Đảng ƀộ sàh Ea Mdroh là sàh tiah pôs đồng kăc màng tàm càr Dăk Lăk dê pa bơyai lơh Pơrjum dờng cau ala măt dơ̆ sơnrờp, tơngai lơh broă bơh nam 2025 tus 2030. Pơrjum dờng neh ai geh ală kơnòl broă, gùng dà broă lơh mùl màl nàng bơ̆t bơtàu geh cồng nha ƀòn lơgar pa tàm nam 2030.

Tơngai lơh broă pa tus nam 2030, Đảng ƀộ sàh Ea Mdroh ai jơnau kờñ lơh ngan bơ̆t bơtàu sàh do geh khà ƀòn lơgar pa; khà gơguh lơh sa pah nam bơh 8 tus 10%, kờp jơh priă lơh sa tus nam 2030 kờp dŭ geh 2 rơbô 900 tơmàn đong, priă geh tơl nă cau geh 80 tơlăk đong tàm 1 nă 1 nam… Pơrjum dờng yal jơnau lơh nền tàm pơrjum bơh Tỉñ ủy càr Dăk Lăk dê, sồr pồ Mpồl đơng lam Đảng ƀộ sàh Ea Mdroh tơngai lơh broă bơh nam 2025 tus 2030 geh 26 nă kwang bàng, Mpồl Lơh kơnòl broă sùm Đảng ủy sàh geh 11 nă kwang bàng. Mò H’ Giang Niê, Ƀí thư Tỉñ đoàn càr Dăk Lăk lài do at gơnoar broă Ƀí thư Đảng ủy sàh Ea Mdroh tơngai lơh broă bơh nam 2025 tus 2030.