Tiah tàm gùl lơgar mờ Tây Nguyên geh 19 càr mờ ƀòn dờng. Bàr tiah do geh bơta mùl gŏ ù tiah, lơh sa, niam chài, mpồl bơtiàn krơi is, uă bơta ƀươn mơya kung ờ dùl êt kal ke, bơta lòng. Do là ală broă kờñ pal sền gròi tàm tŭ lơh jăt broă lơh hòi jà cau ùr mờ ală broă dong kờl krơi is gơ wèt mờ cau ùr tàm ală càr tiah tàm gùl lơgar mờ Tây Nguyên. Tàm kơnhoàl ù tiah do, Đà Nẵng là tiah lam lài bè khà ùr kwang bàng tus bal lơh broă tàm kâp ủy tàm jơh bal 3 kâp mờ jơnhoa dơ̆ pe tàm jơh gùt lơgar bè khà ùr kwang bàng tus bal lơh broă tàm kâp ủy ƀòn lơgar. Ală càr: Nghệ An, Thừa Thiên- Huế, Dăk Nông geh khà ùr kwang bàng tus bal lơh broă tàm kâp ủy gơguh jơnhoa ngan rlau jơh kơnhoàl ù tiah do dơ̆ dùl dơ̆ tàm kâp càr, kơnhoàl mờ xã.

Pe càr: Kon Tum, Dăk Lăk mờ Gia Lai geh khà ùr kwang bàng tus bal lơh broă tàm kâp ủy là cau jơi bơtiàn dùl êt nă cau jơnhoa ngan rlau jơh (kờp jăt tàm kờp jơh khà ùr kwang bàng tus bal lơh broă tàm kâp ủy). Tàm tŭ hơ̆, càr Gia Lai là càr geh uă anih pơnrơ bal mờ khà ùr kwang bàng tus bal lơh broă tàm kâp ủy 3 kâp ndrờm lơh geh mờ sơrlèt broă jàu neh cih tàm Jơnau sồr sồ 35 bơh Ƀộ Cíñ trị dê. Khà ùr kwang bàng Quôk hội mờ Kwang bàng Hội đồng Ñân zâñ kâp càr bơh Gia Lai dê sơrlèt 30% pơndrờm mờ broă jàu, ơm dơ̆ 4 tàm tiah tàm gùl lơgar mờ Tây Nguyên.

Jăt ală tơngume geh sền tàm Cribơyai, bal mờ ală tŭ bơtàu tơnguh lơh sa, rài kis jơh ală bơta bơh cau ùr 19 càr tiah tàm gùl lơgar mờ Tây Nguyên geh tam gơl loh làng ngan. Ồng Võ Thanh An, Kwang ătbồ Mpồl Hòi jà làng bol, Củ tịc Ủy ƀan Mặt trận dà lơgar Việt Nam càr Quảng Ngãi, đơs là: tềl lời wơl mpờl gŏ loh làng ngan bè gơnoar broă bơh cau ùr dê tàm kơnhoàl ù tiah do là khà cau ùr ăt ală gơnoar broă tàm kâp ủy, gơnoar ătbồ, ùr kwang bàng Quôk hội mờ Hội đồng Ñân zân neh jơnhoa rlau mờ lài. Broă săc rwah ală cau tơlik măt tĕ khà ùr kwang bàng tus bal lơh broă kwang bàng Quôk hội mờ Hội đồng Ñân zân ală kâp tŭ do sùm gơguh bè khà mờ bơta niam, ngai sơlơ kơnòm rlau, bồ tơngoh bơsram jơnau cribơyai tàm sră pơ àr cíñ trị, broă lơh ờs mờng, kơnòl broă lơh sền bal lơh geh jơnau sồr, jơnhoa rlau pơndrờm mờ tơngai lơh broă lài. Ồng Võ Thanh An, đơs: Bơh jăt sền, Mặt trận dà lơgar Việt Nam càr Quảng Ngãi gŏ là ală cau tơlik măt tĕ khà Kwang bàng Quôk hội mờ Hội đồng Ñân zân ală kâp ndrờm geh ală jơnau niam ngan, broă lơh ờs mờng, geh bơta chài lơh broă mpồl. Là mpồl cau lơh kòn gùng tam klăc đềt mềr đah Đảng, Gơnoar ătbồ mờ Quôk hội, Hội đồng Ñân zân ală kâp, mờ cau tĕ khà.

Bulah bè hơ̆, bal mờ ală jơnau pơnrơ kung gam geh sơl ală broă ngan ngồn tàm rài kis pal sền gròi ngan. Sơñio khà bơtàu tơnguh cau ùr tàm uă gah broă lơh gam lơyah rlau pơndrờm mờ khà kờp bal gùt lơgar dê, bè khà cau lơh broă geh bơto broă lơh dùl êt, priă lơh geh dùl êt mờ khà hìu bơnhă rƀah uă; tam lơh tam pờng tàm hìu bơnhă gơlik geh kal ke; khà cau ùr jơi bơtiàn dùl êt nă cau là kwang đơng lam bồ tờm gam ờ uă pơndrờm mờ mpồl ùr kwang bàng kông cưk. Mò Siu H’Thoan, Củ tịc Mpồl Tam klăc Cau ùr kơnhoàl Chư Prông, càr Gia Lai geh jơnau đơs bè do: Oh mi cau ùr gam sền gròi broă tŭ do là broă lơh, priă lơh geh. Lơh sa tŭ do gam tìp uă kal ke. Tàm hơ̆, kung gơrềng bè bơta gĭt wă mờ bồ tơngoh wă wờng, bơta nàng bơtàu tơnguh. Oh mi cau ùr jơi bơtiàn dùl êt nă cau uă ngan khi lơh broă sa sươn sre, broă gĭt ală drơng broă kung gam ờ hềt uă sơl, tŭ niam nàng bơtàu tơnguh dùl êt den tàng broă jòi geh broă lơh broă sa, lơh geh priă jền nàng oh mi cau ùr geh bơta gơn kơnờm bơtàu tơnguh lơh sa kwơmàng ngan.

Ala măt Mpồl bơyai lơh, mò Nguyễn Thị Minh Hương, Phó Củ tịc Mpồl Tam klăc Cau ùr Việt Nam sền dờng màng cih dờp ală tơngume cribơyai, tàm bơyai mờ jơnau dan jơnau sồr bơh ală kwang bàng dê mờ gơn kơnờm do rơ̆p là dùl tàm ală cơng tàng nàng ală tiah in ai geh broă lơh nàng kờñ tơnguh uă gơnoar broă, bơngă pin dờn bơh cau ùr dê; ai tơlik geh gùng dà broă lơh loh làng nàng lam lơh jăt ală broă dong kờl bè cau ùr dùl bă geh cồng nha; ai tơl ală bơta nàng ùr kwang bàng in geh tŭ ngui niam bơta pràn jak, đơs nền bơngă pin dờn bơh he dê nàng tă pơgồp, ơn pơdơng ai hìu bơnhă mờ mpồl bơtiàn in. Mò Nguyễn Thị Minh Hương, Phó Củ tịc Mpồl Tam klăc Cau ùr Việt Nam, đơs: Ală broă kung neh geh kâp ủy, gơnoar ătbồ sền gròi, bulah bè hơ̆ kung gam sơl ală bơta ờ hềt ring bal uă ngan đah sră pơ àr mờ lam lơh jăt tàm rài kis ngan ngồn. Să tờm kwang bàng mpồl kung gŏ geh kơnòl bơh he dê là pal rơcăng lài, bơceh lơh rlau tai tàm broă lơh jăt ngan ngồn ală gùng dà, jơnau sồr mờ pal sền gròi tus ală cau ùr krơi is tài bơh tơl mpồl cau ùr den rơ̆p geh ală bơta krơi is bơh he dê, geh bal tàm mpồl jơi bơtiàn dùl êt nă cau den geh uă mpồl krơi is den kờñ pal gĭt nền geh jơnau kờñ bơh tơl nă cau ùr dê nàng rơndăp broă lơh gơ in dipal mờ geh ală broă lơh dipal mờ mpồl cau.

Bal mờ 2 dơ̆ cribơyai, geh “Broă lơh jăt broă lơh cau ùr mờ broă lơh jăt broă dong kờl gơ wèt mờ ală mpồl cau ùr krơi is” mờ “Broă lơh ùr kwang bàng mờ ngui niam gơnoar broă mpồl ùr kwang bàng dê”, cribơyai neh cih dờp uă jơnau đơs tă pơgồp nàng kờñ pơn jăt tai lơh jăt niam broă lơh ùr kwang bàng tàm bơta pa. Tàm hơ̆, broă lơh tờm kwơmàng là lơh pràn bơtàu tơnguh lơh sa, niam chài, mpồl bơtiàn, bơtàu tơnguh uă rài kis phan bơna mờ nùs nhơm ai cau ùr jơi bơtiàn dùl êt nă cau in, cau ùr dòn yàng mờ tơnguh cồng nha mpồl kwang bàng Mpồl Tam klăc Cau ùr ƀòn lơgar in nàng tam gơl pa tơngume, gùng dà lơh broă dipal mờ jơnau sồr ngan ngồn tàm rài kis mơkung geh broă dong kờl ai lài nàng lam lơh jăt niam ală gùng dà, broă dong kờl gam geh tŭ do bè broă lơh cau ùr.