Do là jơnau sồr bơh kwang đơng lam bồ càr Dăk Lăk dê tàm dơ̆ Tìp mat tàm bơyai tơngkah 70 nam Ngai bơhiàn ờs mờng gah atbồ dà lơgar bè jat yàng bơh Sờh Jơi bơtiàn mờ Jat yàng càr Dăk Lăk bơyai lơh. Càr Dăk Lăk tŭ do geh rlau 3 tơlak 300 rbô nă làng bol, tàm hơ̆ geh rlau 720 rbô nă cau jat yàng bal mờ 4 rbô nă cau duh broă yàng, rlau 270 rbô nă cau là cau jơi bơtiàn dồ êt nă cau. Jơh gùt càr geh rlau 700 anih pin dờn, 1 rbô 300 hìu jum, hìu phờk mờ anih pơrjum ală cau jat yàng.

Đal git pin dờn, jat yàng là jơnau kờñ gah nùs nhơm bơh ờ uă làng bol dê, gam mờ rơp gơ lòt bal mờ jơi bơtiàn, ồng Nguyễn Thiên Văn – Phó Củ tịc Anih duh broă Làng bol càr Dăk Lăk sồr Sờh Jơi bơtiàn mờ Jat yàng càr pơn jat tai lơh niam broă lơh tă pơgồp jơnau đơs ai kâp ủy, gơnoar atbồ ală kâp in tàm broă đơng lam bồ, sồr lam lơh broă lơh jat yàng bơh Đảng mờ Dà lơgar dê, kuơmàng là Adat pin dờn, jat yàng; lơh kơ̆ mờ sền gròi bơto pơlam mpồl cau lơh broă lơh pin dờn, jat yàng, bơsong niam ală broă jơi bơtiàn, jat yàng bơh tàm kâp hơ đơm tơn.