Di dơ̆ lòt còp kấp Dà lơgar Kộng hoà Ai Cập, Củ tịc lơgar ồng Lương Cường mờ pơ ùr bal mờ ala mat mpồl kwang bàng kấp dờng lơgar Việt Nam neh tìp mat kwang bàng, cau lơh broă Kwang atbồ anih lơh broă ala mat lơgar ndai, ală anih lơh broă mờ ala mat mpồl bơtiàn cau Việt Nam kis tàm Ai Cập. Tàm nùs nhơm rềp mềr, ram mhŭ, ala mat kwang đơng lam bồ Đảng mờ Dà lơgar, Củ tịc lơgar ồng Lương Cường pơyoa tus jơh gùt mpồl bơtiàn cau Việt Nam gam ơm kis, bơsram mờ lơh  broă tàm Ai Cập, ală kwang bàng, cau lơh broă Kwang atbồ anih lơh broă ala mat lơgar ndai lơgar Việt Nam bal mờ hìu bơnhă ală nùs nhơm jơh nùs mờ ală jơnau gờm chờ niam bơnĕ ngan rlau jơh.

Yal mờ làng bol cau Việt Nam kis tàm Ai Cập, Củ tịc lơgar pà gĭt tơnơ̆ mờr 40 nam tam gơl pa, Việt Nam gam pin dờn cơn đoà mut tàm rài pa, rài bơtàu tơnguh pas pràn mờ pas gơs, lơh ngan gơ gơs lơgar gam bơtàu tơnguh geh lơh sa mờ măi mok pa ngan, priă lơh geh kờp bal uă tàm nam 2030, mờ tus nam 2045, gơ gơs lơgar bơtàu tơnguh, priă lơh geh uă. Củ tịc lơgar pin dờn làng bol rơ̆p pơn jat tai lơh jat niam bơhiàn kờñ gơboh dà lơgar, tàm sơm bat tê bal bơt bơtàu mpồl bơtiàn bơtàu tơnguh, kơ̆ kơl jăp pràn kơl dang, lơh jat adat boh lam mờ mut gơ rờm bal niam tàm mpồl bơtiàn lơgar gam ơm kis, tă pơgồp jơh nùs tàm bơta bơtàu tơnguh bơh Ai Cập dê kung bè bơta gĭt gơ̆p lơh bơyô bal đah 2 lơgar; mơkung sền gàr dà đơs Việt Nam mờ niam chài ờs mờng bơh jơi bơtiàn dê, mblàng lời wơl ai ală rơnàng oh kòn kòn sau tơnơ̆ do in.