VOV4.Mnông- Ntơm lăp yan lêh rpŭng kai năm 2021, rnoh tăch rpuĭng kai mô khlăy jŭr hôm 3 rbăn prăk/1kg. Nău aơ ƀư an âk ƀon lan tăm rpŭng kai ta Gia Lai roh dơm, hoach prăk mât chăm.

 15 năm manh neh tăm rpŭng kai ta xã Ia Mơr, nkuăl Chư Prông, Gia Lai, wa Bùi Hữu Phước 46 năm deh, ta xã Bình Nghi, nkuăl Tây Sơn, n’gor Bình Định an gĭt,  mô nă geh tă rnoh tăch rpŭng kai thuk ngăn kơt yan aơ. Năm aơ, rnoh phân poh n’hanh ndơ dŏng tuch tăm hao khlăy, gay ma ntuh kơl mât tăm 2 ha rpŭng kai, wa sŏk 100 rkeh prăk, manh tay ngân hàng 60 rkeh prăk. Bôk yan, rnoh rpŭng lah 7 rbăn prăk/kg, rĭ rpŭng wa ê hŏ dŭm ê hŏ dơi lêh. Ta nklang yan, rnoh jŭr thuk ndal tât 3 rbăn prăk/1kg, geh roh dơm ngăn, wa Phước mô hŏ nănh lêh. Yơn lah, rnoh mô hŏ khlăy, rnoh ê hŏ hao, mih rlơ̆ yan ƀư an rpŭng đang hêng, wa tăch ndal đah rnoh 2.500 prăk.kg.

 “Khlay 7 rbăn prăk/1 kg lah bôk yan. Aƀaơ Trung Quốc mô hôm rvăt, mô dơi geh tăch jŭr hôm 2.500 prăk/1kg. 1 sào gâp roh dơm 6 rkeh prăk. roh dơm jêng mô geh prăk ma pah kan mât tăm tay an yan ba kơi”.

Tâm ban kơt wa Phước, 3 khay ba năp, ủ sai yuh Văn Thị Toán 39 năm deh lĕ geh njoăl 2 hê kon ta ƀon tơm Bình Định, hăn ta xã Ia Mơr, nkuăl Chư Prông, n’gor Gia Lai manh neh, tăm rpŭng. Tât yan lêh play plơ̆ sĭt ta rnăk vâl sa Têt, yơn ur sai yuh Toán mĭn rvê yor rnoh rpŭng kai mô khlăy.

“Gâp sŏk dŏng 1 ha lah 160 rkeh prăk. Nkhôm pah kan aƀaơ khlay đŏng, tơm neh sŏk 3 rbăn prăk/1kg lag roh dơm, roh tât 40 rkeh prăk/ha. Roh dơm prăk ur sai pah kan, oh kon nklơi êng ta jay, ur sai hao ta aơ pah kan ma mô geh prăk”.

Aƀaơ, ta Gia Lai geh rlău 1 rbăn ha rpŭng kai, rgum dŭt âk ta ăp nkuăl Krông pa, Phú Thiện, Ia Pa, Chư Prông...Rpŭng kai way lêh play tâm 3 khay dŭt năm, ƀon lan kan lŏ mir gŭ ta rnŭ ta choanh gay ma mât chăm dŭt ŏ r’ah. Năm aơ, rnoh rpŭng kai jŭr thuk, ƀư an nău ŏ r’ah nĕ lơ ma hô. Wa Nguyễn Tuấn Anh- groi kruanh UBND xã Ia Mơr, nkuăl Chư Prông an gĭt.

“Rnoh khlăy năm e nơh bâh 6 rbăn tât 7 rbăn prăk/kg rĭ ƀon lan mơ geh oi . Tât aƀaơ klâp ma 2500 tât 3rbăn /1kg rĭ ƀon lan roh dơm, rĭ 1 ha geh roh dơm bar pe jât rkeh prăk. jêng lah dŭt jêr an ƀon lan, dŭt ŭch geh rnoh  nău kơl du đê̆ an ƀon lan đŏng”.

Nuĭh rblang: Thị Đoắt