Mho òr (29/07), (jăt jơ tàm tiah do), tàm Hìu lơh broă Liên hợp quốk tàm lơgar Thụy Sỹ, di dơ̆ tus Pơrjum ală Củ tịc Quốk hội dunia dơ̆ 6, Củ tịc Quốk hội ồng Trần Thanh Mẫn neh geh dơ̆ tìp măt mờ Kwang lam bồ dờng Cơl dŭ lơh broă Liên hợp quốk mò Tatiana Valovaya tàm Geneva, lơgar Thụy Sỹ.

Tàm dơ̆ tìp, Củ tịc Quốk hội ồng Trần Thanh Mẫn đơs nền lơgar Việt Nam sùm kờñ bal pràn ngan mờ nùs nhơm uă lơgar mờ rơ̆p pơn jăt tai tus bal, pơgồp bal ngai sơlơ pràn rơlao tàm ală broă lơh bơh Liên hợp quốk dê. Lơgar Việt Nam gam kờñ tơlik măt tai nàng geh pồ tàm Mpồl duh broă Gơnoar kòn bơnus tơngai lơh broă bơh nam 2026 tus 2028, di lah geh pồ lơgar Việt Nam rơ̆p geh uă broă lơh mờ bơceh lơh nàng tơnguh gơnoar bơh anih lơh broă do tàm bơta ală lơgar geh uă tam gơl mờ bơta lòng bè tŭ do. Kwang Lam bồ dờng mò Tatiana Valovaya ưn ngài lơgar Việt Nam neh kờñ ală broă lơh bal bơh Liên hợp quốk dê, tàm hơ̆ geh broă lam lài dờp jơnau bơceh lơh ràng tơlik 17 mă cau ùr pơnrơ jăk tàm broă lơh jăt ală Jơnau kờñ bơtàu tơnguh kơl jăp. Mò đơs niam gơnoar broă, broă lơh pràn bơh mpồl kwang bàng lơgar Việt Nam dê tàm ală mpồl lơh broă Liên hợp quốk kung bè tàm ală broă lơh bal. bàr gah ring bal geh pơn jăt tai lơh pràn bơta git gơ̆p đah lơgar Việt Nam mờ Liên hợp quốk tàm tơngai tus.