Mang ngai 19/06, tàm Hìu lơh broă Cíñ phủ, Thủ tướng Cíñ phủ ồng Phạm Minh Chính tìp mat đơng lam bồ, lài do là đơng lam bồ ală anih lơh broă sră ƀăo di dơ̆ tơngkah kir sơnrai 100 nam Ngai Sră ƀăo Kăc màng Việt Nam (21/06). Tàm dơ̆ tìp mat, Thủ tướng kơ̆p kờñ ală cau lơh ƀăo đòm jat niam bơhiàn 100 nam Sră ƀăo Kăc màng Việt Nam, mờ “bồ tơngoh niam, nùs nhơm sàng goh, gai cih jak ngan” pơn jat tai tă pơgồp ai broă lơh bơtàu tơnguh bơh Dà lơgar, bơh jơi bơtiàn mờ làng bol dê.

Mờ jơnau sồr đơs sơlơ tơnguh tai dan cih jơnau sră ƀăo, Thủ tướng sồr Ƀộ Niam chài Tàp pràn să jan mờ Lòt nhơl tàm 1 nhai bơyai lơh Jơnau lơh nền cih nền nòn bè broă dan cih jơnau sră ƀăo, tơngume dan cih, broă lơh tơm priă jền... ai sră ƀăo in. Gơrềng tus phan bơna măi mok, yal tơngĭt jơnau, Thủ tướng jàu Ƀộ Jak chài mờ Măi mok in lơh ală Adat, geh broă lơh di pal jat tàm ală bơta bơnĕ bơnài bal bơta kwơ 3 hìu dê: Dà lơgar, gah internet, cau lơh ƀăo. Gàr niam 3 gah geh kwơ bal. Thủ tướng sồr gờñ ai lơh jat Jơnau lơh nền bơh Cíñ phủ dê bè yal tơngĭt uă tàm sră ƀăo, pơn jat tai bơsong ală broă lơh gam geh tàm tơngai pa do. Di dơ̆ do, Thủ tướng kung sồr, Ƀộ Priă jền kơlôi sơnơng sơlơ tơnguh tai priă lơh geh ai sră ƀăo in.