Ngai 07/8, tàm Hìu lơh broă Cíñ phủ, Thủ tướng Cíñ phủ ồng Phạm Minh Chính neh đơng lam dar pơrjum Cíñ phủ ờs mờng nhai 7. Pơrjum geh pờ tơn tàm internet mờ 34 càr, ƀòn dờng gơ wèt dà lơgar. Tàm dar pơrjum, Thủ tướng ồng Phạm Minh Chính đơs sùm, gùt lơgar neh lam lơh broă lơh gơnoar atbồ ƀòn lơgar 2 kâp; lơh geh gơguh lơh sa bơh 8,3% mờ rơcang lài drơng wơl mờ broă lơh dia tac blơi phan mờ lơgar ndai bơh lơgar Mỹ dê; Kràñ cê lam lơh “4 broă tờm” jat ală jơnau lơh nền tàm pơrjum bơh Ƀộ Cíñ trị dê; rơcang pơrjum dờng Đảng ală kâp, wèt tus Pơrjum dờng Đảng dơ̆ 14; bơyai lơh tơngkah 78 nam Ngai cau ling sồt să – cau chơt màng mờ jơh nùs rơcang ai dơ̆ bơyai lơh chờ dờng tơngkah 80 nam Ngai sơntờm dà lơgar…; rơcang lài pleh mờ trồ tiah lơh aniai, sền gàr màng kis, phan bơna làng bol, bơsong mhar ngan rlau jơh jơnau gơ lời wơl bơh trồ tiah lơh aniai.

Tàm tŭ tơngai kal ke, kơnờm bơta lơh ngan bơh jơh gùt anih lơh broă cíñ trị dê, broă lơh sa mpồl bơtiàn pơn jat tai gơguh niam, nhai tơnơ̆ niam rlau mờ nhai lài, kờp bal 7 nhai niam rlau mờ dùl tŭ bal nam 2024. Bulah bè hơ̆, Thủ tướng kung đơs loh ală kal ke, bơta lòng, mờ kung sồr ală ƀộ, gah broă lơh, ală tiah pơn jat tai lam lơh ală broă lơh lơh pa ală bơta gơn kơnờm gơguh lơh sa nàng lơh gơtùi jơnau kờñ bơh 8,3 tus 8,5% tàm nam 2025. Sền sơ wì broă tơrmù sră pơ àr gơnoar atbồ, lơh  gơlik bơta ƀuơn ai mpồl lơh sa kă bro, làng bol in bơtàu tơnguh lơh sa nă să is.