Lơh jăt jơnau sồr sồ 24 bơh Ƀộ Cíñ trị dê bè broă pơn jăt tai jòi, tơrgùm ƀồc ntìng cau ling chơ̆t màng tus tŭ do, Mpồl do neh dong kờl jòi mờ gùng dà broă lơh mùl gŏ mờ git đal ƀồc ntìng cau ling chơ̆t màng gam ờ git đal mờ broă sền AND, sơnđan wơl măt 1 rơbô 250 nă cau ling chơ̆t màng in.

Dong kờl ntrờn rơlao 1 rơbô 600 ƀồc ntìng cau ling chơ̆t màng bơh ală ƀlàng tơ̆p ƀồc cau ling chơ̆t màng rê cèng tơ̆p hờ ƀòn lơgar tờm. Đơs tàm dơ̆ lơh broă, Phó Củ tịc Quốk hội ồng Trần Quang Phương pà git, drơng gàr cau geh màng mờ dà lơgar đơs bal mờ cau pròc mhàm, hìu nhă cau ling chơ̆t màng đơs is, do ờ mìng là nùs nhơm niam, geh kơnòl, là jơnau kờñ ưn ngài mờ gam là broă pơn jăt tai, ai geh bơta pràn nùs nhơm, tơnguh bơta niam rùp rài bè bồ tơngoh, nùs nhơm kờñ krơi is jơi bơtiàn tàm rài pa, mờ do là bơta pràn ai dà lơgar in. Mờ broă bơtàu tơnguh bơh tam gơl sồ, măi mok pa, tơnơ̆ mờ tŭ neh lơh geh Anih prăp gàr gene cau ling chơ̆t màng, Phó Củ tịc Quốk hội kơ̆p kờñ rơ̆p jòi geh tai uă ƀồc ntìng cau ling chơ̆t màng tàm tơngai tus.