Bơh tàm bồ nhai 7 nam 2025, Anih duh broă Làng bol sàh Ia Băng, càr Gia Lai neh rcang lài bơyai lơh ală dơ̆ pơrjum làng bol, yal gùng dà broă lơh bơcri priă lơh rơndăp broă lơh, iăt kơno bơta kơ̆p kờñ bơh làng bol dê. Tàm hơ̆, neh tơlik mat mpồl duh broă tơm priă, mơkung pơgồp bal niam mờ Mpồl Atbồ rơndăp broă lơh bơcri priă bơt bơtàu càr mờ mpồl bơto pơlam măi mok nàng rcang sơn tơ̆p jrong nhàr gơl gùng tàm nhai 8 nam 2025.

Ồng Nguyễn Trường Sinh, Củ tịc Anih duh broă Làng bol sàh pà gĭt, mờ gơnoar broă, kơnòl broă pa, sàh geh tus bal jrô tàm broă lơh tơm priă, ai ù, dong broă lơh geh bơsong mhar rlau:“Gùng dà broă lơh bơh Anih duh broă Làng bol dê là lơh jat bè hơ̆, jat bol añ là di pal ngan. Gơwèt mờ ală gơl gùng kơi sồ gùng lòt gan, bol añ rơ̆p rcang lài tàm broă tàm bơyai mờ làng bol, kung ƀuơn ngan sơl. Tàm hơ̆, Anih duh broă Làng bol càr kung sền gròi ngan, sồr ală Mpồl atbồ rơndăp broă lơh mờ mpồl lơh broă bơto pơlam jơh nùs pơgồp bal mờ sàh nàng bol añ in lam lơh bè lơi ai broă ai ù, tơm priă geh bơyai lơh mhar ngan rlau jơh, di pal ngan rlau jơh mờ lơh geh ală bơta ring bal tàm làng bol uă ngan rlau jơh.”

Ai tàm sàh Mang Yang, tiah geh 10,3 kơi sồ gùng rơndeh lòt mhar Quy Nhơn – Pleiku kờp dŭ lòt gan, geh rlau 400 hìu bơnhă làng bol tàm bă ù pal ai ù, tàm hơ̆ geh pơgăp 22 hìu bơnhă pal ntrờn tiah ơm kis pa. Ồng Võ Lê Xuân Thiện – Củ tịc Anih duh broă Làng bol sàh Mang Yang pà gĭt, sàh neh gờñ tơlik mat mpồl duh broă tơm priă mờ mpồl atbồ rơndăp broă lơh kấp sàh, pơgồp bal lòt sền, kờp sền tus lơh broă rơndăp lơh tơm priă: “Tơnơ̆ tŭ lơh jat broă lơh tơm priă, ai ù, gơwèt mờ 22 hìu bơnhă pal ntrờn tiah ơm kis pa, bol añ neh geh lài ù tiah nàng rơndăp jat di mờ jơnau sồr. Tiah ù ơm rềp tiah gùng rơndeh lòt mhar, den tàng kung ƀuơn ngan sơl tàm broă lơh lam lơh jat”.

Rơndăp broă lơh gùng rơndeh lòt mhar Quy Nhơn – Pleiku là broă lơh bơt bơtàu gùng lòt rê tờm bơh Dà lơgar dê, kờp jơh geh bơta jòng pơgăp 125 kơi sồ lòt gan càr Gia Lai. Rơndăp broă lơh kờp jơh geh priă bơcri lơh rlau 43 rơbô 700 tơmàn đong, kờp dŭ sơnđờm mut lơh tàm lồi nam 2025 mờ lơh sir tàm nam 2029. Gơl gùng lòt gan 17 sàh, sơnah ƀòn bơh càr Gia Lai dê, gơrềng tus rlau 3 rơbô hìu bơnhă làng bol tàm jơh gùt gơl gùng. Tàm hơ̆, geh gĭt nđờ rơhiang hìu bơnhă kờñ pal geh tiah ơm kis pa.

Ồng Nguyễn Tự Công Hoàng - Phó Củ tịc Anih duh broă Làng  bol càr Gia Lai đơs nền, tơm priă ai ù là broă lơh kal ke, sồr pal lam lơh niam ngan, jat di mờ bơta geh ngan. Càr neh crăp rcang ai priă bơh kes priă càr dê nàng lơh, mơkung sồr ngui broă lơh krơi is, ai tơn tiah lơh phan bơna bơt bơtàu mờ ƀlàng sang sồ siă, pơgồp bơnah bơsong mhar, rềp làng bol mờ di pal mờ bơta geh ngan bơh tơl tiah dê. Bơh hơ̆, broă tơm priă, dong kờl, ai tiah ơm kis pa kung geh lam lơh jat gùng dà ngăc  ngar, jat tàm jơnau kờñ mờ bơta kơ̆p kờñ di pal bơh làng bol dê.

Ồng Nguyễn Tự Công Hoàng pà gĭt:“Gơnoar atbồ ƀòn lơgar pal lòt sền tơn, sền gĭt loh: geh nđờ hìu bơnhă kờñ geh tiah ơm kis pa, nđờ bơtô ƀồc kờñ ntrờn, tiah ntrờn bơtô ƀồc tiah lơi, bơta kơ̆p kờñ bơh làng bol dê là bè lơi, di pal tàm tiah lơi den rơndăp tiah ơm kis pa tàm tiah hơ̆, pal geh bơh jơnau kờñ ngan ngồn bơh làng bol dê. Tơnơ̆ tŭ ring bal rao den pal ơpah cau bơto pơlam mơ tơn  nàng rơndăp ù tiah ai tiah ơm kis pa in, cih tàm jơnau yal kơlôi sơnơng geh bơta pràn lơh jat bơh rơndăp broă lơh gùng rơndeh lòt mhar Quy Nhơn – Pleiku dê. Jơh ală tiah ơm kis pa pal geh cih bal den hơ̆ sồng geh priă jền nàng lơh jat. Añ sồr broă do pal geh lơh mhar ngan mờ gơ jal ngan”.

Broă rcang lài nền nòn ai rơndăp broă lơh in pà gŏ nùs nhơm lơh ngan cíñ trị uă bơh càr Gia Lai dê tàm lam lơh rơndăp broă lơh gùng rơndeh lòt rê tờm, lơh geh bơnàng jă nàng tàm tơrbŏ bal, sơlơ tơnguh tai bơtàu tơnguh lơh sa- mpồl bơtiàn ƀòn lơgar tàm tơngai tus.