Ngai òr (08/06), tơnơ̆ Dơ̆ wă rò ngan ngồn, tàm Hìu lơh broă Chính phủ, ồng Lê Minh Hưng, Thủ tướng Chính phủ mờ ồng Anutin Charnvirakul, Thủ tướng lơgar Thái Lan neh lam lơh pơrjum bơyai. Bàr Thủ tướng ai tơnggŏ bơta niam nùs tềng đap bơta bơtàu tơnguh pràn ngan bơh bơta git gơp đah Việt Nam mờ Thái Lan tàm 50 nam do, kờp bơh tŭ tơng gơs bơta git gơp cribơyai broă mờ lơgar ndai tàm nam 1967; đơs là bơta git gơp đah 2 gah tŭ do gam tàm tŭ tơngai bơtàu tơnguh niam ngan rlau jơh bơh lài tus tŭ do, mờ bơnàng jă pin dờn chính trị kơ̆ kơljap, lơh broă bal lơh sa ngac ngar mờ tìp mat lơh kwèng làng bol ngai sơlơ đềt mềr.

Tàm gah lơh sa, bàr nă kwang đơng lam bồ ring bal lam lơh geh cồng nha Broă rơndap lơh “Pe tơrbŏ bal”; chồl tơnguh tàm tơrbŏ bal gùng lòt, logistics, gah rơndeh par mờ lòt nhơl; kơlôi sơnơng lam lơh ală gơl gùng jun pơndiang gùng ù gờl, gùng tàm dà kềng gah dà lềng tàm tơrbŏ bal 2 lơgar mờ tiah dềt Mekong; lơh geh cồng nha gùng dà Anih duh broă bal kă bro phan Việt Nam - Thái Lan; tơrmù ƀà ală bơta kòl yan kă bro phan, lơh gơlik bơta ƀuơn ai phan bơna geh mut tàm drà bơh gơp dê; lơh ngan mhar lơh geh jơnau kờñ priă lơh geh bơh kă bro phan geh 25 tơmàn dolar Mỹ mờ wèt tus lơh geh 50 tơmàn dolar Mỹ jat gùng dà ring bal, kơ̆ kơljap. Bàr Thủ tướng đơs nền bơta lơh ngan lam lơh jat geh cồng nha ală jơnau ring bal lơh geh, lam bơta git gơp Lơgar lơh broă bal jŏ jòng tơl làm Việt Nam - Thái Lan bơtàu tơnguh ngai sơlơ niam bơnĕ, ngan ngồn mờ geh cồng nha, tă pơgồp uă ngan ai ring lơngai, kơ̆ kơljap, lơh broă bal mờ bơtàu tơnguh tàm tiah do.