơnòm bơsram in. Tơngume sră mău lơh jat jơnau sồr kờñ geh bơh jơnau bơto bơsram 3 kâp pa dê. Broă cih gơs sră măi neh hòi jà geh uă ngan cau jak chài, cau kơlôi sơnơng, cau pơgru geh bơta chài git wă, bơngă pin dờn, mờng chài tus bal.

Bulah bè hơ̆, bơh jat sền kung ai gŏ, broă cih gơs sră, sền sơ wì ngan ngồn sră măi gam uă bơta ờ niam: Ƀộ Giáo zụk mờ Đào tạo ờ lam lơh cih gơs dùl ƀộ sră măi jat jơnau cih bơh Nghị quyết sồ 88 Quôk hội khoă XIII dê, ờ hềt lam lơh tơl làm kơnòl bơh dà lơgar dê, ngan là broă atbồ, yal tơnggit, rề ơnàng uă jơnau bơto bơsram 3 kâp; atbồ, tam gơl giă sră măi. Broă sền sơ wì ngan ngồn sră măi ờ hềt geh sền dờng màng dipal, broă sền sơ wì, cih dờp, tam gơl sră măi ờ hềt nền nòn, lơh gơbàn gam tìs bè tơngume tàm 18 pang sră măi. Geh bơta ờ geh, ờ tơl sră măi uă ngan gơ wèt mờ 2, 3 bơta sră lài mờ nam bơsram pa. Củ ñiệm Ủy ƀan Adat boh lam bơh Quôk hội dê ồng Hoàng Thanh Tùng đơs: “Ală bơta kòl yan tŭ do là ờ geh bơta rơcang lài tàm tŭ lam lơh broă lơh, halà geh ală kal ke tàm broă lam lơh broă dong kờl kơnòm bơsram tiah sar lơgar ngài, halà tam gơl gơs điện tử sră măi do nàng sơlơ tơnguh rlau tai broă ngui măi mok yal tơnggit jơnau. Digơlan ờ di là sră mờ là ƀộ sră măi điệ tử. Bơta gơnoar atbồ dilah ngui ƀộ sră măi bơh bơta tă pơgồp mpồl bơtiàn dê. Sền sơ wì jrô ơnàng rlau ală bơta ờ niam tŭ bol he ờ geh dùl ƀộ sră măi bơh dà lơgar dê, bơh hơ̆ geh broă lơh bơsong ală bơta ờ niam do mờ broă lơh geh broă bơta broă lơh, ờ di mìng geh dùl broă lơh cih gơs sră măi pa den bơta do pal geh sền sơ wì jrô ơnàng rlau”.

Broă tam gơl pa jơnau bơto bơsram, sră măi là broă dờng màng, dờp geh bơta sền gròi uă ngan bơh cau tĕ khà mờ làng bol dê. Jat ală kwang bàng đơs, jơnau bơto bơsram 3 kâp cèng bơta kơrnuat boh lam là di, mơya jơnau bơto bơsram mìng cih tơngume jơnau git wă. Mơya tơngume jơnau git wă 3 kâp kung kuơmàng ngan sơl, pal geh bơta gròi sền nền nòn bơh dà lơgar dê. Ƀí thư Đảng dà lơgar, Củ tịc Ủy ƀan Mặt trận dà lơgar ồng Đỗ Văn Chiến sồr: “Broă pal lơh mơ là pal geh mpồl gròi sền nền nòn bơh broă cih gơs, lip gơs sră, tac sră mờ bol he pal tơrmù giă sră măi dipal mờ priă jền lơh geh bơh làng bol dê tŭ do. Làng bol gam sồr là sră măi do pal geh dà lơgar atbồ giă. Tam gơl den là broă bol he pal wèt tus. Tài dilah pà ală bơta lơi ai cau kal ke in den jat añ là pà “sră” là kơ̆ kơljap jŏ jòng ngan rlau jơh. Jơnau sồr bơh Mpồl kwang bàng jat sền do là geh cơng tàng, gơtùi lam lơh jat halà ờ den pal geh broă kơlôi sơnơng jrô ơnàng, mblàng lơh loh dipal”.

Tàm dơ̆ pơrjum Ủy ƀan Thường vụ Quôk hội, Củ tịc Quôk hội ồng Vương Đình Huệ đơs loh bơta geh ngan jơnau bơto bơsram 3 kâp pa ai tơlik lơyài 30 nhai pơndrờm mờ jơnau sồr. Củ tịc Quôk hội đơs là, pal sền sơ wì kơnòl ală cau lam lơh tam gơl pa jơnau bơto, sră măi bơto bơtê 3 kâp. Pal sền ngac, broă sền sơ wì, cih dờp, tam gơl sră măi ờ hềt nền nòn, lơh gơbàn gam geh bơta tìs bè tơngume tàm 18 pang sră măi, ngan là sră măi Dà yoan ơdŭ 1, Khoa họk tự ñiên ơdŭ 6, Lịc sử ơdŭ 11. Củ tịc Quôk hội sồr mhar ai tơlik sră nggal pơlam bè broă lơh lơh nền giă sră măi, lơh nền giă jơnhua ngan rlau jơh sră măi, gàr niam gròi sền nền nòn priă tă nàng lơh, tơrmù priă lơh kòn gùng, khà tơrmù bơnah rhiang tơrmù giă geh lir nàng tơrmù giă sră măi. Củ tịc Quôk hội sồr lam lơh nền nòn jat tơngume Nghị quyết sồ 88 bơh Quôk hội dê bè tam gơl pa jơnau bơto bơsram, sră măi bơto bơtê  3 kâp: “Nghị quyết sồ 88 đơs: Ƀộ Giáo zụk mờ Đào tạo pal lam lơh cih gơs là dùl ƀộ sră măi wil tơl bơh ơdŭ 1 tus ơdŭ 12 geh 137 bơta sră. Ală mpồl bal, cau dùl nă să ndai geh hòi jà tus bal cih gơs sră măi dùl halà 2, 3 bơta sră jat bơta pràn jak, ờ duh pal cih gơs wil tơl dùl ƀộ sră măi. Nùs nhơm Nghị quyết sồ 88 dê là bè hơ̆. Bơta geh ngan tŭ do, mpồl kwang bàng jat sền đơs den añ gŏ kung pal sền gròi ngan, bol he pal kơlôi sơnơng tai”.

Củ tịc Quôk hội đơs tai, pal pơn jat tai lơh lài, lam lơh nền nòn broă ai wil tơl kes priă ai gah bơto bơtê mờ bơsram in, ngan là priă lam lơh Jơnau bơto bơto bơsram 3 kâp nam 2018. Kuơmàng, pal sơlơ mblàng yal, pơlam lơh jat rlau tai tus kwang bàng, cau pơgru, ală rơnàng làng bol nàng git loh, bơh hơ̆ lơh gơlik bơta ring bal tŭ lam lơh jơnau bơto bơsram 3 kâp nam 2018 lơh geh jơnau kờñ ai tơlik.