Croh dà Ea Tuôr kàl do dà dơng ngơr lơm, hiòng dà hòr rơtik rơtok gơlòt rơliêt jăt ală pơnai lŭ hòn bềng jơi ñhơ̆t rơtồñ tơrlir lơm. Tềng hơđơm tờm chi Kơ Nia dờng ngan neh rlau rơhiang sơnam, ồng Y Wer Ktul, Lam bồ ƀòn Tuôr, sàh Hoà Phú gơdan ngan tai tài bơh ƀòn he dê gam tam gơl sơrbăc mhar ngan. Làng bol tàm ƀòn mìng kwèng mờ mìr mờ sươn lơm, kơphê, tiêu tŭ do neh gĭt bơyai lơh lòt nhơl mpồl bơtiàn bềng bơhiàn niam chài krơi is kòn cau Rơđê dê. Mờ broă lơh pa, làng bol bơtàu tơngguh lơh sa ndang mờ kung gàr geh niam chài ƀòn lơgar dê tai, nàng săp ntas mồng, săp ntas cing, săp đơs crih gơ kơno dờng sùm tàm gùl brê bơnơm dờng ơning ơnàng Tây Nguyên dê.

“Lài ngan dan ưn ngài Dà lơgar neh ai tơl bơta dong kờl ai làng bol bè bol hi in. Bè broă tơmŭt bal kâp sàh, gơn kơnờm tàm tơngai tus kâp sàh, kâp càr sền gròi bơcri priă lơh ơnàng gùng lòt nàng làng bol in lòt rê gơ in ƀươn, mờ bơ̆t bơtàu bơtơ̆t tơnau dơng dà drơng nàng tuh dà ai chi tam in mờ bơtàu tơngguh lòt nhơl. Ai tơl bơta ai làng bol in lơh broă tàm ñrùh geh tiah hòi là liang dà Drai Nur, ñrùh dà Gia Long nàng lùp bơsram broă chài lơh lòt nhơl. Kơ̆p kờñ sàh pơn jăt tai dong kờl dùl bơnah kes priă bơcri bơtàu tơngguh lòt nhơl nàng năc lòt nhơl in lòt còp sền gŏ khi gŏ ƀòn lơgar he ngai sơlơ bơtàu tơngguh pas niam”.

Tàm tŭ hìu bơnhă ồng Y Wer, Lam bồ ƀòn Tuôr ờ ru ngan tŭ nàng lơh wơl hìu rơng ờs mờng bơh yau bơh pô me dê lời wơl nàng lơh anih rò năc lòt nhơl, den ngài mờ anih hơ̆ di pơgăp bàr pe jơ̆t cơnđoà jơng lòt, hìu bơnhă bi H Belly Êban kung lơh drơng broă kă bro homestay tàm dùl nơm hìu rơng ờs mờng bơh yau. Bi H Belly pà gĭt, homestay bi dê mìng drơng năc lòt nhơl lơgar ndai lơm. Bơh chờm, bi kơlôi lơh broă lòt nhơl kal ke ngan mơya tŭ ngan ngồn mŭt lơh broă, bi gŏ gơlơh wơl gơ bè ờs ngan, dềt rơhền ngan: “Ưn ngài Dà lơgar ai tơl bơta ai bol hi in geh wă rò năc tàm lơgar mờ bơdìh lơgar. Homestay Kathy kờñ yal tơnggĭt ai jơh tơl nă cau in, đơs mờ jơh tơl nă cau geh hìu rơng den bol he prăp gàr wơl, lơh homestay yal tơnggĭt ai năc lòt nhơl in lòt còp mờ gĭt tus niam chài kòn cau kòn cau Rơđê he dê. Nàng ai oh kòn kòn sau bol he dê in gĭt mờ prăp gàr niam chài ờs mờng bơh yau bơh ồng pàng bơh rài yau dê là hìu rơng, broă tàñ ồi yau, là dà đơs mè deh dê. Añ chờ hờp ngan tài bơh geh wă rò năc lòt ndai tus homestay Kathy, khi bơsram dà Rơđê, soh phan kòn cau he dê”.

Sàh Hoà Phú geh tơnggơs jăt tàm bơta tơmŭt bal 3 sàh: Hoà Phú, Hoà Khánh, Hoà Xuân, bă ù geh is ơnàng rlau 109 kơi sồ vuông, khà kờp làng bol mờr 50 rbô nă cau, là tiah ơm kis jŏ rài bơh ală ƀòn kòn cau Rơđê dê, geh dà dờng Srepok mờ ală croh dà dờng lòt gan, geh bơta ƀươn uă bè bơtàu tơngguh lòt nhơl. Tơnơ̆ tơmŭt bal, rơndăp tăp sèng wơl mpồl lơh broă sră pơ àr gơnoar ătbồ, sàh neh gĭt nền rơ̆p rơcăng lài jòi tus làng bol, rơcăng lài rê hờ ƀòn lơgar nàng iăt kơno bal bơta kơlôi sơnơng, bơta kơ̆p kờñ, jơnau đơs, jơnau dan bơh làng bol dê…mờ rlau jơh là tàm bơyai bal broă bơtàu tơngguh lơh sa mờ bơta pràn, bơta ƀươn neh geh lài. Ồng Đỗ Xuân Hiếu, Phó Củ tịc Anih duh broă Làng bol sàh Hoà Phú, pà gĭt: “Gơnoar ătbồ tŭ do là gơnoar ătbồ drơng broă, ala tài nggui ơm kơ̆p làng bol den gơnoar ătbồ pal lòt tus mờ làng bol, mpồl lơh sa kă bro. Rơcăng lài gĭt geh jơnau kờñ bơh làng bol dê, mpồl lơh sa kă bro dê nàng he geh broă lơh dong kờl, geh ală broă rơndăp lơh, rơndăp broă nàng hơ̆ sồng lơh geh jơnau kờñ bơh làng bol dê”. 

Bal mờ bơtàu tơngguh lòt nhơl, drơng broă ala, tàm tơngai lơh broă pa do, Đảng ƀộ sàh Hoà Phú kung gĭt nền tam gơl ntrờn mhar rơndăp tăp sèng lơh sa tus lơh sa mờ măy mŏk, bơ̆t bơtàu, nàng lơh gơs phan bơna tiah drà lơh sa mờ măy mŏk pa ngan. Bơh hơ̆, gờñ lik klàs bơta kơnờm uă tàm broă lơh sa sươn sre bè tŭ do, mờ lơh gơlik geh bơnàng jă kơ̆ kơnhăp nàng gơgơs tiah drà lơh sa mờ măy mŏk tàm nam 2035. Ồng Phạm Tiến Hưng, Ƀí thư Đảng ủy sàh Hoà Phú, càr Dăk Lăk, yal, mờ ală pơlam gùng mờ ală broă lơh jŏ jòng bè lơh sa mờ măy mŏk, drơng broă ala, broă lơh sa sươn sre măy mŏk pa, sàh Hoà Phú pơnđơl tơrmù rơhời kơnờm tàm kes priă càr dê, dà lơgar dê, wèt tus rơcăng lài is bè kes priă, gơgơs bơta gơn kơnờm gơguh lơh sa càr Dăk Lăk dê.

“Bơta kal ke ngan rlau jơh bơh sàh Hoà Phú dê hơ̆ là lơh bè lơi tàm 05 nam tus muh măt bè phan bơna, rài kis làng bol dê pal geh bơta tam gơl loh làng, nàng đơs nền broă bơ̆t bơtàu gơnoar ătbồ 2 kâp Dà lơgar dê là àng sơrdah mờ geh cồng nha”.

Bơh dùl sàh broă lơh sa sươn sre, Hoà Phú ngai do gam ơn ală bơnàng jă bơh sơnrờp tàm gùng lòt gơgơs tiah drà lơh sa mờ măy mŏk- drơng broă ala bềng bơhiàn niam chài krơi is, là tiah tờm gơn kơnờm tiah đah Jum càr Dăk Lăk dê. Gùng lòt hơ̆ ngan ngồn gam uă kal ke, mơya mờ bơta kơ̆p kờñ ngan brồ guh, jơh nùs cíñ trị loh làng mờ bơta dùl nùs bal bơh làng bol dê, Hoà Phú gam pờ àng bơta pin dờn pa tàm cồng nha lơh geh bơh broă lơh gơnoar ătbồ ƀòn lơgar 2 kâp dê, di ngan, di tŭ mờ di nùs làng bol dê.