Tàm cơldŭ kŭp săp đơs Anih lơh broă sùm tiah Tây Nguyên- Anih Jơnau đơs Việt Nam dê, săp đơs sùm mờ ram mhŭ bơh bi H’Nê̆c Êñuôl dê, đảng viên pa, cau mblàng jơnau, cau sền swì jơnau kòn cau Rơđê kung gam kơno sùm pah ngai. Bơh rơdio pờ tơlik jơnau đơs, ală gùng dà, broă lơh Đảng dê, Dà lơgar dê tus geh mờ ală ƀòn lơgar ngài ngan, tiah pờ tơlik jơnau đơs là jơnau tàm tơrbŏ kwơmàng tàm tơrbŏ bơta pin dờn bơh làng bol ală jơi bơtiàn dê tus mờ Đảng. Bi H’Nê̆c, đơs: “Deh mờ dờng tàm ƀòn lơgar, añ sơlơ wờng dà đơs làng bol kòn cau he dê kwơmàng bè lơi. Tơl jơnau yal tơnggĭt jơnau, tơl jơnau ndrờm geh bol hi lơh ngan mblàng đơs mờ jơnau đơs rềp mềl, ƀươn wă nàng gùng dà, broă lơh Đảng dê, Dà lơgar dê tus rềp rlau mờ làng bol. Bơh ngai mŭt Đảng, añ sơlơ gŏ loh kơnòl bơh cau lơh ƀăo, lơh jơnau đơs mblàng tàm rơdio dê mờ hừh nùs ngan tài geh pơgồp bơnah gàr kơ̆ bơta pin dờn bơh ƀòn lơgar dê mờ Đảng”.

Dilah săp đơs là jơnau tàm tơrbŏ bơta pin dờn den niam chài ngan là nggu rơyas bơh tam klăc dê. Tàm sàh Cuôr Đăng, càr Dăk Lăk, bi H’Pha Ayun là đảng viên kơnòm să, lài do là Ƀí thư Đoàn sàh, tŭ do là cau mờng lơh broă Cơldŭ lơh broă Đảng ủy sàh- sùm jơh nùs jơh tồr hòi jà ơruh pơnu prăp gàr bơta niam chài chài ờs mờng bơh yau, mơkung gơ jăt bal mờ bơtàu tơngguh lơh sa mpồl bơtiàn. Bi H’Pha pà gĭt: “Sàh Cuôr Đăng neh lơh 2 mpồl cing mồng mờ đơs pơnđik ai ală bơyô ơruh pơnu in, nàng bơyô in wờng rlau bè niam chài cing mồng, jơnau pơnđik jơi bơtiàn he dê. Jơh ală bơyô tơnơ̆ tŭ mŭt bal tàm mpồl do ndrờm gĭt dròng cing jañ mồng, wờng rlau bè jơnau pơnđik. Bơh hơ̆, ală bơyô geh tus bal tìp măt lơh kwèng, pơgồp bơnah lơh gơrề uă bơhiàn niam chài krơi is jơi bơtiàn dê tus mờ jơh ală bơyô kơnòm să, ơruh pơnu tàm càr Dăk Lăk”.

Bal mờ sền gàr niam chài, rơnàng kơnòm să ală ƀòn lơgar tàm Dăk Lăk gam là mpồl lam lài tàm broă lơh tam gơl sồ- dùl kơnòl broă tờm kwơmàng mờ Đảng, Dà lơgar gam kràn cê jơh nùs lam lơh. Bi Y Lê Pas Tơr- Phó Ƀí thư Duh broă sùm Tỉñ đoàn càr Dăk Lăk pà gĭt, rơnàng kơnòm să jơi bơtiàn dồ êt nă cau ờ mìng kơ̆ bơta pin dờn tàm Đảng mờ gam lơh lài tam lơh jăt kơnòl broă pa, bè dong kờl làng bol lơh drơng broă dà lơgar tàm internet, dong kờl tăc phan lơh geh bơh sươn sre tàm drà kă bro phan điện tử: “Bol hi neh lơh ală mpồl dong kờl lơh broă gơnoar ătbồ bàr kâp, pơlam làng bol lơh drơng broă dà lơgar tàm internet. Ală jơnum măy mŏk mpồl bơtiàn lơh broă geh cồng nha loh làng tàm tiah sar, tiah ngài. Bơh hơ̆, rơnàng kơnòm să pơgồp bơnah kwơmàng tàm bơ̆t bơtàu ƀòn lơgar pa, tiah drà jak chài mờ bơtàu tơnguh kơ̆ kơl jăp”.

Gàr kơ̆ bơta pin dờn, sền gàr bơhiàn niam chài krơi is mờ rơcăng lài mŭt gơrờm bal, mpồl đảng viên kơnòm să cau jơi bơtiàn dồ êt nă cau tàm Dăk Lăk gam ngai sơlơ tơnggŏ gơnoar broă là mpồl cau lơh tàm tơrbŏ kơ̆ kơnhăp đah Đảng mờ Làng bol. Khi ngan là ală cau să tờm tơn ai jơnau lơh nền tàm pơrjum Đảng dê tus rềp rlau mờ rài kis ƀòn lơgar, pơgồp bơnah bơ̆t bơtàu ƀòn lơgar tờm pas sơm pràn kơldang, rài kis niam chài is mờ bơtàu tơngguh kơ̆ kơl jăp bal mờ dà lơgar.