VOV4.K’ho - Tam zơu ròng tu là broă lơh ờs mờng jo\ rài tàm lơgar he đơs bal, càr Lâm Đồng đơs is, mơya gơ wèt mờ cau K’ho tàm xã ngài Dà Mròng, kơnhòal Đam Rông den do là broă lơh pa ngan. Mờ bơta lơh ngan lơh geh broă lơh, tơnguh pria\ lơh geh ơruh pơnu in, bi Ndu Ha Eo, Bí thư Chi đoàn [òn Liêng Krắ 1 neh khin cha crơng gơs mpồl lơhbal tam zơu – ròng tu, cèng wơl cồng nha loh làng ngan.

Guh bic tàm dùl tiah ngài ngan, đah bồ tô dà dờng Krông Nô kah yau, ndu gơn rơh, rềp nhàr đah 2 càr Dak Lak mờ Lâm Đồng. Tàm hìu lơh mờ mpàn bal hia\ lơm, tàm [òn Liêng Krắk 1, xã Dà M’ròng, kơnhòal Đam Rông (càr Lâm Đồng), mìng klo sap ntas nha zơu ròng tu bơrlu\ bal mờ sap iar nrau àng drim gờ`. Klau pơnu K’Ho, Ndu Ha Eo gam sơbac tê sơlơu\ nha zơu, rih tàm đồng siam tu lài mờ tu\ trồ àng, di ngan là “ròng sur den sàu piang bic, ai ròng tu den sàu piang ntàu”: “ Lài do, a` ờ hềt git bơta chài lơh broă sa bè do. Lài do, sền go\ broă lơh sa hìu bơnhă dê ờ bơtàu tơnguh, den tàng tơnơ\ tu\ a` git broă lơh pa do geh cồng nha rlau mờ tam tơngời, lơh kòi, sa ờ tơl mơl ờ bềng, den a` tam tơr lòng tờm zơu ròng tu, tơnơ\ hơ\ a` hòi jà làng bol, ơruh pơnu tàm do lơh jat bal broă tam tờm zơu ròng tu nàng tam gơl rài kis”.  

Tam zơu ròng tu là broă lơh ờs mờng bơh jo\ rài, mơya gơ wèt mờ làng bol kòn cau tàm xã tiah ngài Dà M’ròng, kơnhòal Đam Rông, càr Lâm Đồng den là broă lơh pa. Bơh 3 sàu ù tam tơr lòng lài tờm zơu ròng tu bơh sơn rờp cèng wơl cồng nha lơh sa loh làng ngan, bi Ndu Ha Eo neh bơyai bal mờ hìu bơnhă pơn jat tai lơh niam 8 sào suơn tam bơrlu\ phan gơs suơn tam zơu gơs niam ngan. Do là phan siam niam ngan nàng ròng 2 dơ\ tu tàm nhai, tơnhàu geh 150 ki\ rơ sòn tu. Tơnơ\ tu\ kờp jơh pria\ tă lơh, pah nhai hìu bơnhă bi Ndu Ha Eo geh pria\ cồng pơgap 25 tơlak đông.

Gùng lòt, rbòng dà tàm [òn Liêng Krắk 1

Àng drim kàl prang Tây Nguyên trồ tơngai duh ngan, ală bă suơn tam tờm zơu ròng tu tàm tiah kơh bơnơm Dà M’ròng, kơnhòal Đam Rông kung gam gơs tơlir ngan. Ndu Ha Eo lam bol a` lòt còp hìu bơnhă bi Buôn Krông K’Loan.

Tàm do, K’Loan bal mờ 2 nă oh mi Đa Cắt K’Siên mờ Đa Cắt K’Tuyên gam boh bơr, cribơyai mờng chài tam tờm zơu ròng tu. Hìu ơnàng pơgap 50 thok vuông geh gơ glòm mờ jàl kò. Tàm dơlam, ală bă ròng tu mờ anih prap nha zơu kung geh cang bè hơ\ sơl, nàng kờ` kơryan phan kis dềt mut. Bi K’Loan pà git,  neh geh 2, 3 dơ\ tu ròng ờ gơtùi tài rơ hài mut deh tap, tu\ do, oh mi neh git sền gàr nàng ròng geh cồng nha: “Lài do, broă tam tơngời, lơh kòi sre ai cồng nha tơnhàu lơyah ngan, làng bol ờ tơl ngui tơl sa. Bơh ngai geh bi Ha Eo dong kờl, pơlam ơruh pơnu tàm [òn tam tờm zoqu ròng tu den rài kis làng bol kung bè ơruh pơnu tàm thôn do bơtàu tơnguh rlau. Jơngkah bơh broă tam tờm zơu ròng tu, hìu bơnhă a` blơi phơng sih, bơcri pria\ sơngka sền gàr kòi sre, tam tai tơngời. Ơruh pơnu tàm thôn bơsram tai bơta chài lơh sa ua\ ngan bơh bi Ha Eo. Geh bi pơlam jơh nùs ngan, pơlam lơh broă, ơruh pơnu ngai sơlơ bơtàu tơnguh”.  

Ndu Ha Eo lam lài tàm broă sơn đờm mut lơh broă mờ broă tam tờm zơu ròng tu

Tam zơu ròng tu là broă lơh pa, mơya ơruh pơnu kòn cau tàm tiah ngài Dà M’ròng, kơnhòal Đam Rông, càr Lâm Đồng neh di tu\ ngui ală gơguh jak khoa học kỹ thuật. Ală bi neh git ròng tu hơđang rơngda lòs, ròng tu tàm đồng lơh mờ ndàp, ala mờ broă ròng tu tàm đồng tà` mờ gle đơr ờs mờng. Kơ nờm bơh hơ\, ờ roh tu\ tơngai tuh è tu pah ngai. Đồng ròng tu geh mòn jat tơl trồm krơi is, tơl nàng 1 nơm tu in lơh rơ sòn, ờ lời gơlik geh bơta 2 nơm tu, 3 nơm tu lơh rơ sòn bal. Mờ 5 tơlak đông, gơtùi lơh 4 rơngda lòs, tơl nàng ròng dùl hộp tu dềt. Pah dơ\ ròng, tơnhàu geh 50 ki\ rơ sòn tu, tac geh pơgap 6 tơlak mờ nggùl đông.

Ală broă lơh bơh ơruh pơnu [òn Liêng Krắk 1, xã Dà M’ròng dê sùm geh kra [òn là ồng Bon Yông Ha Bông sền gròi, pơn jờng ngan. Ồng pà git, bal mờ tam zơu ròng tu cèng wơl cồng nha lơh sa ai tơl hìu bơnhă in, ơruh pơnu tàm [òn gam jơh nùs bơyai lơh ua\ broă lơh, pơgồp bơnah bơt bơtàu [òn lơgar pa: “Đoàn ơruh pơnu neh git pơn jờng nùs nhơm ồng mò, mè bèp, [òn lơgar bơtàu tơnguh. Ha Eo là Bí thư Chi đoàn, là dùl nă cau git kơlôi rơcang mpồl bal, kơlôi rơcang mpồl duh broă Đoàn in, geh kơnòl ngan nàng pơgồp bơnah bơt bơtàu thôn, [òn. Tàm hơ\, gùng lòt [òn lơgar là bơh đoàn ơruh pơnu drơng lơh, pal sền gàr kloh niam gùng lòt tàm [òn. Pah poh tàm ngai dơ\ 7, halà 1 nhai 2 dơ\ đoàn ơruh pơnu bơh Chi đoàn dê bơyai lơh pơs wàs sồ sia\, gàr kloh niam bal tàm thôn, [òn pơn jat tai bơt bơtàu [òn lơgar pa”.

Mpồl lơh bal tam zơu ròng tu [òn Liêng Krắk 1 cribơyai mờng chài lơh broă

Ai bi Buôn Krông Ha Nỗ, lài do là Bí thứ đoàn xã Dà M’ròng, tu\ do là kuang bàng huyện đoàn Đam Rông, càr Lâm Đồng den pơn iờ să ngan rơnàng tơnơ\ do [òn tờm he dê neh krơi mờ lài ua\ ngan. Mpồl lơh broă bal tam zơu ròng tu tàm [òn Liêng Krắk 1 là broă lơh sơn đờm mut lơh broă dipal mờ geh cồng nha gơ wèt tus mờ ơruh pơnu tàm [òn lơgar, pal geh lam lơh ua\: “Broă lơh bơtàu tơnguh lơh sa mờ broă tam zơu ròng tu bơh bi Ha Eo dê lài ngan là mhar geh pria\ nàng kơlôi rơcang rài kis pah ngai, dơ\ 2 tai là  bơsir wơl pria\ tă lơh mhar rlau mờ broă tam kơphe, tơ ngời, tam kòi sre, dơ\ 3 là tam zơu ròng tu den tơnhàu sùm tàm tơngai lơyah. Huyện đoàn bol a` lơh broă mờ ală ngân hàng bè  ngân hàng chính sách xã hội, phòng nông nghiệp nàng lơh sră càn pria\ ai ơruh pơnu sơn đờm mut lơh broă tàm [òn lơgar in, ngan là ơruh pơnu sơn đờm mut lơh broă tàm tiah sar lơgar ngài”.

Gơ ơm ndơ\p tàm gùl brê bơnơm, [òn Liêng Krắk 1, xã Dà Mròng, kơnhoàl Dam Rong, càr Lâm Đồng gơ gơs tơlir niam ngan kơnờm bơh hiòng dà mrềt sàng goh bơh dà cròh Dà Mròng dê mờ dà bơh bồ tô dà dờng Krông Nô ndu gơnrơh bè tàm mpau mang. Bal mờ ală lo\ sre, mìr tơngời lơh geh tơl phan sa gùt nam, tu\ do làng bol kòn cau tàm do gam geh tai priă jền pa bơh broă tờm zơu ròng tu ruồi brài. Ală klau pơnu, ùr ơruh K’ho tàm do ờ go\ gam bàssìl tai lòt lơh broă apah cau in, mờ neh jòi broă ròng is să tờm, sơnđờm mu\t lơh broă tàm bă ù tờm bơh he dê tơn, pơgồp bơnah bơ\t bơtàu [òn lơgar pa.

Cau mblàng K'Duẩn