Tơnơ̆ pơrjum dơ̆ 5, Đảng đoàn Quôk hội mờ Mpồl đơng lam Đảng Cíñ phủ đơng lam, sồr lơh jơh nùs ngan, kràñ cê ngan ală anih lơh broă bơh Quôk hội, Cíñ phủ dê pơgồp bal jơh nùs mờ ală anih lơh broă, mpồl lơh broă geh gơ rềng mhar rơcang lài ală tơngume gàr bơta niam ngan rlau jơh nàng yal Quôk hội in sền sơ wì, lơh nền.

Gam 2, 3 tơngume Ủy ƀan Thường vụ Quôk hội sền gŏ ờ hềt geh tơl bơta yal Quôk hội in sền sơ wì, ring bal tàm pơrjum dơ̆ 6, Kwang gơnoar cih, kwang atbồ Cơldŭ lơh broă Quôk hội ồng Bùi Văn Cường sồr, Đảng đoàn Quôk hội mờ Mpồl đơng lam Đảng Cíñ phủ sền sơ wì, sồr ală anih lơh broă pơn jat tai kơlôi sơnơng, rơcang lài nàng yal Quôk hội in sền sơ wì, lơh nền tàm pơrjum dơ̆ 7.

Đơs tàm pơrjum, Thủ tướng Cíñ phủ ồng Phạm Minh Chính pà git, tơnơ̆ tŭ tơn jơh pơrjum dơ̆ 5, Quôk hội dùl ngai, Cíñ phủ neh pơrjum tam pà kơnòl broă rơcang lài ală tơngume gơ wèt gơnăp gơnoar nàng yal Quôk hội in sền sơ wì, lơh nền tàm pơrjum dơ̆ 6.

Thủ tướng đơs nền, tơngai lài, ală anih lơh broă bơh Quôk hội dê neh tàm pơgồp bal kơh nùs mờ ală anih lơh broă bơh Cíñ phủ dê: “Bơta tàm pơgồp do ờ mìng geh ală rơndap lơh adat boh lam mờ gam uă broă, gơ wèt gơnăp gơnoar bơh Quôk hội dê, là anih lơh broă geh gơnăp gơnoar dờng ngan rlau jơh, lơh nền ală broă kuơmàng bơh dà lơgar dê, jat sền dờng ngan rlau jơh, lơh adat boh lam mờ ală tơngume dờng Quôk hội kung ndrờm tàm pơgồp bal jơh nùs mờ Cíñ phủ geh cồng nha ngan. Añ gŏ bơta tam pà bal mờ gơp, tàm pơgồp bal mờ gơp bơh Quôk hội dê. Kơnờm bè hơ̆ mờ broă bơh Cíñ phủ dê geh lơh niam rlau, jơh bal bè broă gơ rềng tus ai tơlik adat boh lam, gơ rềng tus ală kơnòl lơh sa- mpồl bơtiàn, sền gàr lơngăp lơngai- sền gàr dà lơgar. Pa do, pơrjum Đảng dà lơgar kung cih dờp, jờng rơ bơta tàm pơgồp bal jơh nùs đah Quôk hội mờ Cíñ phủ”.

Bè 2, 3 tơngume gam lơyài, ờ hềt thàn rơcang lài nàng yal Quôk hội in sền sơ wì, lơh nền tàm pơrjum dơ̆ 6 jat broă rơndap lơh, Thủ tướng Cíñ phủ kơp kờñ ală anih lơh broă bơh Quôk hội, Ủy ƀan Thường vụ Quôk hội dê tam pà bal mờ ală anih lơh broă gơ wèt Cíñ phủ mờ Cíñ phủ tài do là ală tơngume kal ke. Tơngai tus, Thủ tướng sồr 2 gah pơn jat tai tàm pơgồp bal jơh nùs nàng rơcang lài ală tơngume do nàng yal Quôk hội in sền sơ wì, lơh nền tàm pơrjum rềp ngan rlau jơh.

Đơs pơn dut pơrjum, Củ tịc Quôk hội ồng Vương Đình Huệ pà git, nàng rơcang ai pơrjum dơ̆ 6 in, Đảng đoàn Quôk hội mờ Mpồl đơng lam Đảng Cíñ phủ neh cribơyai di tŭ, jơh nùs, nền nòn, lơh di tơngai hơ pơrgon, gơtùi lơh jat jơnau sồr ai tơlik.

Ring bal mờ jơnau đơs bơh ală kwang bàng tus bal pơrjum mờ Thủ tướng Cíñ phủ ồng Phạm Minh Chính dê, Củ tịc Quôk hội ồng Vương Đình Huệ jờng rơ bơta rơcang lài nền nòn bơh 2 cơldŭ lơh broă dê neh geh bơta tàm pơgồp bal jơh nùs, ală jơnau đơs ring bal mờ ală broă rơndap lơh ai tơlik; mờ kung đơs nền, pal pơn jat tai rơcang lài nền nòn jat jơnau kờñ tàm bồ nhai 1 nam 2024 rơp bơsong ală bơta gam wơl: “Pơrjum dơ̆ 6, Quôk hội khoă XV geh khà broă uă ngan jơh bal bè broă lơh lơh adat boh lam, jat sền, lơh nền ală broă kuơmàng dà lơgar dê, là dơ̆ pơrjum nggùl tơngai lơh broă gơ rềng tus ai sră đùh pin dờn ală gơnoar broă geh Quôk hội tơn pồ, kĭ ring bal tơn pồ. Uă tơngume kuơmàng geh gơ rềng tơn tus bơtàu tơnguh lơh sa- mpồl bơtiàn mờ rài kis làng bol dê. Kwang đơng lam bồ Đảng, Dà lơgar, ală cau lơh broă jŏ nam, cau tĕ khà làng bol gùt lơgar kung gơn kơnờm mờ pin dờn tàm cồng nha bơh pơrjum dơ̆ do dê ndrờm bè ală dơ̆ pơrjum lài do”.

Củ tịc Quôk hội sồr Cíñ phủ bal mờ ală anih lơh broă bơh Quôk hội dê tàm pơgồp bal nàng pơn jat tai lơh niam broă lơh rơcang lài nàng kờñ gàr bơta niam ală rơndap lơh adat boh lam kờp dŭ yal Quôk hội in tàm pơrjum dơ̆ do, ngan là ală rơndap lơh adat kal ke. Gơ wèt mờ ală broă dờng kuơmàng gam geh jơnau đơs krơi is, pal geh rơndap broă krơi is, pal geh rơcang lài nền nòn tơngume, mblàng lơh loh bơta niam, bơta ờ niam tơl rơndap broă dê nàng kwang bàng Quôk hội in cribơyai, ai jơnau đơs, gàr bơta niam broă lơh lơh adat boh lam tàm pơrjum.

Củ tịc Quôk hội kung tơngkah pal sùm yal jơnau tơnggit, mblàng yal jơnau bè dơ̆ pơrjum, ngan là gơ wèt mờ ală dơ̆ cribơyai, ai jơnau đơs bè ală broă geh mpồl bơtiàn sền gròi bè broă ai sră đùh pin dờn gơnoar broă, lùp mờ hơ jơnau lùp tàm pơrjum, ờ lời gơlik geh bơta ờ tơl jơnau yal tơnggit; ai tơlik lài gùng dà mblàng yal geh tơngume tờm, geh bơta tờm, di jơnau kờñ, gùng dà bơh Đảng, adat boh lam bơh dà lơgar dê, gàr bơta loh làng, song dơpă, tơl làm, di tŭ pơgồp bơnah mblàng di, wil tơl broă lơh dơ̆ pơrjum tus cau tĕ khà mờ làng bol gùt lơgar.