Tơnơ̆ tŭ tus càr lơgar Dakar, lơgar Kộng hòa Senegal, Củ tịc Quôk hội ồng Trần Thanh Mẫn mờ Pơ ùr bal mờ Mpồl kwang bàng kâp dờng lơgar he neh geh dơ̆ tìp mat, tơm boh bơr mờ kwang bàng Anih lơh broă ala mat lơgar Việt Nam, mpồl bơtiàn cau Việt Nam tàm lơgar Senegal, nàng kờñ mblàng yal bè broă lơh cau Việt Nam tàm lơgar ndai tàm bơta pa. 

Tàm dơ̆ lòt còp ngan ngồn lơgar Kộng hòa Senegal dơ̆ do, Củ tịc Quôk hội ồng Trần Thanh Mẫn mờ Pơ ùr bal mờ Mpồl kwang bàng kâp dờng lơgar he rơp geh ală dơ̆ tìp mat, pơrjum bơyai mờ kwang đơng lam bồ kâp dờng bơh lơgar Kộng hòa Senegal dê; tus bal Dơ̆ kĭ sră nggal lơh broă bal đah 2 Quôk hội; tus bal dơ̆ yal crơng gơs mpồl nghị sỹ lơh bơyô bal Việt Nam – Senegal; tus bal cribơyai broă lơh adat boh lam bè chồl pràn lơh broă bal broă lơh sa suơn sre, kă bro phan, bơcri priă đah Việt Nam mờ Senegal.