Ủy ƀan Thường vụ Quôk hội: Jơnau dan bơh cau tĕ khà dê - pal mhar bơsong bơta ờ niam

VOV4.K'Ho- Rơcang tus pơrjum dơ̆ 5, Quôk hội khoă XV, poh lài, Ủy ƀan Thường vụ Quôk hội neh pơrjum dơ̆ 23, ai jơnau đơs tàm jơnau rơcang cih jơnau yal tơrgùm jơh jơnau đơs, jơnau dan cau tĕ khà mờ làng bol dê pơyua tus pơrjum dơ̆ 5.

Ƀí thư Đảng dà lơgar, Củ tịc Ủy ƀan Mặt trận dà lơgar Việt Nam ồng Đỗ Văn Chiến pà git: cau tĕ khà mờ làng bol ai tơnggŏ bơta pin dờn tàm cồng nha kuơmàng tàm broă lơh bơt bơtàu mờ lơh niam wơl Đảng, ngan là broă lơh rơcang sơndră sa kuề sa kuà, broă ờ niam geh sồr lam lơh kràñ cê, jơh nùs, đơs pal gơ jat bal mờ lơh, ờ geh bơta ơm bơdìh. Ală jơnau đơs, jơnau dan bơh cau tĕ khà dê kơp kờñ geh ală broă lơh dipal, geh cồng nha, ờ mìng gàr bơta kơ̆ kơljap nàng bơtàu tơnguh dà lơgar, sồr cih dờp jơnau đơs làng bol dê gơ wèt mờ jơnau rơcang cih Adat Ù tiah (tam gơl), jơnau rơcang cih Adat kă bro ù tiah hìu đam (tam gơl), jơnau rơcang cih Adat Hìu ơm (tam gơl)… pal sền gròi là broă dong kờl ală broă lơh bơtàu tơnguh lơh sa- mpồl bơtiàn: “Gơ wèt mờ broă lơh bơtàu tơnguh lơh sa, mpồl bơtiàn tiah làng bol jơi bơtiàn dùl êt nă cau mờ tiah kơh bơnơm. Ală rơndap broă lơh dong kờl tơn ai làng bol in bè ù ơm, ù lơh sa, dà ngui sa đơs ngan là pal tă bơh priă bơcri broă lơh bol he dê rơndap ai tàm tă dơ̆ ngui priă bơcri dà lơgar. Bè hơ̆ pal lam lơh broă rơndap lơh bơcri priă dà lơgar den ờ gơtùi ai priă bơcri. Dơ̆ 2 là tŭ do, kâp hơ đơm kal ke ngan tàm broă pơgồp bal priă bơcri. Pơgồp bal priă bơcri đơs bè hơ̆ lơm gơ dê, mơya ờ geh jơnau pơlam lơi pơgồp bơcri priă dùl bă geh cồng nha ngan rlau jơh, den tàng kâp hơ đơm kung gam kwi kuơ”.

Bơh mùl màl tàm ală tiah, cau tĕ khà dan Đảng mờ Dà lơgar đơng lam ală anih lơh broă geh gơnoar kơlôi sơnơng, ai tơlik sră nggal pơlam lơh jat jơnau cih adat boh lam nàng rơcang sơndră, bơsong bơta 2, 3 nă kwang bàng, công chức, viên chức, cau geh gơnoar tàm pơrdah, pleh, rơngòt kơnòl, “gàr lơngăp lơngai rlau ir mờ bơta pal geh”, ờ khin bơsong broă, lơyài, lơh gơ rềng tus broă lơh sa, kă bro bơh mpồl lơh sa kă bro mờ rài kis làng bol dê. Tă pơgồp jơnau đơs bè tơngume do, Củ ñiệm Ủy ƀan Lơh sa bơh Quôk hội dê Vũ Hồng Thanh đơs loh: “Tàm jơnau yal bơh Mặt trận dê den kung geh bơta rơngơt kơnòl, tàm pơrdah ờ loh làng. Tŭ dùl broă lài do digơlan là uă ngan ring bal bơsong. Mơya tŭ do mìng kờñ dùl gah ờ bài den rê wơl dan jơnau đơs mờ sră nggal geh uă ngan tŭ tơngai, priă tă lơh gơguh uă”.

Phó Củ tịc Thường trựk Quôk hội ồng Trần Thanh Mẫn tơngkah: jơnau yal ai tơnggŏ jơnau đơs bơh cau tĕ khà mờ làng bol dê, sồr bơ tơl ală tơngume bè broă gơmù khà gơguh lơh sa, lơyài ring bal rơndap ù tiah, lơh niam wơl hàñ cíñ, tam gơl anih bơcri priă kă bro nàng lơh sir jơnau yal tơl khà bơta niam: “Bơh tìp mat cau tĕ khà añ gŏ uă ngan bơta lơh tìs bơh mpồl sền sơ wì bơta kơnhăp rơndeh rơndồ bơh gùt lơgar dê den tàm jơnau yal ờ hềt đơs. Dơ̆ 2 là bơta tac bro, pơndiang ma túy tŭ do ờ di mìng gam mờ gùng ù gờl tai, mờ lơh mờ gùng rơndeh par, lac lèu ngan. Kwang àng ƀòn dờng Hồ Chí Minh neh yă broă lơh tìs mờ yă git nđờ jơt nă cau gơtìp yă”.

Sền sơ wì jơnau yal broă lơh bơta kơp kờñ làng bol bơh Quôk hội dê nhai 4 nam 2023, Ủy ƀan Thường vụ Quôk hội kung đơs loh bơh jat sền ai gŏ, tàm 18 nam bơh nam 2003 tus nam 2021, anih lơh broă ƀảo hiểm xã hội càr, ƀòn dờng neh ai tìs priă ƀảo hiểm pal blơi, neh geh rlau 4 rbô nă cau tờm hìu bơnhă kă bro is gơtìp ai tìs. Kwang atbồ Ƀan bơta kơp kờñ làng bol ồng Dương Thanh Bình đơs loh: “Tài broă tă priă blơi ƀảo hiểm xã hội pal geh ờ di mờ jơnau cih bơh adat boh lam dê den tàng ală cau tờm mpồl lơh sa kă bro, cau dùl nă să ờ hềt geh kờp tŭ jơ tă priă blơi ƀảo hiểm xã hội pal blơi nàng geh dờp broă dong kờl ƀảo hiểm xã hội, kuơmàng geh uă cau tă priă blơi ƀảo hiểm xã hội neh mờr 20 nam, bơta do neh lơh làng bol ờ suk ngan. 2, 3 nă cau neh lơh sră yă, geh tŭ yă sồr kơlôi sơnơng, kờp sền, sền sơ wì bơsong jơh jơnau dan bơh cau tĕ khà dê”.

Củ tịc Quôk hội ồng Vương Đình Huệ kung tơngkah tus uă bơta ờ niam bè broă lơh priă jền, ù tiah hìu đam geh ală cau tĕ khà đơs tàm ală dơ̆ tìp mat, sồr Cíñ phủ sền sơ wì nền nòn rlau broă gơlik geh nam 2023 dê, mblàng lơh loh jơnau bơh tai gơlik geh nàng geh broă lơh di tŭ. Tàm hơ̆, đơng pơlam broă lơh nam priă jền geh tơngume tờm, geh bơta tờm; tơrgùm tàm lơh niam wơl hàñ cíñ, tam gơl niam anih bơcri priă kă bro, sơlơ gàr kơ̆ kơrnuat hàñ cíñ, lơh broă dà lơgar. Mờ kung jat sền, rơcang lài broă rơndap lơh rơcang sơndră, gròi sền geh cồng nha kòp Kovid-19.

Viết bình luận