Mho ngai 18/04, (jat jiơ tiah do dê), Củ tịc Quôk hội ồng Vương Đình Huệ mờ Mpồl kwang bàng kấp dờng Quôk hội lơgar he dê neh tus ƀlàng rơndeh par José Marti, càr lơgar La Habana sơnđờm dơ̆ lòt còp ngan ngồn lơgar Cuba jat jơnau jà bơh ồng Esteban Lazo Hernandez, Củ tịc Quôk hội Gơnoar atbồ làng bol, Củ tịc Hội đồng Dà lơgar Cuba dê.

Dơ̆ lòt còp ngan ngồn lơgar Cuba bơh Củ tịc Quôk hội ồng Vương Đình Huệ dê nàng kờñ sơlơ tơnguh bơta gĭt gơ̆p lơh bơyô bal bơh yau, lơh broă bal dờng màng đah 2 lơgar tàm uă gah bè: bơta gĭt gơ̆p cíñ trị cribơyai broă mờ lơgar ndai; lơh broă bal sền gàr Dà lơgar- lơngap lơngai; lơh broă bal lơh sa, kă bro, bơcri priă; lơh broă bal gah lơh sa suơn sre; lơh broă bal gah lơh sơnơm. Tàm lơh broă bal đah 2 Quôk hội dê, 2 gah rơ̆p lơh pràn sơlơ tơnguh tìp mat kwang bàng kấp dờng mờ ală kấp, đah Kwang bàng Quôk hội 2 lơgar, đah 2 Mpồl Nghị sĩ lơh bơyô bal; pơn jat tai lơh niam gơnoar broă anih lơh adat boh lam 2 lơgar dê tàm broă sơlơ tơnguh tai bơta gĭt gơ̆p đah 2 gah; pơgồp bal tàm ală dơ̆ pơrjum tàm dunia uă gah.