Tàm Pơrjum pờ tơn tàm internet tus ală càr: Khánh Hoà, Gia Lai mờ Dăk Lăk, Lâm Đồng, Tây Ninh, Thủ tướng Cíñ phủ ồng Phạm Minh Chính đơs sùm, bơta mìu dà tih dà lìu mờ broă lơh bơsong jơnau gơlời wơl tài bơh mìu dà tih dà lìu neh geh Ƀộ Cíñ trị, ồng Tổng Ƀí thư sồr lơh jơh nùs jơh tồr ngan, sồr ală ồng Kwang bàng Ƀộ Cíñ trị lòt tus ală ƀòn lơgar sồr lơh, còp rơ wàng, pơndờm pơnđiang, bơsong jơnau gơlời wơl.
Lơh jăt bơta jàu kơnòl bơh Ƀộ Cíñ trị dê, 4 mpồl lơh broă bơh đơng lam Đảng, Dà lơgar, Cíñ phủ dê neh pơn jăt tai să tờm tơn lòt tus ală ƀòn lơgar, tàm hơ̆, ồng Trần Cẩm Tú, Duh broă sùm Mpồl đơng lam Đảng Dà lơgar tàm càr Khánh Hoà, ồng Nguyễn Hoà Bình, Phó Thủ tướng Duh broă sùm Cíñ phủ tàm càr Dăk Lăk, ồng Phan Văn Giang, Ƀộ trưởng Ƀộ Ling klàng tàm càr Gia Lai, mò Bùi Thị Minh Hoài, Củ tịc Anih duh broă Mặt trận dà lơgar Việt Nam tàm càr Lâm Đồng.
Să tờm tơn lòt sền, sồr lơh broă lơh bơsong jơnau gơlời wơl tài bơh mìu dà tih dà lìu tàm càr Khánh Hoà, ồng Trần Cẩm Tú, Duh broă sùm Mpồl đơng lam Đảng Dà lơgar sồr càr Khánh Hoà pơn jăt tai lơh jăt niam jơnau sồr bơh Ƀộ Cíñ trị, Mpồl đơng lam Đảng Dà lơgar, Tổng Ƀí thư ồng Tô Lâm; bơh Cíñ phủ mờ Thủ tướng Cíñ phủ dê; sồr kâp ủy, gơnoar ătbồ ală kâp pal còp rơ wàng, pơndờm pơnđiang hìu bơnhă geh cau chơ̆t, roh thĭt; sền gàr niam cau gơtìp sồt să:
“Hòi tơrgùm uă ngan rlau jơh ală bơta pràn, phan bơna kờñ pal geh, lơh ngan bơh jơh ală broă lòt tus, dong kờl phan bơna, dong kờl làng bol gam gơtìp wềl tàm ƀòn lơgar gơtìp ngơr bam kơn jơ̆. Gơnoar ătbồ ƀòn lơgar pal ai tơl anih ơm ing lơngăp lơngai, pà di tŭ, wil tơl ală jơnau kờñ phan ngui sa kờñ pal geh ai Làng bol in; sền gàr ngan ai cau kra, kơnòm dềt, cau ùr geh bun in, cau lơbơn ñam ño ƀươn gơtìp aniai; ờ gŏ di lời gơlik geh jơnau ờ tơl hìu bơsram, ờ tơl cơldŭ bơsram ai ală kòn, ală sau in, ờ tơl anih kham sơm kòp ai làng bol in”.
Di dơ̆ do, ala măt đơng lam Đảng, Dà lơgar, Duh broă sùm Mpồl đơng lam Đảng Dà lơgar ồng Trần Cẩm Tú jàu dong kờl 20 tơmàn đong ai Đảng ƀộ, Gơnoar ătbồ mờ làng bol càr Khánh Hoà in.
Tơnơ̆ tŭ rơndeh par mù tàm ƀlàng rơndeh par Cam Ranh, càr Khánh Hoà tŭ mang jơngo, Phó Thủ tướng ồng Nguyễn Hoà Bình neh sơrbăc mhar tơn tus tiah ngơr bam dà kŏ kơn jơ̆ ngan sơnah ƀòn Đông Hoà, càr Dăk Lăk (kơnhoàl Đông Hoà, càr Phú Yên yau). Phó Thủ tướng tam pà bal mờ ală roh rui, jê sồt muăt jrùm mờ làng bol neh pal kong àñ ơnòng, mờ đơs nền Đảng, Dà lơgar rơ̆p ờ tŭ lơi lời làng bol ơm is dồ nă să. Jơh ală bơta dong kờl bè phan bơna, nùs nhơm rơ̆p geh lơh jăt sơrbăc mhar mờ geh cồng nha ngan rlau jơh dilah gơtùi.
“Tàm tŭ kal ke do kwơmàng ngan rlau jơh là kòn bơnus, jăt jơnau sồr lam bơh Cau ling, Kwang àng dê lòt tus geh ndo là dờng màng ngan rlau, phan bơna, hìu đam he rơcăng tơnơ̆, Đảng, Dà lơgar rơ̆p dong kờl tai. Dilah mờ pơlai sùm phan bơna jơtài mờ ơm sùm tàm hơ̆ den geh uă ngan bơta rềs àr gơ aniai. Cau là kwơmàng, ală sau dềt lòt tus geh ndo lơngăp lơngai là brơn brài ngan rao. Tŭ do, jơnau sồr dờng ngan rlau jơh là pal dong kờl cau”.