Bơta pràn cau kơnòm să tàm tiah nhàr lơgar Thuận An dê

VOV4.K’Ho- Thuận An là xã tiah nhàr lơgar sơn rờp bơh càr Dăk Nông dê neh lơh sir broă lơh bơt bơtàu ƀòn lơgar pa bơh 5 nam lài. Ngui ală bơta ƀuơn, bơta pràn bè ù tiah, trồ tiah, làng bol ală jơi bơtiàn kòn cau xã Thuận An gam sơm bat tê bal pơnđơl pràn lơh ngan bơtàu tơnguh pa: là dùl tàm ală xã ƀòn lơgar pa tơnguh uă sơn rờp bơh càr Dăk Nông dê.

Ngăc ngar, bơceh pa, tryang tryồng lơh broă, hơ̆ là broă lơh mờ klau pơnu Y Vinh, kòn cau M’nông ơm tàm ƀòn Sa Pa (xã Thuận An, kơnhoàl Dăk Mil, càr Dăk  Nông dê) geh rài kis tơl ngui tơl sa đau. Y Vinh yal, tơnơ̆ tŭ bơsram jơh gah bơsram kao đẳng bơt bơtàu, bi ờ gŏ ơm wơl tàm ƀòn dờng lơh apah ờ, mờ rê wơl tàm ƀòn tờm pơn jat tai sơng ka sền gàr rlau 1 lồ kơphê. Tŭ ru bi lòt lơh apah ală broă lơh bơt bơtàu. Tus kàl pĭc kơphê, bi tơrgùm broă tơnhào mờ lơh broă tàm bơnhă pơr kơphê hìu bơnhă dê. Bi Y Vinh đơs là: “Tài bơh dilah he mìng lơh kơphê lơm den ờ geh bơta lơi ờ. Bè tŭ do giă phan bơna phơng sih jơnhoa ngan, ai kơphê den nam geh nam ờ. Den là he lơh uă broă bè là “sa tơngai lơyah ròng tơngai jŏ jòng” lơh broă lơh tềng đap mat nàng geh priă lơh geh bơcri priă ai tờm kơphê in, mờ pal geh ală broă lơh ndai tai bơtơl. Bè nam pa do, oh dờp lơh broă bơt bơtàu sùm, tus lồi nam ờ dờp tai nàng tơrgùm tàm broă tơnhào phan tam. Tơnơ̆ tŭ lơh jơh den he lòt lơh broă bơt bơtàu tai”.

Jat bi Y Arôn, Phó Ƀí thư Đoàn Ơruh pơnu xã Thuận An yal, ơruh pơnu tiah do ngac ngar mờ bơceh pa ngan tàm broă lơh sa. Ngui ală bơta ƀuơn, bơta pràn bè ù tiah mờ tiah ờs tam kơphê mờ sơntìl kơphe jơi bơkiar bơh chờm, ală cau kơnòm să sùm lòt lài tàm broă ngui bơta chài măy mok pa tàm broă lơh sa suơn sre, wèt tus ală broă lơh pa bè lơh gơlik phê, lơh kơphê sơntìl, kơphe bơkah pơn rơ... Ơruh pơnu kung lơh ngan tàm ală broă lơh mpồl bơtiàn dê, prap gàr bơhiàn yau. Mpồl drong cing jañ mồng, tam ya, đơs jơnau pơnđick bơh ơruh pơnu xã Thuận An dê sùm tus bal tàm dơ̆ tàm pơrlòng, dơ̆ bơyai lơh bơh càr, kơnhoàl dê... Bi Y Arôn pà gĭt: “Ngan là ngui niam bơta pràn cau kơnòm să bơh ơruh pơnu dê, ală gơ̆p bơyô sùm là ală cau lòt lài mờ bơto pơlam bal ai làng bol in gĭt mờ kông nghệ. Ală gơ̆p bơyô gĭt ngui bơta chài măy mok pa tàm broă lơh sa suơn sre bơh hìu bơnhă dê, cau den tam tàm bơrlŭ bal mờ tiêu, kơphê, cau den lơh suơn ờng tờm sơltìl, cau den pờ anih lơh gơlik chàng măi kơphê... lơh geh broă lơh ai đoàn viên ơruh pơnu tàm xã in tơn. Bơdìh hơ̆, den ală gơ̆p bơyô kung gam ngăc ngar tàm ală srơh lơh broă mpồl bơtiàn, bè là pơs wàs sàng goh tiah ơm kis, tam bơkào, tam chi tàm ală gơl gùng, tus bal ală broă lơh bơh xã, bơh thôn dê lam lơh nàng bơt bơtàu bal ƀòn lơgar pa tơnguh uă”.

Xã Thuận An geh 10 thôn, ƀòn, mờ rlau 3 rơbô hìu bơnhă, mờr 12 rơbô nă cau; tàm hơ̆ mờr 1/3 khà kờp làng bol là làng bol kòn cau dùl ết nă cau. Mờ bơta sơm bat tê bal bơh làng bol ală jơi bơtiàn kòn cau dê, bơh nam 2018, xã neh geh dờp là lơh sir 19 broă jàu bơt bơt bơtàu ƀòn lơgar pa. Do là xã tiah nhàr lơgar sơn rờp bơh càr Dăk Nông dê lơh sir broă lơh do. Ồng Trần Khắc Dũng, Củ tịc Ủy ƀan Ñân zân xã Thuận An, pà gĭt, bơta ƀuơn, bơta pràn dờng ngan rlau jơh bơh xã dê là tiah ờs tam kơhê geh càr Dăk Nông dờp tiah tam mờ ngui kông nghệ kao, geh sơltìl kơphê jơi tờm tiah do dê geh Ƀộ Nông nghiệp mờ Phát triển Nông thôn ai gơnoar ngui kwơ màng. Tŭ do xã gam mblàng yal dong kờl làng bol rề ơnàng bă ù tam kơphê hữu kơ, lơh bal tam kơphê jat ală anih lơh broă drơng broă tăc phan mờ lơgar ndai.

Tus jơh nam 2022, priă lơh geh kờp bal tơl nă cau tàm xã Thuận An lơh geh 53 tơlak đông; khà hìu bơnhă rƀah jơh gùt xã mìng gam 1,35%; rài kis phan bơna, nùs nhơm bơh làng bol dê ngai sơlơ tam gơl. Bulah bè hơ̆ ồng Trần Khắc Dũng đơs, kung gam uă ngan bơta kal ke kờñ pal sơr lèt gan nàng xã Thuận An in gơtùi lơh geh cồng nha ală broă jàu ƀòn lơgar pa tơnguh uă.

Ồng Trần Khắc Dũng đơs: “Dùl xã tiah nhàr lơgar geh 30% khà kờp làng bol là làng bol kòn cau ết nă cau, 90% khà hìu bơnhă là lơh sa suơn sre, den rài kis bơh làng bol dê kung gam uă ngan kal ke. Mờ tŭ do mờ 2 ƀòn làng bol kòn cau dùl ết nă cau den ờ gam dờp geh ală broă lơh dong kờl lài hơ̆ dê den kung lơh kwi kwơ ai làng bol in sơl, pơn yơu bè dong kờl bè Bảo hiển Y tế, bơtàu tơnguh lơh sa suơn sre tiah kơh bơnơm... Bulah bè hơ̆ den jat Nghị quyết bơh Đảng ủy mờ broă rơndap lơh bơh Ủy ƀan Ñân xã dê den nam 2023 bol añ geh pơn đơl pràn lơh ngan lơh sir broă lơh ƀòn lơgar pa tơnguh uă”.

Ngui niam ală bơta ƀuơn, bơta pràn bè ù tiah, trồ tiah, bal mờ bơta dùl nùs bal bơh làng bol ală jơi bơtiàn kòn cau dê, xã Thuận An gam ngui jơh bơta pràn cau kơnòm să dê nàng wèt tus bơt bơtàu xã ƀòn lơgar pa lam lài tàm tiah nhàr lơgar càr Dăk Nông dê.

Viết bình luận