Sàh Lạc Dương, càr Lâm Đồng geh crơng gơs tàm tơngu me tơrmŭt bal 3 sàh: Dà Sar, Dà Ñim mờ Dà Chais kơnhoàl Lạc Dương lài do. Do là sàh geh bă ù dờng ngan càr dê, mờr 830 kơi sồ vuông, khà kờp làng bol mờr 15 rơbô nă, ndrờm là kòn cau K’ Ho dê lơm. Sàh geh 30 Ci ƀộ mờ rơlao 500 nă đảng viên.

Ồng Ya Tiong, Ƀí thư sàh Lạc Dương pà git, tàm broă rơcang mờ ai gơnoar atbồ ƀòn lơgar mŭt lơh broă bơh ngai 01 nhai 7, sàh sền gròi ngan tus mờ broă tơnguh bơhiàn tam klăc bal tàm kwang bàng bal mờ làng bol: “Lài ngan là tàm dơlan is anih lơh broă pal ring bal, tam klăc bal hơ̆ sồng geh bơta niam tàm broă đơng lam broă lơh. Bơh ngai 02 nhai 7 là neh crơng gơs ală anih lơh broă gơrềng bal tus mờ gơnoar broă kấp sàh dê. Làng bol kis tàm do là jơi bơtiàn ờ gal cau kis bơh yau geh tus 86%, bă ù dờng ơnàng, ƀòn ơm kis ờ tơrgùm bal, bol añ rơcang bơh sơnrờp làng bol kis tàm do tam klăc bal, ring bal”.

Tơnơ̆ mờ tŭ tơrmŭt bal 3 càr Lâm Đồng, Dăk Nông mờ Bình Thuận, càr Lâm Đồng pa tơrgùm tơl ală bơta nàng uă gah broă gơtùi bơtàu tơnguh pràn, lam lài, bè lòt nhơl brê bơnơm, dà lềng Dà Làc – Phan Thiết; khà bauxite uă ngan gùt lơgar dê mờ di pơgăp 5 tơmàn 400 tơlăk tấn gam bè ờs ờ hềt geh lơh; ală bơtô nhơm jờu geh khà uă, tiah jăt gah dà lềng jòng 192 kơi sồ…

Nàng mhar atbồ, đơng lam, ngui uă ngan bơta kwơ, bơta geh tàm dùl ù tiah dờng ơnàng bơh brê bơnơm tus dà lềng, càr Lâm Đồng ai mpồl lơh broă gơnoar atbồ 2 kấp pal lơh broă gơlòt sùm, pràn, geh cồng nha. Ồng Nguyễn Hồng Hải, Phó Củ tịc Anih duh broă Làng bol càr Lâm Đồng pà git, bơta do mìng gơtùi lơh geh cồng nha tŭ geh broă tam klăc bal nền nòn: “He gam tam gơl broă lơh den tàng ờ gơtùi git jơh. Broă lài ngan là tam klăc bal nàng lơh gơs kơnòl broă bơh càr pa dê. Di lah he ờ tam klăc bal den ờ gơtùi lơh gơs broă. He pal tus bal ală broă lơh bal tơn, pal tơrgùm nàng lơh”.

Tàm bơta ờ ru mờ uă broă lơh bơh dùl càr pa geh lơh gơs bơh broă tơrmŭt bal 3 càr, nam do càr Lâm Đồng pa kung gam lơh ngan lơh geh jơnau kờñ gơguh lơh sa rơlao 8% mờ gơguh 2 sồ rơlao hờ đang tàm tơngai pơn jăt tai. Nàng lơh geh bơta do, kwang bàng bal mờ làng bol càr Lâm Đồng gam tơnguh uă nùs nhơm tam klăc bal bè jơnau Wa Hồ neh bơto nàng lơh gơs bơta pràn tơrgùm bal, bơ̆t bơtàu càr Lâm Đồng bơtàu tơnguh mhar mờ kơl jăp.