Ƀòn Ea Pri, xã Ea Wer, kơnhoàl tiah nhàr lơgar Buôn Đôn, càr Dăk Lăk ală ngai lồi nhai 8 wă rò gĭt nđờ rơhiang dơ̆ kwang bàng, cau ling Đại đội 5, Mpồl đơng lam Ling klàng kơnhoàl Buôn Đôn rê lơh broă lơh hòi jà làng bol. Mpồl ling neh pơgồp bal mờ kấp ủy gơnoar atbồ ală tiah mờ ală mpồl cíñ trị- mpồl bơtiàn bơh xã dê lam lơh pơs wàs sàng goh tàm ală broă lơh bơt bơtàu mpồl bơtiàn dê, toah wàs rƀòng dà; dong kờl ală hìu bơnhă geh dà kơl hề mờ dà lơgar, cau kra kis dùl nă să, cau lơh broă sa; tus bal tam gĭt nđờ rơhiang nơm tờm chi, lơh geh mƀur tàm ală gùng lòt tàm ală ƀòn. Tus bal mờ mpồl ling lơh broă hòi jà làng bol, làng bol tàm tiah do cau lơi kung chờ hờp, lơh ngan bal nàng pơgồp bơnah lơh niam broă lơh bơtàu tơnguh lơh sa- mpồl bơtiàn, broă lơh gàr niam rài kis mpồl bơtiàn, broă lơh jơi bơtiàn, gah pin dờn jăt Yàng; gàr niam dà lơgar- lơngăp lơngai. Ồng Nguyễn Anh Dũng, ơm tàm ƀòn Ea Pri, xã Ea Wer, kơnhoàl Buôn Đôn, pà gĭt: “Pah nam mpồl ling rê tàm ƀòn Ea Pri nàng bal mờ làng bol tus bal tàm ală broă lơh toah wàs rƀòng dà mờ pơs wàs lơh sàng goh 2 gah gùng lòt, dong kờl làng bol ală broă lơh sre, mìr, añ là làng bol gơ lơh chờ hờp ngan, tŭ mpồl ling rê den làng bol kung neh bal mờ mpồl ling tus bal pơs wàs sàng goh tiah ơm kis bè tàm hìu pơrjum ƀòn, pơs wàs gùt dar hìu ơm nàng gàr niam tiah ơm kis tơlir, niam mờ sàng goh”.

Ờ mìng dong kờl làng bol ală broă lơh kơn jơ̆ lơm, mờ rùp hin cau ling bal mờ dà ào tơlir tus bal dong kờl is bơh cau bơsram dờng Hìu bơsram Đại họk Tây Nguyên mờ đoàn viên ơruh pơnu ală tiah dê sùm rềp mềl, kờñ gơboh bal tŭ jơh nùs sền gròi tus tơl nă cau, tơl nơm hìu, ngan là ală hìu bơnhă geh rài kis kal ke. Ngan là tŭ mblàng yal bè gùng dà broă lơh bơh Đảng, Dà lơgar, broă lơh mblàng yal lơyah niam, ƀuơn kah, ƀuơn lơh jăt, bơh hơ̆ bơta pin dờn tàm bơta đơng lam bơh Đảng, gơnoar atbồ, kung bè lơh jăt gùng dà broă lơh bơh Đảng, Adat boh lam bơh Dà lơgar dê, Thiếu tá ồng Trần Văn Toàn, Cíñ trị viên phó Mpồl đơng lam Ling klàng kơnhoàl Buôn Đôn, càr Dăk Lăk, pà gĭt: “Gơwèt mờ Mpồl đơng lam ling klàng kơnhoàl Buôn Đôn kung neh gĭt wă uă ngan tơngume do, lơh jăt broă lơh hòi jà làng bol là dùl tàm ală tơngume kwơ màng tàm tơngai tŭ do. Gơwèt mờ làng bol kòn cau rlau 60% là jơi bơtiàn dùl ết nă cau den bol añ kung geh broă lơh mblàng yal rềp mờ làng bol rlau, ƀuơn wă rlau, lơyah niam rlau nàng làng bol in gĭt wă gùng dà broă lơh bơh Đảng mờ Dà lơgar dê tàm tơngai tus lơh jăt niam rlau tai”.

Mpồl ling rê tàm ƀòn, muh mat tiah nhàr lơgar kung rơ hời geh tam gơl. Bơh ală broă lơh geh ngan, mpồl ling neh dong lơh bơt bơtàu, lơh niam wơl geh 11 kơi sồ gùng lòt tàm ƀòn, rlau 1 kơi sồ rbòng dà; dong làng bol sờr ù, tơnhào phan tam lơyah ngai; lơh niam wơl 5 tiah pơrjum mpồl bơtiàn, hìu làng bol, 2 nơm hìu bơsram; lam lơh ală broă lơh tìp mat lơh kuèng niam chài, đơs crih tam ya; còp, pà phan ală hìu bơnhă geh dà kơl hề mờ dà lơgar; tàm bơr lŭ bal mờ hơ̆ là broă lơh mblàng yal, hòi jà làng bol lơh jăt niam rài kis niam chài tàm mpồl bơtiàn làng bol ơm kis, sền gàr sàng goh tiah ơm kis; yờ tơnguh uă bơta gĭt wă tàm broă lơh jăt ală gùng dà broă lơh bơh Đảng, Adat boh lam bơh Dà lơgar dê. Đại tá ồng Võ Văn Minh, Phó Cíñ ủy Gah đơng lam Mpồl ling klàng càr Dăk Lăk pà gĭt: “Nàng lơh jăt niam ală broă lơh lơh broă hòi jà làng bol mờ broă lơh bơt bơtàu tam klăc ling klàng làng bol tàm ù tiah càr dê tàm tơngai tus, gơwèt mờ mpồl ling phàu crong lài ngan bol añ kung sền gĭt broă yờ tơnguh uă bơta gĭt wă ai kwang bàng, cau ling in bè kơnòl broă hòi jà làng bol tàm bơta pa là broă lơh kwơ màng ngan. Nàng lơh niam pal lòt tus tàm ƀòn lơgar, sền tơl ƀòn lơgar tŭ do lam lơh ală broă lơh lơh broă hòi jà làng bol tàm ală tiah bơh he dê neh lơh geh jăt jơnau kơ̆p kờñ pal geh ngan rlau jơh bơh làng bol dê halà ờ mờ tơl ală ù tiah tờm; bơh hơ̆ lơh niam broă lơh tơn jơh, sền sơ wì, broă lơh ai gĭt bơta mờng chài lơh broă mờ lam lơh, rề ơnàng broă lơh tam klăc ling klàng làng bol tàm ù tiah càr dê đơs bal, mờ jơh bal mpồl ling phàu crong càr dê đơs is”.

Mờ gùng dà “4 bal” tàm broă lơh hòi jà làng bol nam 2023, ală mpồl ling gơwèt Gah đơng lam ling klàng càr Dăk Lăk neh pơgồp bal mờ ală tiah lòt sền, sac rơwah ală broă lơh kờñ pal geh ngan rlau jơh neh dong kờl. Bơh tơl broă lơh, bơnah broă lơh sir neh pơgồp tai bơta chờ hờp, lơh ram mhŭ nùs nhơm mờ sòl àng lơh duh hồl bơta pin dờn bơh làng bol jơi bơtiàn dùl ết nă cau tàm tiah nhàr lơgar càr Dăk Lăk dê gơwèt mờ “Cau ling Wa Hồ”.