Sêt ntêng kanŭng bŭt du tơ̆ tâm năm ta khay mih, sêt bŭt ta neh ueh pru, ntŭk dăch neh ndŭl neh. Sêt ntêng way geh ŭt dŭt âk ta khay 6 tât khay 8 tâm năm. Tĭng bu ranh nkoch, gay ma gĭt năl sêt ntêng dơi sa rĭ an geh uănh văr ntŭk sêt bŭt geh ntŭl nglap đŏng lah mô. Tal 2 lah knơm uănh na nê̆ ta săk sêt geh joch, nglang. Môp sêt hôm nha jê̆ geh gŭ ang, tât têh rĭ jêng nglang, dang kơt lah tong yu.

Wa H’Rok Êban (Aduôn Lia) ta ƀon Hŭk, xã Cư M’gar, nkuăl Cư̆ M’gar, n’gor Dak Lak an gĭt, nuĭh Rđe mĭn ăp nuĭh geh nău lap, rêh ueh rnôk hăn ta bri mơ geh mâp sêt ntêng. Ƀon lan way geh dŏng ƀư ndơ sa bâh ndơ hon tâm neh, bŭt tâm bri tâm nĕ sêt ntêng lah du ntil ndơ sa geh âk nău kah ueh an rnăk vâl.

 “Nuĭh Rđe gĭt sa sêt ntêng bâh kăl e hôm. Gâp âk năm deh hôm, gâp gĭt năl mơh sêt dơi sa, sêt mô dơi sa. Mbra dơi gâm nsum đah biăp n’ha rhŭm. Ndơ sa aơ nuĭh rđe way gâm đah boh mblâm, mbrăch. Kăl e nơh yan aơ mô hăn rvăt ndơ sa, geh âk ndơ sa, sêt sa tâm mir ba”.

Sêt ntêng way geh bŭt ta ăp ntŭk pĭt yôk, tâm mir cà phê, cao su...yơn yor nău khlăy ndơ kah, nău njŭnh jêng âk nuĭh ŭch sa. Nô Y Zuem Mlô, ta ƀon Sưk, xã Ea Đar, nkuăl Ea Kar, n’gor Dak Lak an gĭt, ăp năm dăch aơ, dŭt jêr joi sêt ntêng, du đê̆ yor neh mô hôm ueh, tâm rnôk nuĭh joi sêt âk. Kanŭng nuĭh i lap mơ dơi geh saơ sêt ntêng. sêt ntêng rnôk pâk sĭt an geh gâm dâl, an jŏ mô hôm kah. Nô Y Zuem Mlô nkoch.

 “Ta khay mih, rnôk he hăn ta mir, hăn ta bri mbra geh mâp sêt ntêng. Lôch rao an kloh, mbra dơi gâm biăp mô lah vâr ngi. Rnôk gâm biăp dak an dak duh dĭng tĕ sêt, tĕ tay boh, mbrăch, n’ha klôih, n’ha lốt, n’ha ƀô kah. Ndơ sa ƀư bâh sêt ntêng sa đah piăng mô lah đah por dŭt kah, rnôk por sĭn tĕ tay du đê̆ gir mô lah klôih. Mô lah gŭch sêt sa lĭp đah dak măm, njuh đah jăm tăp, nklâm ta n’ha prit dŭt kah đŏng.

Tâm ndơ sa bâh nuĭh Rđe, sêt ntêng hôm nha geh gâm đah blân tăng. Rnôk nkret ƀư ndơ sa bâh sêt mô dơi tĕ âk boh bôt ngot gay ma an hôm mât nău kah êng n’hanh ƀô kah bâh sêt. Sêt ntêng dơh sa, dơh gâm. Ƀon lan way gâm nsum đah play bônh gay ma nău ƀô kah nchinh ndrel...njêng nău kah an ndơ sa.

Đah nău kah êng n’hanh ndơ kah ueh bâh săk soan, âk nuĭh tăch way geh tăch rgâl ndơ ntoh lư tâ Dak Lak way geh joi đah rnoh khlăy 500 rbăn prăk/kg. Rnôk mih sial ndrel đah sial du nđik mpeh ta yôk prêh neh chăng, lah nău mpơl saơ an sêt ntêng ntơm lĕ tât, ăp nuĭh aơ dŭt lap mbra geh dơn nsơ sa bâh neh bri.