Ơ ồng, bơh gah sền bơh dùl nă cau jơh dùl rài rềp mềr ngan mờ ƀòn lơgar, ồng pin dòn là bơta kwơ kwơ màng ngan rlau jơh bơh niam chài jơi bơtiàn he dê gơ ơm tàm bơta lơi taih?
Cau chài ồng Ka Să Ha Sang: “Gơwèt mờ añ, phan kwơ bơh kòn cau K’Ho dê ngan là săp ntas cing, yăng, là mpoong ntas bơh ală bơta đờng goòng bơhiàn bơh yau bè goòng, tồng gòk, kơmbuăt, rơkèl mờ jơh bal ală gùng đơs pơnđick lơbơn niam. Mờ bơta kwơ hơ̆ mìng ngan ngồn kis niam tŭ geh rơnàng tơnơ̆ do tàm pơrdờn wơl sền gàr. Ală đờng goòng do ờ mìng ƀuơn ngan là phan ngui lơm mờ là hwềng soàn tàm rài kis nùs nhơm bơh bol he dê. Bơta kwơ màng ngan rlau jơh tŭ do là pal lơh bè lơi lơh kah rơngal wơl bơta kơ̆p kờñ lùp bơsram tàm rơnàng kơnòm să dê, nàng hiòng dà niam chài bơh bèp ồng dê sùm gơ hòr sùm bal mờ tŭ tơngai”.
Tàm gùng lòt kơ̆ nùs ngan prap gàr niam chài hơ̆, ồng sền gŏ bơta lơi là ală bơta ƀuơn mờ bơta kal ke dờng ngan rlau jơh taih?
Cau chài ồng Ka Să Ha Sang: “Bơta kal ke ngan rlau jơh hơ̆ ngan là nùs nhơm bơh oh kòn kòn sau dê. Uă cau kơnòm să tŭ do ờ gam kờñ mờ niam chài bơh yau dê tai, ờ gŏ gơ dan lùp bơsram tai den tàng kung ờ kờñ jòi gĭt broă prap gàr bơta kwơ mờ bèp ồng dê lời wơl. Bơh săp ntas cing, jơnau đơs tàm sơrbŏ bal, tus broă jòi gĭt broă ngui đờng goòng bơh yau halà phan ngui lơh broă sa tàm rài kis pah ngai dê... jơh ală ndrờm rơ hời gơ gơs krơi is mờ bol khai. Mơya, añ kung gam gŏ ală tiah kơnờm nùs nhơm kwơ màng ngan. Hơ̆ là bơta tam klăc bal, đềt mềr tàm sơnđàc bal đah cau mờ cau, đah ală ƀòn lơgar bal mờ gơ̆p. Is ồn, jơnau pờ tơlik jơnau đơs dà K’Ho bơh Anih jơnau đơs Việt Nam dê là dùl gah tàm tơrbŏ bal niam ngan. Ală jơnau yal bè niam chài, bè nùs nhơm tam klăc bal geh pờ tơlik sùm neh dong rơnàng kơnòm să in geh tŭ tơngai niam gĭt mờ sơlơ kờñ broă lơh bơh yau bơh he dê”.
Bơta lơi tàm rơnàng kơnòm să tŭ do lơh ồng gơ lơh ờ suk ơm ngan rlau jơh, ơ ồng?
Cau chài ồng Ka Să Ha Sang: “Añ kơlôi is là tŭ lơi gam tă nhơm, añ gam mblàng bơto bơtê wơl. Cau lơi kờñ bơsram dròng cing, añ crăp rcang bơto bơtê jơh nùs, mìng kơ̆p kờñ geh cau kờñ bơsram lơm. Añ muăt jrùm mờ gŏ he geh glài mờ mò pàng tŭ uă sau dềt tŭ do ờ bài dờp jơnau jà lòt bơsram đơs pơđick, tàp dròng cing. Ală sau đơs là : “Ală wa kra rau, jơnau yal ờ gam gơ dờp mờ rài do tai”, den ală sau mìng kờñ iăt jơnau đơs crih tơngai pa tŭ do lơm. Tŭ ală sau ờ bài pờ nùs nhơm iăt mờ lùp bơsram, hơ̆ là bơta jê sồt dờng ngan rlau jơh bơh ală cau chài neh kra bè bol añ”.
Den bè hơ̆ jat cau chài, bol he kờñ lơh bơta lơi nàng cau kơnòm să in ngan ngồn kờñ, sền dờng màng mờ pơn yờ să tàm pơr dờn bơhiàn niam chài is jơi bơtiàn he dê taih?
Cau chài ồng Ka Să Ha Sang: “Dilah mìng mblàng yal mờ bơr lơm den ƀuơn ngan tơnơ̆ do gơbàn roh tĕ, tài bơh tơnơ̆ do ală cau chài neh kra rơ̆p hời rơ hời “rê mờ ƀòn yau ( hơ̆ là rê mờ mò pàng). Nàng sền gàr jŏ jòng, bol he kờñ pal jòi tơrgùm, cih lời wơl mờ rơndăp tăp sèng wơl ală jơnau đơs pơnđick, gùng cing cih gơs pang sră. Bơdìh hơ̆, kờñ bơto bơtê ai oh kòn kòn sau gĭt wă nùs nhơm kis bơh cau rài yau dê bơh ală jơnau đơs nrĭ geh uă bơta kwơ. Pơn yơu bè jơnau bơto bơh cau lài do dê: pal gĭt ngar mang guh bĭc gờñ, kis tơryang tơryồng, gĭt kờñ gơboh jơm glòm bal mờ ờ gŏ di tam cah is jơi bơtiàn. Pal tơngkah oh kòn kòn sau pah ngai là niam chài là nggu rơyah tờm, ờ gŏ di lơh roh tĕ. Pah tŭ kơlôi tus bơta ngài ngan ală bơta kwơ do roh jơh, nùs nhơm añ jê ngan tài bơh kơlôi rcang”.