Dơ̆ pơrjum geh pờ tơlik tàm internet tus 34 càr, ƀòn dờng tàm gùt lơgar, 3 rơbô 321 sàh, sơnah ƀòn, tiah is ồn tàm gùt lơgar.

Thủ tướng đơs loh, gơrềng bơh tam gơl trồ tiah neh lơh nhơm trồ tiah, rềs àr gơtìp ngai sơlơ ni sơna, ờ niam, kal ke tàm broă kờñ git lài; gơwèt mờ mìu càl dờng sồ 3 nam do, bŭ lah ală kấp, ală gah lơh broă, ală tiah tàm gùl lơgar neh rơcang lài lơh tàm broă kơrian rềs àr, yal lài, mblàng yal nàng làng bol in rơcang lài pleh mờ mìu càl dờng, tơrmù uă ngan hoàc huơr. Mơya, mìu càl dờng neh tus tàm càr Nghệ An mờ khà mìu sơr lơh aniai uă ngan. Thủ tướng sồr tam pà kơnòl broă pơlam, sồr lơh kơrian mờ rềs àr di pal, tam pà kơnòl bơh ală cau tàm Mpồl Sồr lơh mờ nùs nhơm “loh cau, loh broă, loh kơnòl, loh broă lơh, loh cồng nha, loh gơnoar”, nàng bơh tŭ hơ̆ sền wơl nàng git di mờ bơta gơlik geh. Thủ tướng kug sồr gơnoar atbồ ƀòn lơgar bàr kấp lơh niam broă rơcang , drơng  rềs àr  bơh trồ tiah lơh aniai mờ jòi dong klàs cau gơtìp rềs àr.