Ngai òr (04/08), tàm Hà Nội, Tổng Ƀí thư ồng Tô Lâm tus mờ geh jơnau đơs tàm dơ̆ tìp măt ală cau geh pơnrơ jăk tàm gùt mpồl Kwang àng làng bol tus Pơrjum dờng Pơrlòng “Tài bơta Lơngăp lơngai Dà lơgar” dơ̆ IX. Tổng Ƀí thư tơlik nùs nhơm ngoh rơngăc, dờp mờ tam pà bal gơwèt mờ ală cau geh pơnrơ jăk neh phi să, sồt să tàm broă lơh jăt kơnòl broă; ală kwang bàng, cau ling đềt mềr jơh rài kis mờ broă tam dră rơcang gàr cau tìs, ma tuý mờ uă bơta ngòt rơngơ̆t; ală kwang bàng, cau ling lơh broă nùs nhơm dong kờl is, lam lài lòt lơh broă tàm ală sàh tiah nhàr lơgar, tiah ngài; ală cau ling ờ ngòt ồs sa, dà cò nàng dong klàs cau, dong klàs phan bơna; ală cau lời ing bơta gơgoh gơbài krơi is să tờm nàng lơh jăt kơnòl broă, sền gàr rài kis lơngăp lơngai làng bol in;…

Tổng Ƀí thư ồng Tô Lâm sồr pơn jăt tai lơh geh cồng nha broă lơh gùt làng bol sền gàr bơta lơngăp lơngai Dà lơgar; jờng rơ, pơn jờng, lơh geh uă cau pơnrơ jăk, cau lam lài “cau jăk, broă jăk” lơh geh nùs nhơm pơnyờ să, tơnguh bơhiàn ờs mờng Khin cha jăk chài kăc màng, ai geh bơta pràn lơh pràn kwang bàng, cau ling sùm bơsram tàp, lơh ngan pơrlòng, lơh ngan lơh geh cồng nha kơnòl broă sền gàr lơngăp lơngai, bơ̆t bơtàu mpồl Kwang àng làng bol kloh niam, pràn kơl dang, jăk chài, ngăc ngar, lơh pa, pơgồp bal tàm broă bơ̆t bơtàu mờ sền gàr Dà lơgar tàm bơta pa. Di tàm dơ̆ do, Tổng Ƀí thư ồng Tô Lâm bal mờ Ƀộ trưởng Ƀộ Kwang àng ồng Lương Tam Quang neh jào pà phan ală cau geh pơnrơ jăk tàm mpồl Kwang àng làng bol mờ cau geh pơnrơ jăk tàm mpồl sền gàr lơngăp lơngai tàm ală tiah in.