-Thạch Sa Oanh-

VOV4.Mnông- Tâm rnglăp lah nău way dŭt khlăy bâh ƀon lan ăp mpôl rnoi oh nô ndrel gŭ rêh ta n’gor Trà Vinh. bâh nău tâm rnglăp lĕ njêng soan dăng gay ma Trà Vinh rlet rlău nău jêr jŏt, ntul rlong tâm nău nsrôih rklaih đăp mpăn mpôl rnoi, dơn ngoăy neh dak n’hanh tâm ntrong rdâk njêng ƀon lan aƀaơ. Phóng viên Sa Oanh geh nchih nkoch nău aơ.

Tâm nău rêh bâh ntơm, ƀon lan rnoi Khmer geh tâm rnglăp mbro, krêp dêh đah ăp mpôl rnoi oh nô tâm ntrong rdâk njêng n’hanh mât ƀon tơm, neh dak. Tâm nău dŭt jêr jŏt ngăn bâh ntrong kan cách mạng ta Trà Vinh, ƀon lan Khmer ta aơ hôm nha du nuih n’hâm tĭng Đảng, tĭng cách mạng gay ma ƀư dơi nău kan têh. Ntoh lư kơt nău kan Đồng khởi năm 1960, ăp mpôl rnoi oh nô ta ntŭk ndrel dâk hao, tâm nĕ geh klâp ma 65 rbăn ƀon lan, ăp nuĭh sư sãi, Khmer tât râng. Ngăn lah tâm khay 4 lịch sử năm 1975, Trà Vinh lah ntŭk geh rklaih đăp mpăn tâm ndrĭh đah Sài Gòn. Nĕ lah bâh geh nău tâm rnglăp ƀon lan tahen, tâm rnglăp ăp mpôl rnoi oh nô rêh nsum ta ntŭk. Wa Thạch Minh Mẫn, du hê bu ranh tă râng tâm lơh bâh năm 16 năm deh an gĭt:

“Ntơm ta năp nar 30-4, mpôl he kuăl jă ƀon lan, sư sãi sĭt ta nklang n’gor, kâp tât 11 mông nar geh nteh pănh phao rklaih đăp mpăn Trà Vinh rĭ su sãi, ƀon lan nđâp ma Yuan, nđâp ma Khmer hăn ta trong, ăp nuĭh njôt leo cờ cách mạng, nkre hăn nkre kuăl săk Hồ Chí Minh muôn năm, dak Việt Nam muôn năm”.

Mô dơn kanŭng hăn ndrel ta rơh tâm lơh tâm su, ta rơh đăp mpăn, ƀon lan ăp mpôl rnoi ta Trà Vinh way geh tâm pêt tâm kơl, tâm kơl bâh ăp nău kan jê̆ tâm nău rêh tât ăp nău kan nsum ta ntŭk rêh jêng kơt lah: ƀư trong, ƀư ngih nti, tâm rgop prăk kơl nti...Êng tâm nău rêh ƀon lan way geh tâm kơl ndrel tâm nău hun hao wăng sa rnăk vâl. Ntoh lư kơt rnăk wa Đặng Văn Hùng ta xã Thạnh Hòa Sơn, nkuăl Cầu Ngang, rnăk vâl geh rlău  1ha neh, uănh saơ nău wăng sa rnăk vâl lĕ đăp mpăn, yơn mô geh nuĭh kan, ur sai nchrăp an ƀon lan Khmer tâm ƀon manh neh gay ma tăm bum mbo. Plơng tay ƀon lan tâm ƀon tât kơl rnôk wa geh nău kan. wa Đặng Văn Hùng an gĭt.

 “Gâp geh neh mir an ƀon lan manh tăm tuh đậu phụng. Ta aơ nuĭh rnoi đê̆ âk, he kan êng mô dăng rĭ he pă an ƀon lan ƀư. Rnôk kăl e nơh ƀư ba 1 yan dơm, aƀaơ 3 khay geh 10 nuĭh tât. Ăp nău kan gâp geh đă ƀon lan da dê, tĕ phân jă oh nô kơl ƀư, puh dak si kơt nĕ đŏng, gâp ƀư êng mô dăng. Bâh nĕ ma dơi oi, pah kan geh âk”.

Bâh geh soan dăng nău tâm rnglăp nĕ lĕ kơl an n’gor Trà Vinh way geh mât nâp đăp mpăn rnă njrăng chính trị, đăp mpăn nău rêh jêng. Ƀon lan ăp mpôl rnoi way geh knơm ta nău leo kan bâh Đảng n’hanh ngih dak, đăp mpăn pah kan jan sa, n’hao nău rêh. Aƀaơ, n’gor mô hôm geh rnăk dơi geh kơl an, rnoh rnăk ach o tĭng nău mbơh âk ding tât aƀaơ hôm 1,67%, rnăk ach o lah ƀon lan rnoi Khmer hŭch hôm ba dâng 4%, geh 5/9 ntŭk kan ta nkuăl geh tâm di nău mpŏng n’hanh ƀư lôch nău kan rdâk njêng nkual ƀon lan mhe. Wa Thạch Khôl, du hê cán bộ rlu ranh ta xã Kim Sơn, nkuăl Trà Cú rhơn nkoch.

“Geh nău mât kơl an mpeh nău rêh bâh ƀon lan, mpeh nău pah kan jan sa pơk âk jrô nti khoa học kĩ thuật, rgâl jêng nău dơi lah nău geh rĭ păng geh âk. Aƀaơ geh ngih nti, geh trạm y tế, geh ntung trong, ta năp geh rklaih đăp mpăn lĕ rngôch ngih jay lah jay ja mpir, aƀaơ lĕ geh ngih xây”.

Aƀaơ Mặt trận tổ quốc Việt Nam ăp gâl kan ta n’gor Trà Vinh dôl geh n’hao nău way ueh ơm bâh Mặt trận Việt Minh, ntrôl nău kan mbơh tơih, rgŏ jă ƀon lan ƀư tĭng geh săk rnglăy rơh rgŏ jă “lĕ ƀon lan tâm rnglăp rdâk njêng nkual ƀon lan mhe, nkuăl ƀon têh ueh” ndrel đah nkô̆ ŭch n’huch ach o nâp nâl, ntop ndrel ƀư tĭng ueh nău kan tâm rlong “Trà Vinh ndrel đah lam dak nsum soan rdâk njêng nkual ƀon lan mhe”. “lam dak nsum ti yor nuĭh ach o- Mô an geh nuĭh nklơi tay ba kơi”.

Wa Phạm Tiết Cường, groi kruanh Ủy ban MTTQ Việt Nam n’gor Trà Vinh an gĭt gay ma n’hao soan dăng kan bâh lĕ ƀon lan, rdâk njêng n’gor Trà Vinh ăp nar lơ ma hun hao, tâm let năp tay, Mặt trận ăp gâl n’gor Trà Vinh geh ndâk nsơm tay nău tâm rnglăp mpôl rnoi, nĕ lah nău kan lĕ rngôch an nău kan cách mạng bâh ta ntŭk.

“Rlet rlău ăp rơh kan cách mạng đah nău tât râng kan bâh ăp nuĭh ƀon lan, lĕ ƀon lan ta nkual njônh ngai, ta nkuăl ƀon têh, ƀon lan ăp mpôl rnoi, ăp phung chroh lĕ njêng soan dăng rgum nsum n’hanh geh nău dơi lĕ rngôch. Nău tâm rnglăp lĕ mpôl rnoi lĕ jêng nău kan lĕ rngôch bâh Đảng bộ n’hanh ƀon lan n’gor Trà Vinh n’hanh lah nău mbơh an nău kan cách mạng bâh n’gor tâm let năp tay”.

Rnôk hôm nha rêh Wa Hồ lĕ tă ntĭnh: “Gâp mbơh đah ƀon lan an geh tâm rnglăp na nê̆ n’hanh âk ntŭk. 5 lău ti geh lău gleh lău jong. Yơn gleh jong gŭ nsum tâm du mpang ti. Tâm bar pe jât rkeh nuĭh geh nuĭh kơt aơ kơt ri, yơn rơh aơ rơh êng lah mpôl rnoi he nơm da dê. Kơt nĕ jêng he an geh tâm pêt tâm kơl. He an gĭt he lah kon său Lạc Hồng rĭ ăp nuĭh geh nău rŏng đah neh dak nơm da dê. Geh kơt nĕ mơ dơi tâm rnglăp têh, geh tâm rnglăp rĭ nău rêh let năp tay mbra ntoh ang”. Nău ngơi bâh Wa lĕ jêng trong hăn sŏng an ăp nău kan bâh Đảng bộ, n’gâng kan n’hanh ăp mpôl rnoi oh nô ta n’gor Trà Vinh.

Nuĭh rblang: Thị Đoắt