Tàm ală ngai do, tàm Tiah tờm Drơng broă lơh sră pơ-àr gơnoar atbồ dà lơgar Tiah is ồn Phú Quý sùm geh ală cau lơh broă nùs nhơm dong kờl tus dong kờl làng bol. Bal mờ ală ơruh pơnu bal, oh Mai Nguyễn Anh Khoa, bơsram ơdŭ 11A3, hìu bơsram kấp pe Ngô Quyền gam bơto sồr, dong kờl làng bol cih măt, ngui tài khoản cih măt điện tử; lơh jăt ală sră nggal tàm bơta sồ,… oh Khoa pà git, oh là cau lơh broă nùs nhơm dong kờl tàm do neh lơh broă 2 poh do mờ neh dong kờl geh rơlao 10 pang sră.

Broă lơh ờ kal ke mơya pal geh broă tơrgùm bồ tơngoh uă, di lah ờ di broă lơh den lơh wơl bơh sơnrờp, roh ngan tơngai: “Bol oh dong kờl ală ồng, mò cih ală jơnau tơngit tàm bơta sồ, nàng bơh anih priă jền dờp geh broă dong kờl pah nhai. Geh uă ngan dong kờl lơh ală broă gơrềng tus mờ cau tàm hìu, dờp di là hìu rơƀah lah ờ nàng geh dờp broă dong kờl bơh tiah is ồn do dê”.

Ai tơngai sơnrờp bơh broă lơh gơnoar atbồ ƀòn lơgar 2 kấp dê rơ̆p gơtìp mờ ală kal ke, den tàng, kwang đơng lam tiah is ồn neh lơh jăt nền nòn mờ ai geh jơnau ring bal uă tàm broă lơh. Ồng Đỗ Thái Dương, Ƀí thư Đảng ủy Tiah is ồn Phú Quý pà git, tus tŭ do tiah is ồn neh niam broă lơh mờ rơ̆p pơn jăt tai lơh gơs mpồl lơh broă, tàm hơ̆ uă ngan là tàm ală tiah gam ờ geh cau, ờ tơl cau. Tiah is ồn gơtùi bơ̆t bơtàu geh mpồl lơh broă niam, lơh broă geh cồng nha; tơl nă kwang bàng, kông cứk pal mùl màl là cau drơng broă làng bol in: “Dùl bơta tờm bơh tiah is ồn dê là bơ̆t bơtàu dùl mpồl kwang bàng lơh broă niam, jăk nàng lam lơh lài ai ală nam pơn jăt tai in, bơtàu tơnguh tiah is ồn tàm tơngai tus”.

Tiah is ồn Phú Quý ai, lơh sa dà lềng pơn jăt tai dờp gơnoar tờm, pơgồp bal mờ lòt nhơl, kă bro phan – broă lơh drơng ala. Lơh ngan tus nam 2030, priă geh tơl nă cau geh 77 tơlăk đong, pơn drờm mờ nam 2025 gơguh 1,22 dơ̆; Khà phan tàm dà lơh geh bơh 30 rơbô tus 35 rơbô tấn tàm 1 nam… Tus tŭ do, gùt tiah do geh 1 rơbô 740 nơm ơhò lơh ka mờ 7 rơbô 566 nă cau lơh broă, tàm hơ̆ geh 634 nơm ơhò lơh sa mờ bơta pràn 90CV rơlao hờ đang. Dùl mpồl lơh ka lơh broă geh cồng nha ngan, pơgồp bal mờ dong kờl, dong klàs cau gơtìp rềs àr mờ sền gàr gơnoar tờm ù tiah bồt dà lềng. Tiah is ồn tŭ do geh 1 hìu lơh niam wơl ơhò plung, 4 hìu drơng ala lơh broă; Anih ơhò ơm ngui bal mờ bơta ñjơ̆ hờ đơm 1 rơbô tấn, geh bơta pràn ơn 150 nơm ơhò lơh sa; tiah ơm pleh mìu càl dờng geh bơcri priă lơh gơs (tơngai dơ̆ 2), kờp jơh khà priă bơcri rơlao 446 tơmàn đong. Pa do, jăt broă tus sền ờ uă broă lơh tàm bồt Phú Quý bè: tiah ơm pleh mờ mìu càl dờng; anih lơh broă tam dră mờ gơbồr jăt gah dà lềng đah tô bồ… Củ tịc Anih duh broă Làng bol càr Lâm Đồng ồng Hồ Văn Mười pà git: “Añ đơs là jơnau sồr bơh Ƀộ Broă lơh sa suơn sre mờ Bơtàu tơnguh ƀòn lơgar lài do tŭ do là Ƀộ Broă lơh sa suơn sre mờ Tiah ơm kis ai lơh anih ơhò ơm do là kwơ màng ngan. Bơdìh mờ broă pleh mìu càl dờng ai git nđờ rơbô nơm ơhò lơh ka in tŭ gơtìp mìu càl dờng mŭt, den do gam là anih ơhò ơm uă bơta drơng ai broă bơtàu tơnguh lơh sa dà lềng in”.

Mờ uă ngan bơta kwơ tàm broă lơh ka, ròng, blơi mờ lơh phan tàm dà, Thủ tướng Cíñ phủ neh kĭ Rơndăp broă lơh bồt Phú Quý gơs tiah tờm Lơh, drơng ala dong kờl broă lơh ka, pơgồp bal jòi dong klàs cau gơtìp rềs àr tàm dà lềng. Jơnau kờñ bơh Rơndăp broă lơh, tus nam 2030, bơ̆t bơtàu bồt Phú Quý gơs Anih tờm lơh, drơng ala dong kờl broă lơh ka, pơgồp bal jòi dong klàs cau gơtìp rềs àr tàm dà lềng tàm tiah do mờ gùt lơgar.

Đơs tàm dơ̆ đơng lam Pơrjum dờng Đảng ƀộ Tiah is ồn Phú Quý dơ̆ sơnrờp, tơngai lơh broă bơh nam 2025 tus 2030 pa do, ồng Y Thanh Hà Niê Kdăm, Ƀí thư Tỉñ ủy càr Lâm Đồng đơs tờm, bơ̆t bơtàu tiah is ồn Phú Quý bơtàu tơnguh pràn kơl dang, pơgồp bal nền nòn đah bơtàu tơnguh lơh sa mờ sền gàr dà lơgar bal mờ lơh sa là tiah tờm kơ̆ kơl jăp ai bồt Trường Sa in. Tiah is ồn do geh ală gah lơh sa dà lềng bơtàu tơnguh, tàm hơ̆ uă ngan là lơh ka, lơh phan tàm dà, kă bro phan – broă lơh drơng ala dong kờl broă lơh ka tiah Đah jum măt tơngai lik Dà lơgar mờ wèt tus tiah Đah jum măt tơngai lik Câu Á; bơtàu tơnguh broă drơng ala pơn diang phan dà lềng, pơgồp bal mờ sền gàr tiah kis mờ lòt nhơl kơl jăp. Ồng Y Thanh Hà Niê Kdăm sồr: “Mờ ală bơta kwơ, bơta geh bal mờ bơta niam bơh tiah do dê, Phú Quý neh hòi jà geh gal ngan ală cau kơnòm să bơh tiah drà dờng tus nàng ơm kis mờ lơh broă, mŭt lơh broă bơceh lơh, kung bè lơh broă bơh ngài tàm uă gah broă. Tiah is ồn do pal sền gròi, ai geh bơta niam, gàr niam phan bơna mờ ngui niam bơta pràn do, lơh gơdờp bal mờ gùng dà broă bơtàu tơnguh pa bơh ală tiah bồt dà lềng dê, lơh pràn nùs nhơm tam gơl pa, bơceh lơh bơh tiah is ồn dê”.

Tàm rài brồ să bơh jơi bơtiàn dê, Phú Quý gam pơn jăt tai tơnguh bơta pràn is, lơh ngan tŭ geh bơta pràn bơh bơdìh nàng bơ̆t bơtàu di pal là tiah tờm lơh sa dà lềng, bơtàu tơnguh mhar, kơl jăp, gơs tiah drà bơta IV tàm nam 2025.