Tàm dơ̆ tìp 2 gah chờ hờp tềng đap bơta bơtàu tơnguh ngan ngồn bơh bơta gĭt gơ̆p đah Nhờk mờ Việt Nam mờ kơ̆p kờñ, dơ̆ tìp mat dơ̆ do rơ̆p là tŭ tơngai niam nàng 2 gah in sơlơ tơnguh tai mờ lơh jrô ơnàng rlau tai lơh broă bal tàm rài tơnơ̆ do. Bè đah he, ồng Đỗ Văn Chiến jờng rơ uă ngan bơta bơtàu tơnguh sùm bơh bơta gĭt gơ̆p đah 2 gah tàm jơh ală gah, jat tàm bơta pin dờn cíñ trị ngai sơlơ uă, bơta gĭt gơ̆p do neh gơ gơs rùp rài geh cồng nha bơh lơh broă bal đah 2 gah dê.

Ồng Đỗ Văn Chiến pà gĭt, Nhờk gam là lơgar lơh broă bal sồ 1 bè dong kờl bơtàu tơnguh jat broă lơh (ODA) mờ cau lơh broă, dơ̆ 3 bè bơcri priă mờ lòt nhơl, dơ̆ 4 bè kă bro phan, tàm khà ală lơgar lơh broă bal ală lơgar bơh Việt Nam dê. Củ tịc Anih duh broă Mặt trận Dà lơgar Việt Nam kung kơ̆p kờñ bơta gĭt gơ̆p lơh broă bal đah 2 gah rơ̆p pơn jat tai bơtàu tơnguh pràn kơl dang rlau tai tàm rài tơnơ̆ do.