Tơnơ̆ ngai Dà lơgar geh tơngklàs jơh, ồng Lê Minh Đuông pơn jat tai tă pơgồp is hơ̆ là cau kwang bàng tơryang tơryồng bơh ƀòn lơgar dê mờ uă gơnoar broă krơi is. Tàm khat dùl gơnoar broă lơi, ồng kung lơh ngan ờ bòl glar nàng bơtàu tơnguh rài kis bơh làng bol dê, ai ƀòn lơgar Hồ Đắc Kiện sùm tam gơl pa. Dùl tàm ală tềl lời wơl dờng ngan rlau jơh bơh ồng dê tàm tơngai do là chồl pràn broă lơh rbòng dà nàng lơh niam tiah ù thiòng, rào mbring ù, lơh geh bơta nàng làng bol in lơh kòi geh 2 kàl pah nam. Kơnòm bơh hơ̆, priă lơh geh bơh cau lơh broă sa dê geh tam gơl uă ngan, muh mat ƀòn lơgar kung rơ hời geh tam gơl, broă lơh sa suơn sre kung hời rơ hời gơ gơs bơta pràn bơh Hồ Đắc Kiện tus tŭ do dê.

Ồng Lê Minh Đuông kah wơl: “Hồ Đắc Kiện tơnơ̆ tŭ tơngklàs là ù tiah thiòng lơyah mbring, ù lời gời, làng bol he dê uă ngan kis mờ broă kŭp tras ka, sre lơh ờ geh cồng nha, den tàng ờ gŏ cau lơi lơh ờ, cồng nha tơnhào mìng lơh geh bơh 100 tus 120 kĭ dùl sào. Wa là cau tus bal sơn rờp ngan rlau jơh bè lơh niam wơl ù tàm Hồ Đắc Kiện, sền bè lơh rbòng dà nàng tơnguh kàl tam phan. Tơngai bơh nam 1976 tus 1985, tŭ hơ̆ wa at gơnoar broă Phó Củ tịc, den Củ tịc Anih duh broă làng bol sàh neh lơh pràn lơh niam wơl ù tiah do, bơto pơlam làng bol lơh sa, lơh niam broă lơh sa suơn sre jat gùng dà broă lơh bơh Cíñ phủ dê”.

 Nam 2012, ồng Đuông rê rlô jơh sơnam lơh broă, mơya nùs nhơm “cau ling Wa Hồ” tàm ồng dê ờ hềt tŭ lơi jơh. Ờ bài ơm rlô, ồng Lê Minh Đuông, bulah cèng tàm să jan bơta sồt să, jê rah jê ram tàm ală tŭ nhơm trồ tiah tam gơl, ồng kung gam pơn jat tai mut lơh broă bal bơh ƀòn, bơh sàh dê. Nàng ngui niam ù tiah geh bơta pràn bè broă lơh sa suơn sre, ngan là lơh kòi sre, ồng gam hòi jà làng bol lơh kòi tơrgùm bal, tam kòi gơ gơs kòi phan bơna dờng bơh broă tơnggơs mpồl lơh broă bal lơh broă sa suơn sre. Bơh broă lơh mpồl lơh bal do, làng bol gĭt ngui bơta chài măi mok, ngui sơntìl neh geh sền gĭt, kòi tơnhào uă, kòi bơkah pơn rơ, phơng sih, bơta chài tam phan, is ồn geh dờp tăc bro phan bơna, kòi geh kàl tơnhào uă, giă tăc bè ờs, priă cồng gơguh uă. Ồng Đuông pà gĭt tai: “Tŭ do cồng nha tơnhào gơguh rao, bơh 6 tus 8 tấn dồ lồ, is ồn bơta chài lơh broă sa suơn sre bơh cau lơh broă sa tŭ do là uă ngan, geh mờng chài rơ̆ ru, den tàng cồng nha lơh geh sùm. Gơwèt mờ jak chài măi mok den cau lơh broă sa khin cha ngui, tŭ do gơtùi đơs rlau 80% cau lơh broă sa geh bơta gĭt wă niam ngan bè lơh kòi”.

Bơta pal jờng rơ uă ngan tàm cau ling sồt să ồng Lê Minh Đuông dê hơ̆ là tàm sơnam neh 70, ồng kung gam ngai lơi kung bè ngai hơ̆ bal mờ làng bol lòt còp ƀlàng sre, tàm bơyai mờng chài lơh broă sa, dong kờl bơta chài tam phan ai rơnàng kơnòm să in. Ồng sùm là cau lam lài tàm jat ngui bơta chài pa tŭ do mut tàm broă tam phan, is ồn tàm jơh ală broă lơh kòi ndrờm geh lơh mờ măi mok lơm den tàng kàl tam phan lơi kung lơh geh cồng nha tơn hào uă, priă cồng uă ngan.

Ờ mìng là cau ling gàr kơ̆ nùs nhơm jơh nùs lơm, ồng gam là kwang bàng lơh krơh niam, cau lơh broă sa jak mờ là krơh niam ai rơnàng kơnòm să in bơsram bal. Ală bơta lơi mờ ồng Lê Minh Đuông neh mờ gam lơh ờ mìng là cơng tàng loh làng ai nùs nhơm “Cau ling sồt să bulah să jan ờ pràn mơya kung gam gơtùi lơh broă” mờ gam là jơnau yal niam bè bơta pràn nùs nhơm kis, nùs nhơm kờñ gơboh Dà lơgar mờ bơta tă pơgồp sùm kơlôi sơnơng ai ƀòn lơgar, Dà lơgar in. Mờ ală tă pơgồp bơh să tờm dê, ồng Lê Minh Đuông geh Đảng mờ Dà lơgar jờng rơ pà khà jờng Gai lòng tam lơh tam dră mờ bol sò tơm lơgar Mỹ khà 2, Gai lòng sền gàr lơngăp lơngai Dà lơgar, Gai lòng 50 nam sơnam Đảng, bal mờ uă ƀằng khen, sră jờng rơ ndai... Ồng Nguyễn Văn Mỹ, Củ tịc Anih duh broă Làng bol sàh Hồ Đắc Kiện, ƀòn dờng Cần Thơ, pà gĭt: “Cau ling yau là dùl tàm ală gah broă, mpồl cau lơh krơh niam ngan, uă cau tàm mpồl tơnguh broă lơh sa nàng rcang lài bơtàu tơnguh lơh sa hìu bơnhă, tàm hơ̆ geh uă cau ling yau gơwèt mpồl là cau lơh sa jak, lòt lài tàm bơtàu tơnguh lơh sa, bè lơh kòi rcang lài tơnguh uă bơta gĭt wă, bơtàu tơnguh bơta chài, măi mok, ngui măi mok pa mờ jơnau kờñ tơrmù ƀà priă tă lơh, tơnguh priă lơh geh, bơh hơ̆, khi là ală krơh niam nàng làng bol in bơsram mờ lơh jat bal”.

Mờ nùs nhơm “Cau ling Wa Hồ”, “Cau ling sồt să bulah să jan ờ pràn mơya kung gam gơtùi lơh broă” ờ mìng là lơh sa jak lơm, cau ling yau, cau ling sồt să ồng Lê Minh Đuông gam là cơng tàng niam ngan ai nùs nhơm sơrlèt gan kal ke, nùs nhơm kờñ gơboh Dà lơgar mờ bơta kơ̆p kờñ tă pơgồp.